Ազատազրկված՝ հավատի համար — Ուկրաինա
Շուրջ երեք տասնամյակ Ուկրաինայում գործել է օրենք, որը համոզմունքի հիմնավորմամբ զինծառայությունից հրաժարվողներին թույլ է տալիս այլընտրանքային քաղաքացիական ծառայություն կատարել, և Եհովայի վկաները օգտվել են այդ իրավունքից։ Այդպես նրանք տարատեսակ հանրային ծառայություններ են կատարել և մաքուր խիղճ պահպանել։
Սակայն 2022 թ. փետրվարի 24-ին Ուկրաինայում պատերազմի մեկնարկը բացահայտեց, որ մոբիլիզացիայի ընթացքում այլընտրանքային քաղաքացիական ծառայության իրավական մեխանիզմ չի գործում, ինչի հետևանքով խղճի հիմնավորմամբ զինծառայությունից հրաժարվող հարյուրավոր Վկաների նկատմամբ քրեական հետապնդում սկսվեց: Այդ հետապնդմամբ անտեսվում է այն փաստը, որ Վկաների անկոտրում դիրքորոշման հիմքում խորին համոզմունքներ են ընկած, և հարգանք չի դրսևորվում խղճի համաձայն վարվելու նրանց իրավունքի նկատմամբ։ Նման վերաբերմունքը հակասում է մարդու իրավունքների սկզբունքներին և Ուկրաինայի Սահմանադրությանը, որտեղ ասվում է. «Երբ զինվորական պարտականությունների կատարումը հակասում է քաղաքացու կրոնական համոզմունքներին, այդ պարտականությունների կատարումը փոխարինվում է այլընտրանքային (ոչ զինվորական) ծառայությամբ»։
2025 թ. սեպտեմբերի 17-ի դրությամբ համոզմունքի հիմնավորմամբ զինծառայությունից հրաժարվելու համար 5 Վկաներ դատապարտվել են մինչև 60 ամսվա ազատազրկման։ Եվս 3-ը գտնվում են նախնական կալանքի տակ և սպասում են իրենց դատավճռին։
Միջազգային մարմինների մտահոգությունները
Այս միտումները նկատի ունենալով՝ ՄԱԿ-ի երեք հատուկ զեկուցողներ մտահոգություն են հայտնել Ուկրաինայում այլընտրանքային քաղաքացիական ծառայության բացակայության վերաբերյալ: 2023 թ. նոյեմբերի 8-ին Ուկրաինայի կառավարությանն ուղղված իրենց հաղորդագրության մեջ նրանք նշել են. «Մեզ մտահոգում է նաև համոզմունքի հիմնավորմամբ պարտադիր զինվորական ծառայությունից հրաժարվողների և նրանց իրավունքների պաշտպանությամբ զբաղվողների հետապնդումը»։
Ժամանակագրություն
Սեպտեմբերի 17, 2025
Ընդհանուր առմամբ ձերբակալվել է 8 Եհովայի վկա։
Փետրվարի 24, 2022
Երկրում ռազմական դրություն է մտցվել և լիարժեք մոբիլիզացիա է սկսվել։
Հունիսի 23, 2015
Ուկրաինայի Գերագույն դատարանը պաշտպանել է զորահավաքի ժամանակ Վիտալի Շալայկոյի՝ խղճի հիմնավորմամբ զինծառայությունից հրաժարվելու իրավունքը։
Դեկտեմբեր 1991
Ընդունվել է այլընտրանքային (ոչ զինվորական) ծառայության մասին օրենքը։
Փետրվարի 28, 1991
Եհովայի վկաները օրինական գրանցում են ստացել Ուկրաինայում։