Մենք քանդում ենք ցանկացած զորավոր ամրություն
1 Սատանան դարեր շարունակ կեղծ ուսմունքների և ստերի միջոցով կուրացրել է բազմաթիվ մարդկանց սրտերն ու մտքերը։ Նա տարածել է այնպիսի ուսմունքներ, ինչպիսիք են՝ Երրորդությունը, հոգու անմահությունը և կրակե դժոխքը։ Սատանան հարցականի տակ է դրել Արարչի գոյությունը, ինչպես նաև Աստվածաշնչի վավերականությունը։ Ռասիզմն ու ազգայնամոլությունը ուրիշ խոչընդոտներ են, որոնք նույնպես խանգարում են մարդկանց գալ դեպի ճշմարտության լույսը (2 Կորնթ. 4։4)։ Ինչպե՞ս կարող ենք «քանդել» այսպիսի ամուր հավատալիքները (2 Կորնթ. 10։4, 5)։
2 Հաշվի առ զգացմունքները։ Երբ մարդիկ երկար տարիներ հավատում են որոշ ուսմունքների, ասես ջերմ զգացմունքներով կապվում են դրանց։ Ոմանք հավատում են այսպիսի կեղծ գաղափարների դեռ մանկուց։ Մենք կարող ենք օգնել նման անհատներին, եթե նրանց հետ խոսելիս ցույց տանք, որ հարգում ենք իրենց տեսակետը (1 Պետ. 3։15)։
3 Մենք կհարգենք նրանց արժանապատվությունը, եթե թույլ տանք, որ բացատրեն, թե ինչին են հավատում և ինչու (Հակ. 1։19)։ Միգուցե նրանք հավատում են, որ հոգին անմահ է, քանի որ կորցրել են իրենց հարազատին և փափագում են նորից տեսնել նրան։ Կամ՝ տոներ են նշում, որովհետև նրանց համար դրանք պարզապես լավ առիթներ են իրենց ընտանիքների հետ հաճելի ժամանակ անցկացնելու։ Մարդկանց ուշադիր լսելով՝ կհասկանանք նրանց զգացմունքները, և դա կօգնի մեզ արդյունավետորեն պատասխանել (Առակ. 16։23)։
4 Ընդօրինակիր Հիսուսին։ Հիսուսը լավ օրինակ թողեց մեզ այն հարցում, թե ինչպես արձագանքեց օրենքից լավատեղյակ մարդու հարցերին։ Նա ուղղակիորեն չասաց՝ ինչ անել, քանի որ վերջինիս համար թանկ էին իր հավատալիքները։ Փոխարենը՝ Հիսուսը անդրադարձավ Գրություններին, խրախուսեց նրան արտահայտել իր տեսակետը և օրինակի միջոցով դիմեց նրա տրամաբանությանը (Ղուկ. 10։25–37)։
5 Աստծու Խոսքը կարող է օգնել մարդկանց հրաժարվելու կեղծ կրոնական հավատալիքներից (Եբր. 4։12)։ Եթե համբերատարությամբ խոսենք նրանց հետ, կկարողանանք հասնել իրենց սրտերին, ինչն էլ կօգնի անհատներին մերժել կեղծիքը և ընդունել ճշմարտությունը, որը կազատի նրանց (Հովհ. 8։32)։