Հռչակենք Թագավորության պատգամը

¹ «Ես.... պէտք է Աստուծոյ արքայութիւնը աւետարանեմ, որովհետեւ իսկ սորա համար ուղարկուեցայ» (Ղուկ. 4։43)։ Այս խոսքերով Հիսուսը շեշտեց, որ իր քարոզչության հիմնական նյութը Աստծո Թագավորությունն էր։ Այսօր մեր հաղորդած լուրը նույնպես մարդկանց ուշադրությունը կենտրոնացնում է Թագավորության վրա, ինչպես գրված է Մատթէոս 24։14–ում. «Արքայութեան այս աւետարանը բոլոր տիեզերքումը կ’քարոզուի ամեն հեթանոսներին վկայութիւն լինելու համար, եւ այն ժամանակ կ’գայ վերջը»։ Աստծո Թագավորության մասին ի՞նչ ճշմարտություններ պետք է լսեն մարդիկ։

² Աստծո Թագավորությունն այժմ իշխում է երկնքից և շուտով կփոխարինի բոլոր մարդկային կառավարություններին։ Սատանան արդեն երկնքից վայր է նետվել, և սկսվել են իրերի ներկա չար համակարգի վերջին օրերը (Յայտն. 12։10, 12)։ Սատանայի իշխանության տակ գտնվող այս չար համակարգը կոչնչացվի, իսկ Աստծո Թագավորությունը երբեք չի սասանվի. այն հավիտյան կմնա (Դան. 2։44; Եբր. 12։28)։

³ Թագավորության ներքո կիրագործվեն բոլոր հնազանդ մարդկանց ցանկությունները։ Թագավորությունը կվերացնի տառապանքը, որը հետևանք է պատերազմների, ոճրագործության, հալածանքի ու աղքատության (Սաղ. 46։8, 9; 72։12–14)։ Աննդի առատություն կլինի (Սաղ. 72։16; Ես. 25։6)։ Այլևս չի լինի հիվանդություն և տկարություն. դրանք կդառնան լոկ հիշողություն (Ես. 33։24; 35։5, 6)։ Քանի որ մարդկությունն աստիճանաբար կընթանա դեպի կատարելություն, երկիրը կփոխակերպվի դրախտի, իսկ մարդիկ կապրեն հաշտ ու համերաշխ (Ես. 11։6–9)։

⁴ Մեր ապրելակերպով այսօր արդեն ցույց ենք տալիս, որ ցանկանում ենք լինել Աստծո Թագավորության հպատակները։ Թագավորության ավետիսը պետք է ազդեցություն գործի մեր կյանքի ողջ ընթացքի վրա, այդ թվում նաև մեր նպատակների և մեզ համար առաջնային համարվող բաների։ Օրինակ՝ չնայած մեր պարտականությունն է մեր ընտանիքի համար ապրուստ հայթայթելը, սակայն մենք չպետք է թույլ տանք, որ նյութականով մտահոգվելը Թագավորության շահերը ետին պլան մղի (Մատթ. 13։22; Ա Տիմոթ. 5։8)։ Բացի այդ, պետք է ուշադրություն դարձնենք Հիսուսի հետևյալ նախազգուշացմանը. «Առաջ Աստուծոյ արքայութիւնը եւ նորա արդարութիւնը խնդրեցէք. եւ այդ ամենքը կ’տրուի ձեզ» (Մատթ. 6։33)։

⁵ Քանի դեռ ժամանակ կա, մարդիկ պետք է լսեն Թագավորության պատգամը և գործեն դրան ներդաշնակ։ Ուրեմն՝ եկեք օգնենք նրանց այդ հարցում՝ «Աստուծոյ արքայութեան մասին համոզ[ելով]» (Գործք 19։8)։