Ի՞նչ է սպասում կրոնին։ Ի՞նչ է ասում Աստվածաշունչը

Հիասթափվա՞ծ եք կրոններից, կամ գուցե ավելի վատ՝ նողկա՞նք եք զգում դրանց հանդեպ։ Թեև կրոնները որոշ լավ բաներ են արել տարբեր համայնքներում կամ տարբեր մարդկանց համար, բայց դրանք նաև շատ չարիք են բերել։ «Պատմության մեջ մղված ամենաահասարսուռ պատերազմները բռնկվել են կրոնական գաղափարախոսությունների հողի վրա»,– ասվում է կրոնի ու պատերազմների մասին մի հանրագիտարանում (Encyclopedia of Religion and War)։ Կրոնական առաջնորդները հաճախ կրոնը ծառայեցրել են ոչ թե իր բուն նպատակին՝ Աստծուն պաշտելուն, այլ օգտագործել են քաղաքական շահեր առաջ տանելու համար։ Շատ դեպքերում էլ քողարկել են իրենց շարքերում կատարված սեռական ոտնձգությունները և ֆինանսական հանցագործությունները։

Եթե հիասթափված եք կրոններից, գուցե ձեզ հետաքրքրի, թե Աստված ինչ կարծիքի է դրանց մասին։ Աստվածաշունչը հայտնում է, որ կրոններից շատերը իրենց արած սխալ բաների պատճառով արժանացել են Աստծու դատապարտությանը։ Այնտեղ կան մարգարեություններ, որոնք նկարագրում են, թե ինչ է սպասում այդ կրոններին։ Աստվածաշունչը խորհրդանշական լեզվով նկարագրում է, թե Աստված ինչպես է շուտով գլոբալ մասշտաբով քայլեր ձեռնարկելու կեղծ կրոնի դեմ։

Ի՞նչ է հայտնում Աստվածաշունչը կրոնի ապագայի մասին

Մարգարեություն։ Աստվածաշնչի «Հայտնություն» գրքում նկարագրվում է մի մարմնավաճառ, որի անունն է «Մեծ Բաբելոն»։ Նա նստած է մի ալ կարմիր գազանի վրա, բայց հետագայում սպանվում է այդ նույն գազանի ձեռքով (Հայտնություն 17։3, 5, 16)։

Նշանակությունը։ Մարմնավաճառը՝ Մեծ Բաբելոնը, խորհրդանշում է բոլոր կեղծ կրոնները՝ միասին վերցրած, այսինքն՝ բոլոր այն կրոնները, որոնք չունեն Աստծու հավանությունը։a Ալ կարմիր գազանը խորհրդանշում է Միավորված ազգերի կազմակերպությունը (ՄԱԿ)։b Այն փաստը, որ մարմնավաճառը նկարագրվում է ալ կարմիր գազանի վրա նստած, իրավացիորեն ցույց է տալիս, որ կեղծ կրոնը փորձում է ազդեցություն և անգամ իշխանություն բանեցնել այդ քաղաքական միության վրա։ Իսկ այն, որ գազանը սպանում է մարմնավաճառին, նշանակում է, որ ՄԱԿ-ը և նրան աջակից պետությունները այս աշխարհի բոլոր կեղծ կրոնների դեմ դուրս կգան և կոչնչացնեն դրանք։ Այդ աննախադեպ իրադարձությունը կեղծ կրոնի համար լիակատար ու վերջնական ոչնչացում կնշանակի։

Ինչպե՞ս տեղի կունենա կեղծ կրոնի ոչնչացումը

Մարգարեություն։ «Տասը եղջյուրները և գազանը, որ տեսար, կատեն մարմնավաճառին, կթալանեն.... և վերջնականապես կայրեն նրան, որովհետև Աստված նրանց սրտում [աշխարհի ղեկավարների սրտում] ցանկություն դրեց, որ իրագործեն իրենց նպատակը, որն իրականում Իր մտադրությունն է, այսինքն՝ իրենց թագավորությունը գազանին տան.... Մեկ օրում նրա վրա պատուհասներ կգան՝ մահ, սուգ և սով, ու նա վերջնականապես կայրվի, որովհետև Եհովաc Աստված՝ նրան դատողը, զորեղ է» (Հայտնություն 17։16, 17; 18։8)։

Նշանակությունը։ Աստված «իր մտադրությունը» կսերմանի աշխարհի պետությունների «սրտում»։ Նա կդրդի նրանց, որ «իրենց թագավորությունը»՝ քաղաքական իշխանությունը, տան ՄԱԿ-ին։ Իր հերթին ՄԱԿ-ը, պետություններից լիազորություն ստացած, կոչնչացնի կեղծ կրոնը ողջ աշխարհում։ Այդ ապշեցուցիչ իրադարձությունը տեղի կունենա արագ ու անսպասելի, ասես «մեկ օրում»՝ հանկարծակիի բերելով մարդկանցից շատերին (Հայտնություն 18։21)։

Կեղծ կրոնն ինչո՞ւ է ոչնչացվելու

Մարգարեություն։ «Նրա մեղքերը կուտակվել ու հասել են մինչև երկինք, և Աստված հիշել է նրա անարդար գործերը» (Հայտնություն 18։5)։

