Երիտասարդները հարցնում են...

Ինչպե՞ս վարվեմ, երբ որևէ աղջիկ հետաքրքրություն է ցույց տալիս իմ հանդեպ

«Առաջին քայլն արեց Սյուզանը, և ես ինձ ամենևին էլ վատ չզգացի։ Ինձ համար դա շատ լավ առաջարկ էր» (Ջեյմս)։a

«Եթե տղամարդը ազնիվ չէ կանանց հետ, դա կարող է աղետալի հետևանքներ ունենալ» (Ռոբերտո)։

ՎԵՐՋԵՐՍ մի աղջիկ ասաց, որ ցանկանում է ինչ–​որ բան ասել քեզ։ Դու նրա հետ հաճախ ես շփվել ընկերական հանդիպումների ժամանակ։ Այդ աղջիկը հետաքրքիր զրուցակից է, որի հետ հաճելի է ժամանակ անցկացնել։ Սակայն այս անգամ նրա խոսքերը քեզ ուղղակի ապշեցրին. նա ցանկանում էր ընկերություն անել քեզ հետ և ուզում էր իմանալ, թե արդյոք դու նույնպես ունես այդ ցանկությունը։

Նրա քայլը գուցե անակնկալի բերի քեզ, մանավանդ եթե այն կարծիքին ես, թե տղամարդը պետք է առաջարկություն անի։ Թեև հաճախ հենց այդպես էլ լինում է, հիշիր, որ այդ աղջիկը որևէ աստվածաշնչյան սկզբունք չի խախտել՝ առաջինը մոտենալով քեզ։b Այս փաստը կարող է օգնել, որ ճիշտ արձագանքես։

Նրա առաջարկության շուրջ խորհրդածելուց հետո գուցե գաս այն եզրակացության, որ քեզ համար դեռ շուտ է ժամադրությունների գնալ, կամ էլ որ աղջիկը այդ առումով քեզ ներկայումս չի գրավում։ Հնարավոր է նաև, որ քեզ մեղավոր զգաս՝ մտածելով, թե դու ես որևէ ձևով այդպես մտածելու առիթ տվել նրան։ Ինչպե՞ս ճիշտ կլինի վարվել։ Նախ՝ հարկավոր է հաշվի առնել աղջկա զգացմունքները։

Հաշվի առ նրա զգացմունքները

Մտածիր, թե ինչերի միջով է անցնում աղջիկը՝ այդ քայլին դիմելով։ Ցանկանալով լավ տպավորություն թողնել քեզ վրա՝ նա գուցե օրեր շարունակ մտածել է, թե ինչ ասի։ Նա ընտրել է համապատասխան բառերը, համապատասխան ժպիտը և հաշվի է առել, որ դու հնարավոր է մերժես իրեն։ Ի վերջո, հավաքելով իր ողջ քաջությունը և հաղթահարելով ամաչկոտությունը՝ նա բացել է իր սիրտը քո առաջ։

Ինչո՞ւ է նա իրեն դրել այդ անհարմար վիճակի մեջ։ Թերևս աղջիկն ուժեղ հրապուրված է քեզանով։ Գուցե նրան առանձնահատուկ հիացմունք են պատճառում քո լավ հատկությունները։ Ուստի աղջկա խոսքերը կարող են հնչել հաճոյախոսության նման. մի բան, որ ամեն օր չես լսի։

Այս ամենը այստեղ նշվում է ոչ թե քո որոշման վրա որևէ ձևով ազդելու նպատակով, այլ որպեսզի հիշես բարյացակամ լինելու մասին։ Ջուլիա անունով մի երիտասարդ աղջիկ ասում է. «Նույնիսկ եթե տղամարդը զգացմունքներ չունի տվյալ կնոջ հանդեպ, նա պետք է իրեն շոյված զգա, որ ինչ–​որ մեկը ուշադրություն է դարձրել իր վրա։ Ուստի պարզապես «ո՛չ» ասելու փոխարեն՝ նա գոնե պետք է բարյացակամորեն վարվի կնոջ հետ և նրբանկատորեն մերժի նրան»։ Պատկերացրու, որ դու ուզում ես հենց այդպես վարվել՝ «նրբանկատորեն մերժել», այսինքն՝ բարյացակամորեն ասել «ո՛չ»։

