Ինչպիսի՞ անձնավորություն ես ուզում դառնալ

ՖԻԼԻՊԻՆՆԵՐԻ քաղաքներից մեկում ոստիկանապետը մի ռահվիրայի հարցրեց. «Ի՞նչ արեցիր, որ այդ մարդը փոխվեց»։ Ապա, ցույց տալով սեղանին դրված թղթերի փաթեթը, ասաց. «Այս բոլորը նրա դեմ հարուցված դատական գործերի արձանագրություններն են։ Դու ազատեցիր մեզ մի մեծ գլխացավանքից»։ Նա, ում մասին խոսում էր ոստիկանապետը, հարբեցող ու կռվարար մարդ էր եղել, և նրա պատճառով քաղաքում միշտ տհաճ դեպքեր էին լինում։ Ի՞նչը մղեց նրան իր կյանքը լիովին փոխելու։ Աստծու Խոսքը՝ Աստվածաշունչը։

Շատերի սրտին է հասել Պողոս առաքյալի հետևյալ խորհուրդը. «Ձեր վրայից պետք է հանեք այն հին անձնավորությունը, որը համապատասխան է ձեր նախկին ապրելակերպին և ....հագնեք նոր անձնավորությունը, որը ստեղծվել է Աստծու կամքի համաձայն» (Եփես. 4։22–24)։ Ինչպիսի փոփոխություններ էլ որ անելու լինենք՝ մեծ թե փոքր, հիշենք, որ քրիստոնյա դառնալու համար շատ կարևոր է հագնել նոր անձնավորությունը։

Մեր կյանքում փոփոխություններ անելը և մկրտության չափանիշներին համապատասխանելը, սակայն, միայն սկիզբն է։ Երբ արդեն պատրաստ ենք ջրում մկրտվելու, մենք այդ ժամանակ նման ենք մի փայտի կտորի, որի վրա աշխատանք է արված, բայց այն դեռևս անավարտ է։ Թեև դեռ շատ աշխատանք կա անելու պատկերը գեղեցկացնելու համար, բայց արդեն կարելի է պատկերացնել, թե վերջնական տեսքը ինչպիսին է լինելու։ Նմանապես, մկրտության պահին մեր մեջ արդեն կան այն հիմնական հատկությունները, որոնք պահանջվում են Աստծու ծառայից։ Այնուհանդերձ, նոր անձնավորությունը դեռ ձևավորման վաղ փուլում է։ Մենք պետք է շարունակենք գեղեցկացնել այն՝ կատարելով անհրաժեշտ փոփոխություններ։

Պողոս առաքյալը շատ լավ գիտակցում էր, որ ինքը պետք է բարելավումներ անի։ Նա ասաց. «Երբ ուզում եմ անել այն, ինչը ճիշտ է, չարն ինձ մոտ է» (Հռոմ. 7։21)։ Անշուշտ, Պողոսը գիտեր, թե ինչպիսին է ինքը, գիտեր նաև, թե ինչպիսին է ուզում դառնալ։ Իսկ ի՞նչ կարելի է ասել մեր մասին։ Ինքներս մեզ կարող ենք հարցնել. «Ինչպիսի՞ անձնավորություն եմ ես և ինչպիսի՞ անձնավորություն եմ ուզում դառնալ»։

Ինչպիսի՞ անձնավորություն եմ ես

Փայտե հին տունը վերանորոգելիս բավական չէ պատերը դրսից ներկել, երբ կան փտած գերաններ։ Եթե չվերացնենք նման կառուցվածքային թերությունները, հետագայում ավելի մեծ խնդիրների առաջ կկանգնենք։ Նույն ձևով, աստվածապաշտ մարդու տպավորություն թողնելը քիչ է։ Մենք պետք է լավ ճանաչենք ինքներս մեզ և տեսնենք, թե ինչ թերություններ ունենք, որ պետք է վերացնենք։ Այլապես հին անձնավորությունը դարձյալ իր մասին կհիշեցնի։ Հետևաբար ինքնաքննությունը օդի պես կարևոր է (2 Կորնթ. 13։5)։ Մենք պետք է հայտնաբերենք անցանկալի հատկությունները և վերացնենք դրանք։ Եհովան անպայման կօգնի մեզ, որ հաջողությունների հասնենք այդ հարցում։

