Ի՞նչպես կզրուցես հնդուականի հետ

¹ Հավանաբար գիտես, որ մի շարք երկրներում՝ այդ թվում նաև մեր երկրում, ապրում են շատ հնդուականներ։ Ուստի, հնարավոր է, որ վաղ թե ուշ ծառայության ժամանակ հանդիպես հնդուականի։ Այդ դեպքում ինչպե՞ս կվարես զրույցը։

² Հիշիր հետևյալ կետերը։ Այն միսիոներները, որոնց զրույցը հնդուականների հետ հաջողությամբ է ավարտվել, ասում են, որ հաջող վկայություն տալու համար անհրաժեշտություն չկա հնդուականությունը խորապես ուսումնասիրելու։ Հաճախ պարզ ու տեղին ասված ներածական խոսքերը լավ արդյունքներ են տալիս։ Նախ հայտնիր, որ ցանկանում ես զրուցել տանտիրոջ հետ։ Եթե վերջինս դրականորեն արձագանքի, այդ դեպքում ավելի հեշտ կլինի ընտանիքի մյուս անդամների հետ զրուցելը։ Սկզբում խուսափիր խոսել այն մասին, որ քո հայտնած լուրը ավելի կարևոր է նրա հավատալիքներից, կամ որ դու ցանկանում ես զրուցել միակ ճշմարիտ Աստծո կամ գոյություն ունեցող ամենահին սուրբ գրությունների շուրջը։ Քանի որ շատ հնդուականներ գտնում են, որ Աստվածաշունչը արևմտյան ոգով գրված գիրք է, կարող ես փոխել նրանց այդ կանխակալ կարծիքը՝ բացատրելով, որ Աստվածաշունչը չի ողջունում գաղութացումը կամ ռասայական խտրականությունը։

³ Ճիշտ գործիքներ օգտագործիր։ Հնդուականների համար հատուկ հրատարակվել են հետևյալ երկու բրոշյուրները՝ «Ինչո՞ւ պետք է Աստծուն երկրպագենք սիրով ու ճշմարտությամբ» (լույս է տեսել գուջարաթի և փենջաբերեն լեզուներով) և «Մեր պրոբլեմները. ո՞վ կօգնի մեզ լուծել դրանք» (լույս է տեսել հնդկերեն 11 լրացուցիչ լեզուներով)։ Այս երկու բրոշյուրներն էլ մատչելի են անգլերենով։ «Ահա ամեն բան նոր եմ անում» և «Աստված իսկապես հոգ տանո՞ւմ է մեր մասին» բրոշյուրները նույնպես լավ արդյունքներ են տվել հնդուականների հետ զրուցելիս։ «Աստված պահանջում է» բրոշյուրը և «Գիտություն» գիրքը կարող է հաջողությամբ գործածվել Աստվածաշնչի ուսումնասիրություններ անցկացնելիս։

⁴ Խոսակցության ընդհանուր նյութ գտիր։ Դժվար չէ հնդուականների հետ զրուցելիս խոսակցության ընդհանուր նյութ գտնելը։ Նրանք համամիտ են, որ ապրում ենք այնպիսի ժամանակներում, երբ չարությունն իր գագաթնակետին է հասել, և որ Աստված մեծ աղետի միջոցով երկիրը մաքրելու է այդ խնդիրներից՝ հաստատելով ճշմարտության ժամանակաշրջան։ Կտեսնես, թե որքան հեշտ է այդ հավատալիքները վերջին օրերի, մեծ նեղության և նոր աշխարհի մասին Աստվածաշնչի ուսուցումների հետ կապելը։ Քանի որ հնդուականները կյանքը նկատում են որպես պրոբլեմների շարք, որին լուծում չկա, բնականաբար, նրանց հետաքրքրում են ընտանեկան կյանքի, ոճրագործության ու անվտանգության մասին թեմաները, և այն, թե ինչ է պատահում մահվան պահին։ Ստորև ներկայացվում է երկու նախաբան, որոնք կարելի է օգտագործել նրանց հետ զրուցելիս։

⁵ Ընտանիք ունեցող անհատին կարելի է այսպես դիմել.

