Մխիթարական լուր՝ Աստծու Խոսքից. հույս փախստականների համար

Ամեն տարի միլիոնավոր մարդիկ ստիպված են լինում թողնել իրենց տները ու փախչել համեմատաբար ապահով վայրեր։ Դո՞ւք էլ եք բախվել այդ ցավալի իրողությանը։ Եթե այո, իմացեք, որ ստիպված չեք միայնակ հաղթահարել այդ ամենը։ Աստված պատրաստ է օգնել ձեզ։ Նա լավ ապագայի հույս է տալիս, ինչի մասին գրված է նրա Խոսքում՝ Աստվածաշնչում։

«Փախստականներն ու տեղահանվածներըa ոչ միայն մեր շուտափույթ օգնության կարիքն ունեն, այլև.... լավ ապագայի հույսի»,– ասում է Եվրոպական միության նախկին հանձնակատար Խրիստոս Ստիլիանիդեսը։b Հույս ունեցող մարդիկ կարողանում են դրական նայել ապագային։ Բայց զգացապես ապաքինվելու համար փախստականները, հույսից բացի, նաև մխիթարության կարիք ունեն։

«Երբ ստիպված եղա փախչել իմ երկրից՝ ընտանիքիս թողնելով այնտեղ, անասելի դատարկություն էի զգում։ Սիրտս լի էր վախով, տխրությամբ ու անհանգստությամբ» (Էմմանուել, Հայիթի)։

Դո՞ւք էլ այդպիսի զգացումներ ունեք։ Եթե ստիպված եք եղել թողնել ձեր տունը և փախչել ավելի ապահով վայր, ապա և՛ հույսի, և՛ մխիթարության կարիք ունեք։ Ինչպե՞ս կարող է այդ հարցում ձեզ օգնել Աստծու Խոսքը՝ Աստվածաշունչը։

Մխիթարություն՝ Աստծու Խոսքից

Աստվածաշնչում ասվում է. «Եհովանc.... սիրում է պանդուխտին» (2 Օրենք 10։17, 18)։

Աստվածաշնչում ասվում է. «Եհովան մոտ է բոլոր նրանց, ովքեր իրեն են կանչում» (Սաղմոս 145։18)։

Աստվածաշնչում ասվում է. «Անհնա՛ր է, որ ճշմարիտ Աստված անարդարացի բան անի.... Ամենակարողը արդարությունը չի խեղաթյուրում» (Հոբ 34։10, 12)։

Սա նշանակում է, որ Աստված ոչ ոքի տառապանք չի բերում։ Նա չի պատժում ձեզ, ոչ էլ փորձելու համար դժվարություններ է տալիս։

Հույս՝ Աստծու Խոսքից

Աստվածաշունչը հայտնում է, թե Աստված մեզ համար ինչ է անելու ապագայում։ Իմացեք, թե լավ ապագայի այդ հույսն ինչպես է օգնում նրանց, ովքեր ստիպված լքել են իրենց տները։

Աստվածաշնչում ասվում է. «Աստված կսրբի նրանց աչքերից բոլոր արցունքները: Այլևս ո՛չ մահ կլինի, ո՛չ սուգ, ո՛չ աղաղակ և ո՛չ էլ ցավ» (Հայտնություն 21։4)։

Սա նշանակում է, որ մենք կազատվենք ցավ ու տառապանքից։ Աստված խոստանում է վերացնել բոլոր այն խնդիրները, որոնք մենք անզոր ենք լուծել, և որոնք մեզ հուսահատության մեջ են գցում։

«Աստված շուտով վերջ կդնի անարդարություններին և մեր շուրջը տեղի ունեցող բոլոր վատ բաներին։ Այդ հույսն օգնում է մտքումս վառ պահել այն օրը, երբ ամեն ցավ ու տառապանք կվերջանա» (Կարլա, Սալվադոր)։

Աստվածաշնչում ասվում է. «Նախկին բաներն այլևս մտքում չեն լինի, ոչ էլ սիրտը կճնշեն» (Եսայիա 65։17)։

