ԳՆԱՃ. ԻՆՉՊԵ՞Ս ԱՊՐԵԼ
Ընդունեք իրականությունը
Երբ գները աստիճանաբար են բարձրանում, հազիվ թե նկատենք դա, հատկապես եթե մեր աշխատավարձն էլ է բարձրանում։ Սակայն երբ կտրուկ գնաճ է լինում, իսկ աշխատավարձը մնում է նույնը, գուցե մտահոգվենք և խուճապի մատնվենք, առավել ևս, եթե ընտանիք ունենք, որի հոգսը մեզ վրա է։
Ճիշտ է, մենք չենք կարող կանգնեցնել գնաճը, բայց իրականությունն ընդունելով՝ կկարողանանք գլուխ հանել իրավիճակից։
ԻՆՉՈՒ Է ԿԱՐԵՎՈՐ
Այն մարդիկ, ովքեր իրատեսորեն են նայում թանկացումներին, ավելի հեշտ են կարողանում անել ներքոհիշյալ բաները։
Հանգստություն են պահպանում։ Երբ մարդ հանդարտ է մնում, ավելի սթափ է դատում և ավելի լավ որոշումներ կայացնում։
Խուսափում են անխոհեմ սովորություններից։ Օրինակ՝ խելամիտ չի լինի անտեսել անհրաժեշտ վճարումները կամ անխնա ծախսել գումարը։
Խուսափում են ընտանիքի անդամների հետ փողի շուրջ անտեղի վիճելուց։
Հարմարվելու ելք են գտնում։ Օրինակ՝ փոփոխություններ են անում առաջնահերթությունների և ծախսերի հարցում։
ԻՆՉ ԿԱՐՈՂ ԵՔ ԱՆԵԼ
Պատրաստակամորեն հարմարվեք։ Կտրուկ թանկացումների շրջանում տեղին կլինի հնարավորինս կրճատել ծախսերը։ Ոմանք փորձում են պահպանել այն նույն ապրելակերպը, որի հնարավորությունը այլևս չունեն, իսկ դա նման է արագընթաց գետի հոսանքին հակառակ լողալուն։ Ի վերջո նրանք ուղղակի ուժասպառ են լինում։ Եթե ընտանիք ունեք, բնականաբար ցանկանում եք ապահովել նրանց ամեն ինչով և մտահոգվում եք դրա մասին։ Բայց հիշեք, որ նրանք ամեն ինչից առավել ձեր սիրո, ժամանակի և ուշադրության կարիքն ունեն։
Անիրատեսական, շռայլ կյանքով ապրելու փորձերը նման են արագընթաց գետի հոսանքին հակառակ լողալուն