◼ «Ես այցելում եմ այն մարդկանց, որոնց մտահոգում է այսօր ընտանիքներում տիրող իրավիճակը, որը հատուկ է շատ երկրներին։ Ի՞նչ եք կարծում, ի՞նչ է անհրաժեշտ ընտանիքում միասնություն պահպանելու համար։ [Թույլ տուր պատասխանել]։ Որոշ մարդիկ գիտեն, թե ինչ են ասում հնդուականների գրությունները ընտանեկան կյանքի մասին, սակայն երբեք հնարավորություն չեն ունեցել համեմատել դրանք Աստվածաշնչի տեսակետի հետ։ Ես կցանկանայի ձեզ հետ միասին ընթերցել Կողոսացիս 3։12—14–ի խոսքերը»։ Համարն ընթերցելուց հետո տանտիրոջը ցույց տուր «Գիտություն» գրքի 15–րդ գլուխը և ավելացրու. «Հաճույքով մի փոքր ժամանակ կտրամադրեմ այս գլուխը ձեզ հետ միասին ընթերցելու համար»։

⁶ Միգուցե ներքոհիշյալ հարցադրումին երիտասարդ անհատ արձագանքի.

◼ «Վստահաբար, դուք հավատում եք Աստծուն։ Ի՞նչ եք կարծում, ո՞րն է Աստծո նպատակը՝ կապված մարդկության հետ»։ Թույլ տուր պատասխանել։ Ապա կարդա Ծննդոց 1։28–ը և ավելացրու. «Երկրի շատ մասեր խիտ են բնակեցված և ողողված են բազում պրոբլեմներով։ Ի՞նչ եք կարծում, մեր Արարիչը արդյոք ցանկանո՞ւմ է օգնել մեզ՝ մեր պրոբլեմները հաղթահարելու»։ Պատասխանը լսելուց հետո համապատասխան գրականություն առաջարկիր։

⁷ Ուրախացիր լավ արդյունքներով։ Քսաներկուամյա մի հնդուական մոտենում է քույրերից մեկին, որը քարոզելիս է լինում մի կրպակի մոտ, և խնդրում է իր հետ Աստվածաշնչի ուսումնասիրություն սկսել։ Երիտասարդը բացատրում է, որ ութ տարի առաջ ներկա է եղել այդ քրոջ և իր մոր Աստվածաշնչի թեմայով զրույցին։ Թեև նրան տպավորել էր այն միտքը, որ Աստվածաշունչը գործնական խորհուրդներ է հայթայթում մարդկանց խնդիրները լուծելու համար, սակայն այդ զրույցից հետո նրա մայրը չի հետաքրքրվում, իսկ ինքը զգում է, որ դեռ շատ փոքր է, որպեսզի ճշմարտությունն ընդունելու ինքնուրույն որոշում կայացնի։ Այժմ, երբ նա արդեն չափահաս է, ցանկանում է ավելին իմանալ։ Երիտասարդը ժամանակ չի կորցնում. քսաներեք օրում ավարտում է «Գիտություն» գրքի ուսումնասիրությունը և այդ հանդիպումից ընդամենը չորս ամիս հետո ցանկություն է հայտնում մկրտվելու։

⁸ Մի եղբայր գնացքում հանդիպում է մի հնդուականի, որը համաձայնվում է ուսումնասիրություն սկսել։ Այդ մարդը պատմում է, որ ընտանեկան կյանքում դժվարություններ, նաև ոգելից խմիչքի հետ կապված խնդիր ունի։ Նա համաձայնվում է, որ Վկան այցելի իրեն և պատմի ընտանեկան կյանքին վերաբերող Աստվածաշնչի տված խորհուրդների մասին։ Բարոյականության վերաբերյալ Աստվածաշնչի սկզբունքները հրապուրում են հնդուականին, և վերջինս համաձայնվում է Աստվածաշնչի ուսումնասիրություն սկսել։ Որոշ ժամանակ անց ընտանիքի մյուս անդամների հետ միասին սկսում են այցելել ժողովի հանդիպումները։ Հետագայում նրանք ճշմարտության մասին պատմում են իրենց ընկերներին և հարազատներին։ Արդյունքում՝ այդ մարդկանցից վեցն ընդունում են ճշմարտությունը։

⁹ Աստված ցանկանում է, որ «բոլոր մարդիկ փրկուեն եւ հասնեն ճշմարտութեան գիտութեանը» (Ա Տիմոթ. 2։4)։ Դա վերաբերում է նաև ցանկացած ոչ քրիստոնեական կրոն՝ այդ թվում հնդուականություն դավանող անհատներին։ Եթե ձեր տարածքում հնդուականներ են ապրում, ինչո՞ւ չայցելել նրանց՝ գործածելով սույն հոդվածում տրված նախաբանները։