Նոր աշակերտներ պատրաստելու գործին կարող են մասնակցել ժողովի բոլոր անդամները
1 Միայն մեկ հոգու ջանքերը բավական չեն նոր աշակերտ պատրաստելու համար։ Եհովան կարող է օգտագործել իր բոլոր «համագործակիցներին»՝ օգնելու Աստվածաշունչ ուսումնասիրողներին հոգևորապես աճել (1 Կորնթ. 3:6–9)։ Մեզանից յուրաքանչյուրը օգնում է նոր անհատներին՝ ոչ միայն քրիստոնեական հանդիպումների ժամանակ անկեղծ մեկնաբանություններ տալով, այլ նաև իր լավ վարքով, որը բացահայտ ապացույցն է այն բանի, որ Աստծու ոգին գործում է մեր կյանքում (Հովհ. 13:35; Գաղ. 5:22, 23; Եփես. 4:22, 23)։ Իսկ ուրիշ ի՞նչ կարելի է անել նոր անհատներին օգնելու համար։
2 Ի՞նչ կարող է անել ժողովը։ Մենք բոլորս էլ կարող ենք անհատական հետաքրքրություն ցույց տալ նրանց հանդեպ, ովքեր նոր են սկսել հաճախել ժողովի հանդիպումներին։ Կարող ենք նախաձեռնություն հանդես բերել և ջերմորեն նրանց ողջունել, ինչպես նաև ժողովից առաջ ու հետո նրանց հետ զրուցել։ Վերհիշելով իր առաջին հանդիպումը ժողովի անդամների հետ՝ մի մարդ այսպիսի խոսքեր ասաց. «Մեկ օրում ինձ բոլորովին անծանոթ, սակայն անկեղծ սեր արտահայտող ավելի շատ մարդկանց հանդիպեցի, քան մինչ այդ հանդիպել էի այն եկեղեցում, որը հաճախում էի մանուկ հասակից։ Ակնհայտ էր, որ ես ճշմարտությունն էի գտել»։ Ժողովի հանդիպմանը առաջին անգամ ներկա գտնվելուց յոթ ամիս հետո այս մարդը մկրտվեց։
3 Անկեղծորեն գովիր, երբ տեսնում ես, որ Աստվածաշունչ ուսումնասիրողը հոգևորապես առաջադիմում է։ Նա հակառակությա՞ն է հանդիպում։ Կանոնավոր հաճախո՞ւմ է հանդիպումներին։ Ջանքեր գործադրո՞ւմ է մեկնաբանություններ տալու։ Ցուցակագրվե՞լ է Աստվածապետական ծառայության դպրոցին կամ մասնակցո՞ւմ է քարոզչական ծառայությանը։ Գովիր նրան իր հոգևոր հաջողությունների համար։ Քո խոսքերը կքաջալերեն և ուժ կտան նրան (Առակ. 25:11)։
4 Ի՞նչ կարող է անել ուսումնասիրություն անցկացնողը։ Քարոզիչներից ոմանք օգնել են իրենց ուսումնասիրողներին ծանոթանալ ժողովի անդամների հետ՝ հրավիրելով օրինակելի քարոզիչներին մասնակցել այդ անհատների հետ անցկացվող ուսումնասիրություններին։ Որքան հնարավոր է շուտ ուսումնասիրողին հրավիրիր ժողովի հանդիպումներին։ Եվ երբ նա արդեն սկսում է հաճախել այդ հանդիպումներին, նպատակ դիր ծանոթացնել նրան ժողովի մյուս անդամների հետ։ Պայքարո՞ւմ է իր վատ սովորությունների դեմ, ինչպիսին, ասենք, ծխելն է։ Իր տան անդամներից որևէ մեկը հակառակվո՞ւմ է այն բանին, որ նա Աստվածաշունչ է ուսումնասիրում։ Նա կարող է օգուտներ ստանալ՝ զրուցելով այնպիսի քարոզչի հետ, որը նույնպես ունեցել է նման դժվարություններ և հաղթահարել է դրանք (1 Պետ. 5:9)։
5 Նոր անհատները կարիք ունեն, որ ժողովը հոգևոր օգնություն ցույց տա իրենց։ Բոլորն էլ կարող են օգնել նրանց հոգևորապես առաջադիմելու, եթե անկեղծ հետաքրքրություն ցույց տան նրանցից յուրաքանչյուրի նկատմամբ։