Կցանկանայի՞ր ունենալ լավ ընկերներ
ՄԱՐԴԻԿ ցանկանում են ունենալ լավ ընկերներ։ Անձամբ քեզ հետ տեղի ունեցած բաները մտերիմներին պատմելը հարստացնում է քո կյանքը։ Սակայն ինչպե՞ս կարող ես գտնել լավ ընկերներ։ Մոտ 2 000 տարի առաջ Հիսուսը ցույց տվեց, որ մարդկային բոլոր փոխհարաբերություններում հաջողության գրավականը անշահախնդիր սերն է։ Նա ասաց. «Ինչպէս կամենում էք՝ որ մարդիկ ձեզ անեն, նոյնպէս էլ դուք արէք նորանց» (Ղուկաս 6։31)։ Այս խոսքերը, որ հայտնի են որպես Ոսկե կանոն, ցույց են տալիս, որ ընկերներ ունենալու համար հարկավոր է լինել անեսասեր ու առատաձեռն։ Պարզ ասած՝ ընկեր ունենալու համար ինքդ պետք է ընկեր լինես։ Ինչպե՞ս։
Մտերիմ, ջերմ փոխհարաբերությունները հնարավոր չէ ձեռք բերել միանգամից։ Չէ՞ որ ընկերներն ավելին են, քան պարզապես ծանոթները։ Նրանք այն անհատներն են, որոնց հետ դու էմոցիոնալ առումով կապված ես։ Մտերիմ փոխհարաբերություններ զարգացնելու ու պահպանելու համար ջանքեր են անհրաժեշտ։ Ընկերությունը հաճախ պահանջում է, որ ընկերոջդ շահերը վեր դասես քո սեփական շահերից։ Ընկերները կիսում են ոչ միայն իրենց ուրախությունը, այլև տխրությունը։
Դու ցույց ես տալիս, որ իսկական ընկեր ես հատկապես երբ հարկ եղած դեպքում էմոցիոնալ և գործնական օգնություն ես առաջարկում ընկերոջդ։ Առակաց 17։17–ն ասում է. «Ամեն ժամանակ սիրող է բարեկամը, եւ եղբայրը նեղ օրուան համար է ծնուած»։ Իրականում ընկերական որոշ կապեր ավելի ամուր են, քան որոշ ընտանեկան կապեր։ Առակաց 18։24–ում (ԱԱ) գրված է. «Բարեկամներ կան, որ բարեկամ կը ձեւանան, բայց եղբօրմէն աւելի մտերիմ բարեկամ կայ»։ Կցանկանայի՞ք ավելին իմանալ այն մասին, թե ինչպես կարող եք այդպիսի մտերիմ փոխհարաբերություններ զարգացնել որևէ մեկի հետ։ Կուզենայի՞ք լինել այն մարդկանց թվում, ովքեր հայտնի են նրանով, որ սեր ունեն միմյանց հանդեպ (Յովհաննէս 13։35)։ Եթե այո, ապա ձեր տարածքում ապրող Եհովայի վկաները ուրախ կլինեն օգնել ձեզ գտնելու իսկական ընկերներ։