Գլուխ 16

Նախանձախնդրություն Եհովայի երկրպագության հանդեպ

ՀԻՍՈՒՍԻ եղբայրներն են Հակոբոսը, Հովսեփը, Սիմոնը և Հուդան։ Նախքան Հիսուսի և նրա աշակերտների հետ Գալիլեայի ծովի մոտ գտնվող Կափառնայում քաղաքը մեկնելը նրանք հավանաբար գնում են տուն՝ Նազարեթ, որպեսզի կարողանան վերցնել իրենց անհրաժեշտ իրերը։

Բայց ինչո՞ւ է Հիսուսը գնում Կափառնայում՝ փոխանակ շարունակելու իր ծառայությունը Կանայում, Նազարեթում կամ Գալիլեայի մեկ ուրիշ բլրաշատ վայրում։ Նախ՝ Կափառնայումը ավելի աչքի ընկնող տեղում է գտնվում և ակներևաբար ավելի խոշոր քաղաք է։ Բացի այդ, Հիսուսի աշակերտների մեծ մասն ապրում է Կափառնայումում կամ նրա մոտակայքում, ուստի Հիսուսի կողմից ուսուցանվելու համար հարկ չի լինի, որ նրանք հեռանան իրենց տնից։

Կափառնայումում եղած ժամանակ Հիսուսը հրաշքներ է գործում, ինչի մասին ամիսներ հետո ինքը վկայում է։ Բայց շուտով Հիսուսն ու իր ընկերակիցները նորից ճանապարհ են ընկնում։ Մ. թ. 30 թ. գարունն է, և նրանք գնում են Երուսաղեմ՝ Պասեքը տոնելու։ Այնտեղ Հիսուսի աշակերտները տեսնում են նրան մի բան անելիս, ինչը նախկինում թերևս չէին տեսել։

Աստծու Օրենքի համաձայն՝ իսրայելացիներից պահանջվում էր կենդանիներ զոհաբերել։ Ուստի նրանց գործը հեշտացնելու համար առևտրականները այդ նպատակով Երուսաղեմում անասուններ ու թռչուններ են վաճառում։ Սակայն նրանք այդ առևտրով զբաղվում են հենց տաճարի ներսում և թանկ գնով վաճառելով՝ խաբում են ժողովրդին։

Խիստ զայրացած՝ Հիսուսը պարաններից մի մտրակ է պատրաստում և վաճառողներին դուրս է հանում տաճարից։ Նա դրամափոխների մետաղադրամները ցիրուցան է անում և շուռ է տալիս նրանց սեղանները։ «Հեռացրե՛ք դրանք այստեղից,— բղավում է նա աղավնի վաճառողների վրա,— և իմ Հոր տունը այլևս առևտրի տուն մի՛ դարձրեք»։

Տեսնելով այս ամենը՝ Հիսուսի աշակերտները հիշում են Աստծու Որդու մասին գրված մարգարեությունը. «Քո տան հանդեպ ունեցած նախանձախնդրությունը պիտի ուտի ինձ»։ Բայց հրեաները հարցնում են.

— Ի՞նչ նշան ցույց կտաս մեզ, որ իրավունք ունես այս բաներն անելու։

Հիսուսը պատասխանում է.

— Քանդե՛ք այս տաճարը, և ես երեք օրում կկանգնեցնեմ այն։

Հրեաները կարծում են, թե Հիսուսը բառացի տաճարի մասին է խոսում, ուստի հարցնում են. «Այս տաճարը քառասունվեց տարում է կառուցվել, և դու երեք օրո՞ւմ ես կանգնեցնելու»։ Բայց Հիսուսն ի նկատի ունի իր մարմնի տաճարը։ Երեք տարի հետո, երբ Հիսուսը հարություն է առնում մահացածների միջից, աշակերտները հիշում են այս խոսքերը։ Հովհաննես 2։12–22; Մատթեոս 13։55; Ղուկաս 4։23։

▪ Կանայում տեղի ունեցած հարսանիքից հետո Հիսուսը ո՞ւր է ճանապարհորդում։

▪ Ինչո՞ւ է Հիսուսը խիստ զայրանում, և ի՞նչ է նա անում։

▪ Ինչի՞ մասին են հիշում Հիսուսի աշակերտները՝ տեսնելով նրա վարվելակերպը։

▪ Հիսուսն ի՞նչ է ասում տաճարի մասին, և ի՞նչ է դա նշանակում։