«Լավ վարք ունեցեք ազգերի մեջ»
1. Ինչո՞ւ է կարևոր լավ վարք ունենալ գալիք համաժողովների ընթացքում։
1 Ամեն տարի համաժողովների ընթացքում մենք լինում ենք հանրության ուշադրության կենտրոնում, ուստի շատ կարևոր է, որ մեր լավ վարքով ներկայացնենք այն Աստծուն, որին երկրպագում ենք (Ղևտ. 20։26)։ Մեր վարվելակերպից, հագուստից ու հարդարանքից պետք է պարզ երևա, որ մենք Քրիստոսի ճշմարիտ հետևորդներն ենք։ Ինչպե՞ս կարող ենք գալիք մարզային և միջազգային համաժողովներին մասնակցելով՝ «լավ վարք ունենալ ազգերի մեջ» և այսպիսով փառավորել մեր երկնային Հորը (1 Պետ. 2։12)։
2. Համաժողովի ընթացքում լավ վարք դրսևորելու ի՞նչ հնարավորություններ կունենանք։
2 Դրսևորիր քրիստոնյային վայել հատկություններ։ Միմյանց հանդեպ ցուցաբերած սերը, ինչպես նաև «դրսինների հետ» ունեցած մեր վարվելակերպը խիստ տարբերվում է այս աշխարհում իշխող ոգուց (Կող. 3։10; 4։5; 2 Տիմոթ. 3։1–5)։ Մենք պետք է լինենք համբերատար ու քաղաքավարի, երբ առնչվում ենք հասարակական վայրերի աշխատողների հետ, նույնիսկ եթե խնդիրներ առաջանան։ Լավ վերաբերմունք դրսևորած կլինենք նաև, եթե գնահատանք ցույց տանք մեզ մատուցված ծառայությունների համար, օրինակ՝ թեյանվեր տանք, եթե տվյալ վայրում դա ընդունված է։
3. Ի՞նչ հիշեցում է տրվում ծնողներին և ինչո՞ւ։
3 Ծնողները պետք է ուշադիր հետևեն իրենց երեխաներին համաժողովի անցկացման վայրում, փողոցում և հասարակական այլ վայրերում (Առակ. 29։15)։ Հյուրանոցներից մեկի մենեջերը մի ամուսնական զույգի ասաց. «Մենք սիրում ենք ձեզ։ Ձեր ընտանիքներն ու երեխաները դաստիարակված ու քաղաքավարի են։ Ողջ անձնակազմը խոսում է ձեր մասին։ Մենք ուզում ենք, որ դուք այստեղ անցկացնեք ձեր բոլոր հանգստյան օրերը»։
4. Համաժողովի անցկացման քաղաքում ինչո՞ւ պետք է ուշադրություն դարձնենք մեր հագուկապին։
4 Համեստ հագուկապ։ Մենք պետք է համաժողով գնանք առիթին համապատասխան և համեստ հագուստով։ Այն չպետք է արտացոլի այս աշխարհում ընդունված հագուստի ծայրահեղ ոճերը (1 Տիմոթ. 2։9)։ Նույնիսկ երբ ծրագրից առաջ և հետո ժամանակ ենք անցկացնում, մենք ուզում ենք խուսափել անփույթ և թափթփված տեսք ունենալուց։ Գեղեցիկ հագուկապը թույլ կտա հպարտությամբ կրելու մեր անվանաքարտը և վկայություն տալու, երբ առիթ լինի։ Գալիք համաժողովներին մենք մեր համեստ արտաքին տեսքով և լավ վարքով անկեղծ սիրտ ունեցող մարդկանց ուշադրությունը ոչ միայն կհրավիրենք Աստվածաշնչի կյանք փրկող պատգամի վրա, այլ նաև կուրախացնենք Եհովային (Սոփ. 3։17)։