Եթե դու արդեն մի անգամ մերժել ես նրան, գուցե հակված լինես կոպտելու։ Սակայն պայքարիր այդ ցանկության դեմ։ Առակաց 12։18–ն (ԱԱ) ասում է. «Մարդիկ կան, որոնց անմիտ խօսքերը սուրի պէս կը խոցոտեն, բայց իմաստուններուն լեզուն բժշկութիւն է»։ Ինչպե՞ս կարող ես խոսել ‘իմաստունների լեզվով’։

Կարող ես ուղղակի շնորհակալություն հայտնել նրան իր զգացմունքներն արտահայտելու և քո մասին նման բարձր կարծիք ունենալու համար։ Ներողություն խնդրիր, եթե անգիտակցաբար սխալ տպավորություն ես թողել նրա վրա։ Հստակ, բայց նրբանկատորեն ասա, որ զգացմունքներ չունես նրա հանդեպ։ Նույնիսկ եթե աղջիկը չի հասկանում քո բացատրությունները, և տեսնում ես, որ ավելի ուղիղ խոսելու կարիք կա, միևնույն է, խուսափիր կոպիտ տոնից և կտրուկ խոսքերից։ Դու գործ ունես նրա նուրբ զգացմունքների հետ, ուստի համբերատար եղիր։ Եթե նրա տեղում դու լինեիր, ապա կգնահատեիր նման նուրբ մոտեցումը, այնպես չէ՞։

Այնուամենայնիվ, նա կարող է պնդել, թե դու գիտակցաբար մոլորության մեջ ես գցել իրեն։ Գուցե հիշատակի քո որոշ արարքները, որոնք նրա մեջ զգացմունքներ են արթնացրել։ Նա կարող է ասել. «Այդ դեպքում ինչո՞ւ ինձ ծաղիկներ նվիրեցիր։ Իսկ հիշո՞ւմ ես, թե ինչ ասացիր ինձ, երբ անցյալ ամիս միասին զբոսնում էինք»։ Այժմ ժամանակն է, որ լուրջ ինքնաքննություն կատարես։

Ազնիվ եղիր ինքդ քեզ հետ

Անցյալում ճանապարհորդները իրենց հայտնագործած երկրները հաճախ դիտել են իբրև նվաճման և շահագործման ենթակա տարածքներ։ Այսօր որոշ տղամարդիկ նույն տեսակետն ունեն կանանց վերաբերյալ։ Նրանք հաճույքով ռոմանտիկ փոխհարաբերություններ են սկսում, սակայն չեն ցանկանում ամուսնանալու պատասխանատվություն վերցնել իրենց վրա։ Չհետապնդելով լուրջ նպատակներ՝ նրանք ձգտում են հրապուրել կանանց՝ խաղալով վերջիններիս զգացմունքների հետ։ Այդպիսի անհատները խաբեությամբ շահում են կնոջ սերը։ Մի քրիստոնյա երեց ասում է. «Որոշ երիտասարդներ թաշկինակի պես փոխում են աղջիկներին։ Կնոջ զգացմունքների հետ նման ձևով խաղալը ազնվություն չէ»։ Ի՞նչ հետևանքներ է բերում այդպիսի եսասեր ընթացքը։