Պողոսը գրեց. «Աստծու խոսքը կենդանի է և զորեղ ու ավելի սուր է, քան ցանկացած երկսայրի սուր, և ներթափանցում է նույնիսկ մինչև հոգու և ոգու, ինչպես նաև հոդերի ու նրանց ոսկրածուծի բաժանումը և կարող է քննել սրտի մտքերն ու մտադրությունները» (Եբր. 4։12)։ Աստծու գրավոր Խոսքը կարող է մեծ ազդեցություն թողնել մեր կյանքի վրա։ Այն ներթափանցում է մեր էության խորքը, ասես հասնում է մինչև ոսկրածուծը։ Այն բացահայտում է մեր մտքերն ու մղումները, օգնում է մեզ տեսնել, թե ինչպիսին ենք իրականում՝ համեմատած այն բանի հետ, թե ինչ տպավորություն ենք թողնում ուրիշների վրա կամ թե ինչ կարծիք ունենք մեր մասին։ Այո՛, Աստվածաշունչն օգնում է մեզ տեսնել մեր թերի կողմերը։

Երբ նորոգում ենք հին տունը, միգուցե բավական չլինի միայն փտած գերանները փոխարինել նորերով։ Թերությունների պատճառն իմանալը կօգնի մեզ միջոցներ ձեռնարկել, որ ապագայում չբախվենք նույն խնդիրներին։ Նմանապես, մենք պետք է բնորոշենք ոչ միայն մեր բացասական կողմերը, այլև այն պատճառները, որոնք նպաստում են դրանց դրսևորմանը։ Այդպես մենք կկարողանանք վերահսկել մեր թերությունները։ Ինչ խոսք, բազում գործոններ կան, որոնք ձևավորում են մեր անձնավորությունը։ Դրանցից են, օրինակ, սոցիալական դիրքը, տնտեսական վիճակը, միջավայրը, մշակույթը, կրոնական պատկանելությունը, ծնողները և ընկերները։ Նույնիսկ հեռուստածրագրերն ու ֆիլմերը, որ դիտում ենք, ինչպես նաև ժամանցի մյուս ձևերը իրենց հետքն են թողնում մեզ վրա։ Եթե պարզենք, թե ինչն է բացասաբար անդրադառնում մեր անձնավորության վրա, կկարողանանք նվազագույնի հասցնել դրա ազդեցությունը։

Սակայն ինքնաքննություն անելուց հետո միգուցե ասենք. «Դե, ես այդպիսին եմ»։ Այսպես մտածելը սխալ է։ Կորնթոսի ժողովին, որի անդամներից ոմանք անցյալում պոռնիկներ էին, համասեռամոլներ, հարբեցողներ և այլք, Պողոս առաքյալը հետևյալն ասաց. «Ձեզանից ոմանք հենց այդպիսին էին։ Բայց դուք լվացվեցիք ....մեր Աստծու ոգով» (1 Կորնթ. 6։9–11)։ Եհովայի սուրբ ոգու օգնությամբ մեզ նույնպես կհաջողվի անհրաժեշտ փոփոխություններն անել։

Քննենք Ֆիլիպիններում ապրող Մարկոսիa օրինակը։ Նա պատմում է. «Ծնողներս միշտ վիճում էին։ Դա էր պատճառը, որ 19 տարեկանում սկսեցի ըմբոստանալ»։ Մարկոսը դարձավ հայտնի խաղամոլ, գողություն էր անում ու մասնակցում էր զինված կողոպուտների։ Նա իր ընկերների հետ մի անգամ նույնիսկ մտադիր էր ինքնաթիռ առևանգել, բայց այդ մտադրությունը չիրականացավ։ Մարկոսը ամուսնացավ, բայց չփոխվեց։ Ի վերջո, նա իր ողջ ունեցվածքը տանուլ տվեց։ Մարկոսի կինը Աստվածաշունչ էր ուսումնասիրում Եհովայի վկաների հետ, և նա նույնպես սկսեց ուսումնասիրել։ Սկզբում Մարկոսը իրեն արժանի չէր համարում Եհովայի վկա դառնալ։ Այնուհանդերձ, նա, կիրառելով սովորածը և հաճախելով քրիստոնեական հանդիպումներին, կարողացավ թողնել նախկին ապրելակերպը։ Այժմ Մարկոսը մկրտված քրիստոնյա է և օգնում է ուրիշներին, որ նրանք էլ փոփոխություններ կատարեն իրենց կյանքում։

Ինչպիսի՞ն ես ուզում լինել

Ի՞նչ փոփոխություններ պիտի անենք, որպեսզի բարելավենք մեր անձնավորությունը։ Տեսնենք, թե ինչ խորհուրդ է տալիս Պողոսը քրիստոնյաներին. «Հեռացրե՛ք ձեզանից այդ ամենը՝ զայրույթը, բարկությունը, չարությունը, վիրավորական խոսքերը, և թող անպարկեշտ խոսակցություններ դուրս չգան ձեր բերանից։ Մի՛ ստեք իրար։ Հանեք ձեր վրայից հին անձնավորությունը իր գործերով»։ Այնուհետև առաքյալն ասում է. «Նոր անձնավորությունը հագեք, որը նորոգվում է ճշգրիտ գիտությամբ՝ Նրա պատկերի համաձայն, ով ստեղծեց այն» (Կող. 3։8–10)։

