«Ի՞նչ նշանակություն ունի այդ մանուշակագույն եռանկյունին»
«ՄԻ ՔԱՆԻ օր առաջ Եհովայի վկաներից մեկը «Դիտարան» պարբերագրի մի օրինակ տվեց ինձ»,— գրել է Կորեայի Հանրապետության Արդարադատության նախարարությունում (Սեուլ) աշխատող մի պաշտոնյա։ Նա շարունակում է. «Կարդալով այն՝ ես իմացա, թե ինչ փաստեր գոյություն ունեն այն հալածանքի վերաբերյալ, որն ուղղված էր Եհովայի վկաների դեմ, որոնք ապրում էին նացիստական և կոմունիստական ռեժիմների ներքո։ Սակայն մի հարց առաջացավ։ Պարբերագրի շապիկի վրա պատկերված էին Եհովայի վկաներ, որոնց վերարկուների ձախ կողմում մանուշակագույն եռանկյունի կար։ Ի՞նչ նշանակություն ունի այդ եռանկյունին»։
Գերմանիայում նացիստական ռեժիմի ներքո Եհովայի վկաները հրաժարվում էին ասել՝ հայլ Հիտլեր և չեզոքություն էին պահպանում քաղաքական և պատերազմական հարցերում։ Այդ պատճառով նացիստները անգթորեն հալածում էին նրանց։ 12 000 Վկաների գցեցին բանտեր ու համակենտրոնացման ճամբարներ՝ տարբեր տևողություն ունեցող ժամանակահատվածներով։ Նրանցից մոտավորապես 2 000–ը մահացան, որոնց թվում կային նաև մահապատժի ենթարկված հարյուրավոր Վկաներ։
Ի՞նչ էր նշանակում նրանց համազգեստների վրա կարված մանուշակագույն եռանկյունին։ Մի գրքում բացատրվում է. «[Նացիստական] համակենտրոնացման ճամբարներում տարբեր կարգի բանտարկյալներ հատուկ նշաններ էին կրում» («Anatomy of the SS State»)։ «Բնորոշիչ նշաններ ստեղծելու գաղափարը առաջացել էր դեռ պատերազմից առաջ։ Յուրաքանչյուր բանտարկյալի համազգեստի վրա կարում էին եռանկյունաձև մի կտոր, որի գույնը կախված էր այն բանից, թե ինչ կարգի էին դասում կալանավորին. օրինակ՝ քաղաքական բանտարկյալներին բնորոշող գույնը կարմիրն էր, Եհովայի վկաներինը՝ մանուշակագույնը, հակահասարակական գործունեության մեջ մեղադրվողներինը՝ սևը, հանցագործներինը՝ կանաչը, միասեռականներինը՝ վարդագույնը, գաղթականներինը՝ կապույտը։ Բացի գունավոր եռանկյունուց, հրեա բանտարկյալները նաև դեղին եռանկյունի էին կրում, որը կարվում էր գունավոր եռանկյունու վրա և արդյունքում ստացվում էր Դավթի վեցանկյուն աստղը»։
Պրոֆեսոր Ջոն Րոթը իր գրքում գրել է. «Եթե մանուշակագույն եռանկյունու բարոյական նշանակության մասին հիշողություն պահպանվի ապագայում, ապա այդ եռանկյունու խորհուրդը կարող է պաշտպանել դժբախտությունից։ Նրա եռանկյունաձև եզրերը մեր ուշադրությունը դարձնում են վերին աստիճանի պարկեշտ վարքի վրա, որը մարդկանց կողմից հարգանքի է արժանի» («Holocaust Politics»)։ Եհովայի վկաները թողարկել են վավերագրական մի տեսաֆիլմ, որը մրցանակի է արժանացել. այն կոչվում է՝ «Եհովայի վկաների արիությունը նացիզմի ճնշման տակ»։ Եթե ցանկանում եք դիտել այս տեսաֆիլմը, կարող եք դիմել Եհովայի վկաներին։