Սա նշանակում է, որ կազատվենք ցավոտ հիշողություններից։ Աստված այնպես կանի, որ ձեր կրած դժվարությունների ծանր հիշողությունները անընդհատ չտանջեն ձեզ։

«Աստվածաշունչը խոստանում է, որ մենք չենք էլ հիշի մեր ապրած ցավը, մեր ունեցած կորուստները։ Այդ հույսն օգնում է ինձ ավելի հեշտ տանել մեր նոր իրավիճակի հետ կապված դժվարությունները, քանի որ գիտեմ, որ շուտով ամեն ինչ փոխվելու է» (Նատալյա, Ուկրաինա)։

Աստվածաշնչում ասվում է. «Երկնքի Աստվածը մի թագավորություն է հաստատելու, որը.... ջախջախելու է և վերջ է դնելու այդ բոլոր թագավորություններին» (Դանիել 2։44)։

Սա նշանակում է, որ ողջ երկրագունդը ղեկավարելու է մեկ կատարյալ երկնային կառավարություն։ Աստված շուտով կվերացնի աշխարհի բոլոր կառավարությունները, և դրանց փոխարեն կիշխի իր երկնային կառավարությունը։ Այն իսկական խաղաղություն և ապահովություն կբերի ողջ մարդկությանը։ Ամենուր արդարություն կտիրի, և բոլորը կապրեն բարեկեցիկ կյանքով (Միքիա 4։3, 4)։

«Ես գիտեմ, որ ներկայիս խնդիրները՝ ճնշումները, խտրականությունը, անհիմն կասկածամտությունը, ռասիզմը և նման բաները, ժամանակավոր են, քանի որ Եհովայի թագավորությունը շուտով վերջ է դնելու այդ ամենին։ Դա ինձ ուժ է տալիս» (Մուստաֆա, Մերձավոր Արևելք)։

Իմաստուն խորհուրդներ՝ Աստծու Խոսքից

Ձեզ հետ պատահածից հետո թերևս փորձում եք աստիճանաբար համակերպվել իրողությանը։ Աստվածաշնչի գործնական խորհուրդները կարող են օգնել այդ հարցում։ Դրանք նաև կարող են օգնել, որ ավելի հեշտ տանեք հանգամանքների փոփոխությունը, ինչպես, օրինակ, նյութական կորուստները։ Տեսեք, թե հետևյալ խորհուրդները ինչպես են օգնում փախստականներին։

Աստվածաշնչում ասվում է. «Մարդ ինչքան էլ շատ ունենա, նրա կյանքը կախված չէ իր ունեցվածքից» (Ղուկաս 12։15)։

Այս իմաստուն խոսքերը ինչպե՞ս կարող են օգնել ձեզ։ Դուք, ըստ ամենայնի, ուժգին ցնցում եք ապրել և կորստի ճնշող զգացում ունեք։ Բայց եթե մի պահ կանգ առնեք ու մտածեք, թե որքան թանկ է ձեր կյանքը, ապա ձեր կրած ցանկացած կորուստ այդքան էլ մեծ նշանակություն չի ունենա։

«Կյանքը նյութական բաներից կարևոր է։ Կան իրավիճակներ, երբ ինչքան էլ փող և այլ նյութական բաներ ունենաս, դա, միևնույն է, քեզ որևէ կերպ չի օգնի» (Նատալյա, Ուկրաինա)։

Աստվածաշնչում ասվում է. «Մի՛ ասա՝ «Ինչո՞ւ էին առաջվա օրերը ավելի լավը, քան ներկայիս օրերը»» (Ժողովող 7։10)։

Այս իմաստուն խոսքերը ինչպե՞ս կարող են օգնել ձեզ։ Ստեղծված իրավիճակը գուցե իսկապես ծանր է, բայց այն նախկին հանգամանքների հետ չհամեմատելը կօգնի, որ դառը զգացումներով չլցվեք։