Մեր գլխավոր նպատակն է հանել հին անձնավորությունը և հագնել նորը։ Ի՞նչ հատկություններ պիտի զարգացնենք այդ նպատակին հասնելու համար։ Պողոսը գրում է. «Ձեզ վրա հագեք կարեկցանքի ջերմ զգացմունքները, բարությունը, խոնարհամտությունը, մեղմությունը և երկայնամտությունը։ Շարունակե՛ք համբերել մեկդ մյուսիդ և մեծահոգաբար ներել իրար, եթե որևէ մեկը մյուսի դեմ գանգատվելու պատճառ ունի։ Ինչպես Եհովան մեծահոգաբար ներեց ձեզ, նույնն էլ դուք արեք։ Սակայն այս ամենից բացի՝ սե՛րը հագեք, որովհետև այն միասնության կատարյալ կապն է» (Կող. 3։12–14)։ Ջանք չխնայելով այս հատկությունները զարգացնելու հարցում՝ մենք կկարողանանք «հաճելի լինել թէ [Եհովային] եւ թէ մարդկանց» (Ա Թագ. 2։26)։ Երկրի վրա եղած ժամանակ Հիսուսը ուշագրավ կերպով աստվածահաճո հատկություններ դրսևորեց։ Ուսումնասիրելով Հիսուսի կյանքը և հետևելով նրա օրինակին՝ մենք ավելի շատ կնմանվենք նրան ու, հետևաբար, ավելի լավ «կընդօրինակենք Աստծուն» (Եփես. 5։1, 2)։

Որպեսզի նշմարենք, թե ինչ փոփոխություններ անելու կարիք ունենք, կարող ենք նաև ուսումնասիրել Աստվածաշնչում հիշատակվող անձանց հատկությունները՝ քննելով նրանց դրական և բացասական կողմերը։ Օրինակ՝ նահապետ Հակոբի որդի Հովսեփը։ Նա անարդարությունների բախվեց, բայց շարունակեց դրականորեն տրամադրված մնալ և պահպանեց իր լավ հատկությունները (Ծննդ. 45։1–15)։ Իսկ ահա Դավիթ թագավորի որդի Աբիսողոմը, որին գովում էին գեղեցկության համար, ձևացնում էր, թե շատ է մտահոգված ժողովրդի բարօրությամբ։ Իրականում, սակայն, նա մատնիչ էր և մարդասպան (Բ Թագ. 13։28, 29; 14։25; 15։1–12)։ Անշուշտ, կեղծ բարությունը և արտաքին գեղեցկությունը գրավիչ չեն դարձնում մարդուն։

Մենք կարող ենք հաջողության հասնել

Մենք պետք է ուշադրություն դարձնենք մեր «սրտի ծածուկ մարդուն», եթե ուզում ենք փոխվել դեպի լավը և Աստծու աչքում գեղեցիկ լինել (1 Պետ. 3։3, 4)։ Նոր անձնավորությունը հագնելու համար նախ պետք է բացահայտենք մեր բացասական կողմերը և բնորոշենք այն գործոնները, որոնք նպաստում են դրանց դրսևորմանը, ինչպես նաև աստվածահաճո հատկություններ զարգացնենք։ Կարո՞ղ ենք վստահ լինել, որ մեր ջանքերը հաջողությամբ կպսակվեն։

Այո՛, Եհովայի օգնությամբ մենք կկարողանանք անել անհրաժեշտ փոփոխությունները։ Սաղմոսերգուի նման՝ կարող ենք աղոթել. «Սուրբ [«Մաքուր», ՆԱ] սիրտ ստեղծիր ինձանում, ով Աստուած, եւ ուղիղ [«նոր», ՆԱ] հոգի նորոգիր իմ ներսումը» (Սաղ. 51։10)։ Կարող ենք խնդրել Եհովային, որ իր ոգին գործի մեր նկատմամբ, որ այն մեծացնի մեր ցանկությունը՝ ավելի շատ մեր կյանքը նրա կամքին ներդաշնակեցնելու։ Մենք, անկասկած, կարող ենք ավելի գեղեցիկ դառնալ Եհովայի աչքում։

[ծանոթագրություն]

[նկար 4–րդ էջի վրա]

Բավակա՞ն է ընդամենը դրսից ներկել փոթորկից քանդված այս տունը

[նկար 5–րդ էջի վրա]

Դարձե՞լ ես Քրիստոսի նման