Աստվածաշնչում ասվում է. «Ինչպէս մի գիժ որ կրակի կայծեր, նետեր եւ մահ է ցանում, այնպէս է այն մարդը որ իր ընկերին խաբում է, եւ ասում. Ահա կատակ եմ անում» (Առակաց 26։18, 19)։ Երբ տղամարդը եսասիրական դրդապատճառներով է ձգտում ընկերանալ կնոջ հետ, կինն ի վերջո հասկանում է նրա իսկական մղումները։ Նրա խաբեությունը կարող է խոցել կնոջ սիրտը, ինչպես երևում է հետևյալ դեպքից։

Մի երիտասարդ ընկերություն էր անում մի աղջկա հետ, սակայն ամուսնանալու միտք անգամ չուներ։ Նա տանում էր այդ աղջկան բարձրակարգ ռեստորաններ, նրա հետ միասին գնում էր երեկույթների։ Այդ երիտասարդին դուր էր գալիս աղջկա ընկերակցությունը, իսկ վերջինս շոյված էր նրա ուշադրությունից՝ կարծելով, թե տղան ամուսնանալու մտադրություն ունի։ Երբ աղջիկը պարզեց, որ նա ընդամենը ուզում էր ժամանակ անցկացնել իր հետ, խորը ցավ ապրեց։

Ի՞նչ պետք է անես, եթե անկանխամտածված կերպով սխալ տպավորություն ես թողել այն երիտասարդ աղջկա վրա, որը վերջերս քեզ սեր է խոստովանել։ Եթե փորձես պաշտպանել ու արդարացնել ինքդ քեզ, դրանով միայն ավելի մեծ ցավ կպատճառես նրան։ Հիշիր աստվածաշնչյան հետևյալ սկզբունքը. «Իր յանցանքը ծածկողը չի յաջողուիլ, բայց խոստովանող ու թողողը ողորմութիւն կ’գտնէ» (Առակաց 28։13)։ Ուստի ազնիվ եղիր։ Ցանկացած թյուրիմացության դեպքում ընդունիր քո մեղքը։ Եվ եթե գիտակցաբար խաղացել ես նրա զգացմունքների հետ, խոստովանիր, որ մեծ սխալ ես թույլ տվել։ Անկեղծորեն ներողություն խնդրիր։

Սակայն մի ակնկալիր, որ ներողություն խնդրելով՝ հարցը կլուծվի։ Որոշ ժամանակ երիտասարդ աղջիկը կարող է բարկացած լինել քեզ վրա։ Գուցե դու ստիպված լինես քո վարքագծի մասին բացատրություններ տալ նրա ծնողներին։ Նաև գուցե այլ հետևանքների բախվես։ Գաղատացիս 6։7 համարն ասում է. «Ինչ որ մարդ սերմէ, այն էլ կ’հնձէ»։ Այնուամենայնիվ, ներողություն խնդրելով և ուժերիդ ներածին չափ ջանալով ուղղել սխալդ՝ կօգնես նրան սովորական հունով շարունակել իր կյանքը։ Այսպիսի դեպքը դաս կլինի քեզ համար, որ սովորես ‘պահել քո շրթունքները նենգություն խոսելուց’ կյանքի բոլոր ոլորտներում, այդ թվում հակառակ սեռի հետ քո փոխհարաբերություններում (Սաղմոս 34։13)։

Պատասխան տալուց առաջ լավ մտածիր

Իսկ ի՞նչ, եթե ցանկանում ես ավելի լավ ճանաչել այդ աղջկան։ Ուրեմն նախ պետք է գիտակցես, որ ժամադրվելն ու մտերիմ հարաբերություններ սկսելը զուտ լավ ժամանակ անցկացնելու միջոց չեն։ Այն զորեղ զգացմունքները, որ առաջանում են սիրահարված զույգի միջև, պետք է որ առաջնորդեն ամուսնական միության։ Հարսանիքից հետո այդ զգացմունքները միավորում են ամուսնուն և կնոջը։ Այս բանի գիտակցումը ի՞նչ ազդեցություն պետք է թողնի քեզ վրա։