Նշանակությունը։ Դարեր շարունակ կեղծ կրոնը Աստծուն տհաճ շատ բաներ է արել։ Անդրադառնանք այդ «մեղքերից» մի քանիսին, որոնց պատճառով այն արժանացել է Աստծու Դատաստանին։

Ներգրավվածություն քաղաքականության մեջ։ Հիսուս Քրիստոսը իր հետևորդներին սովորեցրել է միջամուխ չլինել քաղաքականության մեջ և իրենց հույսը դնել Աստծու թագավորության վրա՝ երկնային կառավարության, որը շուտով վերջ է դնելու մարդկանց իշխանությանըd (Դանիել 2։44; Մատթեոս 6։9, 10; Հովհաննես 6։15; 18։36)։ Կեղծ կրոնը արել է ճիշտ հակառակը։ Աստծուն նվիրված լինելու փոխարեն ակտիվորեն ներգրավվել է քաղաքական հարցերում։ Հենց դրա համար էլ «Հայտնություն» գրքի մարգարեության մեջ կեղծ կրոնը ներկայացնող Մեծ Բաբելոնի մասին ասվում է, որ նա «անբարոյականություն» է գործել երկրի թագավորների հետ, ուստի և իրավացիորեն կոչվում է «մեծ մարմնավաճառ» (Հայտնություն 17։1, 2; Հակոբոս 4։4)։



Բռնություն։ Կեղծ կրոնին Աստված պատասխանատու է համարում «երկրի վրա սպանված բոլոր մարդկանց արյունը թափելու համար» (Հայտնություն 18։24)։ Այն ոչ միայն իր անդամներին չի սովորեցրել խաղաղության ձգտել, այլև թիկունք է կանգնել պատերազմներին ու ահաբեկչական գործողություններին և անգամ հրահրել է դրանք։



Ագահություն։ Կեղծ կրոնը ապրում է «անամոթ պերճանքի մեջ» (Հայտնություն 17։4; 18։7)։ Շատ կրոններ, օգտվելով իրենց ազդեցիկ դիրքից և կապերից, հսկայական հարստություն են կուտակել։ Նրանց ագահությունը տհաճ է Աստծուն (Տիտոս 1։7)։



Ստեր։ Կեղծ կրոնը պրոպագանդում է ուսմունքներ և սովորույթներ, որոնք չեն համապատասխանում Աստվածաշնչում գրվածին։e Քանի որ Աստծուն անարգող և մարդկանց մոլորության մեջ գցող այդ բազմաթիվ ուսմունքների աղբյուրը հենց կեղծ կրոնն է, Աստվածաշունչը նրան անվանում է «երկրի նողկալի բաների մայրը» (Հայտնություն 17։5; 18։23)։

Բոլո՞ր կրոններն են ոչնչացվելու

Ո՛չ։ «Հայտնություն» գրքում խոսվում է տարբեր ազգերի մարդկանցից բաղկացած մի մեծ խմբի՝ «մեծ բազմության» մասին (Հայտնություն 7։9)։ Այդ մեծ բազմության անդամները «սպիտակ զգեստներ են հագած», ինչը նշան է, որ նրանք մաքուր են մնացել ու ճիշտ ձևով են պաշտել Աստծուն։ Եվ նրանց մասին ասվում է, որ վերապրել են «մեծ նեղությունից» հետո, իսկ դա, ըստ Աստվածաշնչի, այն ժամանակահատվածն է, որի ընթացքում ոչնչացվելու են կեղծ կրոնները և Աստծու մյուս հակառակորդները (Հայտնություն 7։13, 14; 19։11, 19-21)։ Սպիտակ զգեստներ հագած մարդկանց այդ մեծ բազմությունը դավանում է ճշմարիտ կրոնը, որը մնալու է հավիտյան։f

Կեղծ կրոնի կործանումը ինչպե՞ս է առնչվում ձեզ

Դուք կարող եք սփոփանք ու ներքին անդորր գտնել այն մտքից, որ Աստված հավանություն չի տալիս կրոնների արած զազրելի գործերին։ Կարող եք ապագային նայել հույսով՝ վստահ լինելով, որ շատ շուտով կվերանան բոլոր այն կրոնները, որոնք անարգանք են բերում Աստծուն և տառապանք պատճառում մարդկանց։

Նաև կարող եք համոզված լինել, որ կա Աստծուն պաշտելու ճիշտ ձև, ճիշտ կրոն։ Աստվածաշնչում ասվում է, որ «ճշմարիտ երկրպագողները Հորը կերկրպագեն ոգով և ճշմարտությամբ, որովհետև Հայրը հենց այդպիսի երկրպագողներ է փնտրում» (Հովհաննես 4։23)։ Աստված նրանց այսպիսի կոչ է անում. «Դո՛ւրս արի նրա [Մեծ Բաբելոնի] միջից, ի՛մ ժողովուրդ, որ մասնակից չլինես նրա մեղքերին, և որ նրա պատուհասներից քեզ վրա չգան» (Հայտնություն 18։4, 5)։ Այո՛, Աստված մարդկանց հրավիրում է, որ իրեն երկրպագեն Աստվածաշնչում գրված ճշմարտության համաձայն (1 Տիմոթեոս 2։3, 4)։ Իր հրավերն ընդունողներին Նա հավիտենական կյանք է խոստանում (1 Հովհաննես 2։17)։