Առիթի դեպքում խոսո՞ւմ ես քո համոզմունքների մասին
«ԳՈՅՈՒԹՅՈՒՆ ունի՞ արդյոք բացարձակ ճշմարտություն»։ Լեհաստանում այս թեմայով անցկացվեց շարադրության համազգային մրցույթ։ Շարադրության հետ կապված որոշակի հրահանգներ կային, որտեղ մասնավորապես ասվում էր. «Մենք բացարձակ ճշմարտության կարիք չունենք։ Ոչ ոք չունի դրա կարիքը։ Բացարձակ ճշմարտություն ընդհանրապես չկա»։ 15–ամյա Ագատան, որը Եհովայի վկա է և սովորում է միջնակարգ դպրոցում, որոշեց օգտագործել այդ առիթը և խոսել իր կրոնական համոզմունքների մասին։
Նախքան գործի անցնելը Ագատան Եհովայից առաջնորդություն խնդրեց, հետո սկսեց այդ թեմայով նյութեր հավաքել։ «Դիտարան» պարբերագրի 1995 թ. հուլիսի 1–ի համարում նա իր շարադրության թեմայի հետ կապված հետաքրքիր տեղեկություններ գտավ։ Ագատան մեջբերեց այն հարցը, որ Պոնտացի Պիղատոսը տվեց Հիսուսին. «Ի՞նչ է ճշմարտությունը» (Հովհաննես 18։38)։ Այդ հարցը, ինչպես աղջիկն է նշում, արտահայտում էր ցինիկություն։ Պիղատոսը կարծես ասեր. «Ճշմարտությո՞ւն։ Ի՞նչ է դա։ Այդպիսի բան չկա»։ Ագատան գրեց. «Պիղատոսի հարցը շատ նման է շարադրության թեմային և տրված հրահանգներին»։
Այնուհետև նա շոշափեց ռելյատիվիզմի գաղափարախոսությունը, ըստ որի՝ այն, ինչ ճշմարիտ է մեկի համար, կարող է ճշմարիտ չլինել մյուսի համար, ընդ որում երկու կարծիքներն էլ կարող են ճիշտ համարվել։ Ագատան իր շարադրության մեջ հարց տվեց. «Մեզանից ո՞վ կհամարձակվեր ինքնաթիռ նստել, եթե մտածեր, որ աերոդինամիկայի օրենքները բացարձակ ճշմարտություններ չեն»։ Այնուհետև նա մատնացույց արեց Աստվածաշնչին՝ ասելով. «Մենք կարող ենք ապավինել Աստծու Խոսքին այնպիսի փաստերի հիման վրա, որոնք կարելի է ստուգել»։ Նա հույս հայտնեց, որ ովքեր անկեղծորեն փնտրում են բացարձակ ճշմարտությունը, բավականաչափ համբերություն կունենան դա գտնելու համար։
Ագատան արժանացավ հատուկ վկայականի, և նրան հնարավորություն ընձեռվեց հանդես գալ ամբողջ դասարանի առջև։ Նրա հետ նույն դպրոցում սովորող աշակերտներից մի քանիսը ցանկացան Աստվածաշունչ ուսումնասիրել։ Աղջիկը շատ ուրախ է, որ կարողացավ այս առիթն օգտագործել իր համոզմունքների մասին ուրիշների հետ խոսելու համար։ Այո՛, եթե բաց չես թողնում քո հավատի մասին խոսելու հնարավորությունը, ապա հրաշալի արդյունքներ կարող են լինել։ Իսկ դու ունե՞ս այդպիսի հնարավորություն։