«Ընդունելով իմ ներկա իրավիճակը այնպիսին, ինչպիսին կա՝ ես կարողանում եմ դրական մտայնություն ունենալ» (Էլի, Ռուանդա)։

Աստվածաշնչում ասվում է. «Եթե ուտելիք և հագուստ ունենք, դրանցով բավարարվենք» (1 Տիմոթեոս 6։8)։

Այս իմաստուն խոսքերը ինչպե՞ս կարող են օգնել ձեզ։ Փորձեք բավարարվել կենսական անհրաժեշտության բաներով։ Գոհունակ լինելով՝ ավելի քիչ կանհանգստանաք, ինչն էլ կնպաստի, որ զգացապես հավասարակշռված լինեք։

«Աստվածաշունչը օգնում է ինձ ամեն ինչին այլ տեսանկյունից նայել և չափից շատ չմտածել մեր կորցրածի մասին։ Ես ու կինս ուրախ ենք, որ ողջ ենք ու ապահով վայրում ենք» (Իվան, Ուկրաինա)։

Աստվածաշնչում ասվում է. «Ինչպես ուզում եք՝ մարդիկ ձեզ հետ վարվեն, այդպես էլ դուք վարվեք նրանց հետ» (Մատթեոս 7։12)։

Այս իմաստուն խոսքերը ինչպե՞ս կարող են օգնել ձեզ։ Եթե ձգտեք համբերատար ու բարի լինել, մարդկանց հետ շատ ավելի հեշտ լեզու կգտնեք։ Այդ հարցում ջանքեր ներդնելով՝ նաև կնպաստեք, որ փոխվի մարդկանց կանխակալ կարծիքը, և ձեզ ավելի հեշտ ու սիրով կընդունեն տեղի համայնքում։

«Մարդիկ մեծ մասամբ շատ են գնահատում, երբ իրենց հետ բարությամբ, սիրով ու հարգանքով ես վարվում։ Նման վերաբերմունքի շնորհիվ տեղացիների հետ լավ հարաբերություններ են հաստատվում» (Անջելո, Շրի Լանկա)։

Աստվածաշնչում ասվում է. «Ամեն ինչի մասին աղոթեք Աստծուն.... և Աստված ձեզ այնպիսի խաղաղություն կտա, որը.... կպահպանի ձեր սիրտն ու միտքը» (Փիլիպպեցիներ 4։6, 7)։

Այս իմաստուն խոսքերը ինչպե՞ս կարող են օգնել ձեզ։ Աղոթեք Աստծուն և նրան պատմեք ձեր զգացումների, կարիքների, վախերի և անհանգստությունների մասին։ Այդպիսի աղոթքները կարող են օգնել, որ փարատեք մտահոգությունները և զգացապես չճնշվեք ու չընկճվեք ստեղծված հանգամանքներից։

«Երբ էլ որ խնդիրներ եմ ունենում, աղոթում եմ Աստծուն, և նա պատասխանում է ինձ։ Բացի այդ՝ Աստվածաշնչի հայտնած տեղեկությունները օգնում են, որ միտքս խաղաղվի» (Յոլ, Հարավային Սուդան)։

«Աստվածաշնչի հիասքանչ խորհուրդների շնորհիվ ներքին խաղաղություն եմ գտել, ինչը ինձ խիստ անհրաժեշտ է ստեղծված ծանր իրավիճակում» (Վալենտինա, Ուկրաինա)։

«Ուժով եմ լցվում իմանալով՝ որ Եհովա Աստված շատ ավելի լավ կյանք է խոստանում» (Էմմանուել, Հայիթի)

Կցանկանա՞ք ավելին իմանալ Աստվածաշնչի խոստումների մասին, որոնք հույս ու մխիթարություն են տալիս, և տեսնել, թե ինչու կարող ենք վստահել դրանց։ Խնդրեք, որ այս նյութը ձեզ տված մարդը կամ որևիցե այլ Եհովայի վկա այցելի ձեզ։ Նրանք առանց որևէ վճարի սիրով կօգնեն ձեզ։