Այդ երիտասարդ աղջկա մասին մտածելուց հետո գուցե գաս այն եզրակացության, որ նա մի շարք պատճառներով քեզ դուր է գալիս։ Այժմ նա մտերիմ փոխհարաբերությունների դուռ է բացել, և դու կցանկանայիր բաց պահել այն։ Սակայն հապճեպորեն մտերմություն սկսելու փոխարեն՝ նախօրոք որոշ քայլեր ձեռնարկիր, որոնք երկուսիդ էլ կպաշտպանեն շատ ցավերից։

Երևի ցանկանաս խորհրդակցել որոշ հասուն անհատների հետ, որոնք ճանաչում են նրան։ Առաջարկիր, որ նա նույնպես խորհրդակցի քեզ ճանաչող մարդկանց հետ։ Հարկավոր է այդ հասուն մարդկանց հարցնել, թե նրանց տեսանկյունից՝ ինչ լավ ու վատ կողմեր ունի քո ընտրյալը։ Նաև կարող ես պարզել քրիստոնյա երեցների կարծիքը։ Լավ կլինի իմանալ, թե արդյոք քրիստոնեական ժողովում հարգում են այդ անհատին։

Բայց գուցե դու առարկես. «Ինչո՞ւ պետք է ուրիշները խառնվեն իմ անձնական կյանքին»։ Ճշմարտությունն այն է, որ նույնիսկ այնպիսի անձնական հարցում, ինչպիսին կողակցի ընտրությունն է, իմաստուն կլինի հարցնել մյուսների կարծիքը։ Այս խորհուրդը սուրբգրային հիմքեր ունի, քանի որ Առակաց 15։22–ն ասում է. «Խորհրդականների շատութիւնովը [մտադրությունները] հաստատվում են» (Առակաց 15։22)։ Իհարկե, այդ մեծահասակները քո փոխարեն որոշում չեն կայացնի։ Բայց նրանց տված ‘մտերիմ խրատի’ շնորհիվ կարող ես տեսնել քո ապագա ընտրյալի (ինչպես նաև քո) այն կողմերը, որ դու ինքդ չես տեսնում (Առակաց 27։9)։

Հոդվածի սկզբում հիշատակված Ջեյմսը հենց այդպես վարվեց։ Թեև նա ծնողներից առանձին էր ապրում, բայց նրանց հետ խորհրդակցեց Սյուզանի մասին։ Այնուհետև Ջեյմսը Սյուզանին ասաց, թե հասուն քրիստոնյաներից ովքեր կարող էին կարծիք հայտնել ընկերություն անելու իրենց մտադրության վերաբերյալ։ Նույնը արեց Սյուզանը։ Լավ արձագանքներ լսելուց հետո Ջեյմսն ու Սյուզանը սկսեցին մտերմություն անել՝ պարզելու համար, թե արդյոք համապատասխան ամուսիններ կլինեն։ Եթե դու էլ նման ձևով վարվես՝ նախքան զգացմունքներիդ ուժեղանալը, ապա վերջնական որոշումդ վստահությամբ կկայացնես։

Բայց առաջին հերթին աղոթիր Եհովային։ Քանի որ մտերմություն անելը դեպի ամուսնություն տանող քայլերից է, խնդրիր, որ նա քեզ օգնի հասկանալ, թե արդյոք այդ մտերմությունը կհանգեցնի ամուսնության։ Իսկ որ ավելի կարևոր է, խնդրիր Աստծուն, որ երկուսիդ էլ օգնի այնպիսի որոշումներ կայացնել, որոնք ձեզ ավելի կմոտեցնեն իրեն։ Ահա թե որտեղ է ձեր իսկական երջանկության բանալին։

[Ծանոթագրություններ]

[Նկար 17–րդ էջի վրա]

Եթե աղջիկը իրականում չի հետաքրքրում քեզ, զգույշ եղիր, որ սխալ տպավորություն չթողնես նրա վրա