Գլուխ 127

Թաղվում է ուրբաթ, իսկ կիրակի օրը գերեզմանը դատարկ է

ՈՒՐԲԱԹ օրը մոտենում է իր ավարտին, և մայրամուտին կսկսվի շաբաթը՝ նիսանի 15–ը։ Հիսուսի անկենդան մարմինը կախված է ցցից, իսկ երկու հանցագործները դեռևս կենդանի են։ Ուրբաթ օրը կոչվում է պատրաստության օր, որովհետև այդ օրը ժողովուրդը ուտելիք է պատրաստում և կատարում բոլոր այն գործերը, որոնք չեն կարող սպասել մինչև շաբաթ օրվա վերջը։

Շաբաթը, որ շուտով պետք է սկսվի, սովորական շաբաթ չէ (այսինքն՝ շաբաթվա յոթերորդ օրը), այլ կրկնակի, կամ՝ «մեծ» շաբաթ է։ Այն «մեծ» է կոչվում, որովհետև նիսանի 15–ը, որը Անթթխմոր հացի յոթնօրյա տոնի առաջին օրն է (և միշտ համարվում է շաբաթ՝ անկախ նրանից, թե շաբաթվա որ օրն է լինում), համընկել է շաբաթ օրվա հետ։

Աստծու Օրենքի համաձայն՝ մարմինները չպետք է գիշերը ցցերի վրա մնան։ Ուստի հրեաները խնդրում են Պիղատոսին, որ մահապատժի ենթարկվածների մահը արագացնելու համար կոտրեն նրանց ոտքերը։ Զինվորներն էլ գալիս ու ջարդում են երկու հանցագործների ոտքերը։ Բայց քանի որ Հիսուսը մահացել է, նրա ոտքերը չեն կոտրում։ Այսպիսով կատարվում է հետևյալ գրությունը. «Նրա ոսկորներից և ոչ մեկը չի փշրվի»։

Սակայն լիովին համոզված լինելու համար, որ Հիսուսն իրոք մահացել է, զինվորներից մեկը նիզակով խոցում է նրա կողը։ Նիզակը խրվում է նրա սրտի հատվածում, և իսկույն արյուն ու ջուր է դուրս գալիս։ Հովհաննես առաքյալը, որ ականատես է այս ամենին, հայտնում է, որ դրանով կատարվում է մեկ ուրիշ գրություն. «Կնայեն Նրան, որին խոցեցին»։

Այնտեղ ներկա է նաև արիմաթեացի Հովսեփը, որը Սինեդրիոնի պատվարժան անդամ է։ Նա թիկունք չէր կանգնել բարձրագույն դատարանի կողմից Հիսուսի դեմ ուղղված անարդար գործողություններին։ Հովսեփը, փաստորեն, Հիսուսի աշակերտներից է, թեև վախեցել էր իրեն ներկայացնել որպես այդպիսին։ Սակայն հիմա նա համարձակվում է Պիղատոսի մոտ գնալ ու նրանից խնդրել Հիսուսի մարմինը։ Պիղատոսը կանչում է հարյուրապետին, և երբ վերջինս հաստատում է, որ Հիսուսը մահացած է, թույլ է տալիս, որ մարմինը տան Հովսեփին։

Հովսեփը վերցնում է մարմինը և փաթաթում բարձրորակ մաքուր կտավով։ Նրան օգնում է Նիկոդեմոսը՝ որը նույնպես Սինեդրիոնի անդամ է։ Նիկոդեմոսն ինքն էլ չէր խոստովանել Հիսուսի հանդեպ իր հավատը, քանի որ վախեցել էր կորցնել իր դիրքը։ Բայց այժմ նա զմուռսի ու թանկարժեք հալվեի մի փաթեթ է բերում, որը մոտ 33 կիլոգրամ քաշ ունի։ Այս հոտավետ խոտերի հետ պատանքով փաթաթում են Հիսուսի մարմինը, ինչպես որ հրեաները սովորություն ունեն թաղման համար պատրաստելու մարմինները։

Մոտակայքում մի պարտեզ կա, որտեղ Հովսեփը ժայռի մեջ փորված մի նոր գերեզման ունի։ Հիսուսի մարմինը դնում են այդ գերեզմանում և մուտքին մեծ քար են գլորում։ Որպեսզի մինչև շաբաթի սկսելը մարմինը թաղեն, այն շտապելով են պատրաստում։ Այդ պատճառով Մարիամ Մագդաղենացին և Փոքր Հակոբոսի մայր Մարիամը, ովքեր հավանաբար օգնում էին պատրաստել մարմինը թաղման համար, շտապում են տուն, որ ավելի շատ հոտավետ խոտեր և յուղ պատրաստեն։ Նրանք ծրագրում են շաբաթը վերջանալուն պես գալ և Հիսուսի մարմինը օծել, որպեսզի այն ավելի երկար պահպանվի։

Հաջորդ օրը՝ շաբաթ, ավագ քահանաներն ու փարիսեցիները գնում են Պիղատոսի մոտ ու ասում.

— Տե՛ր, մենք հիշեցինք, որ այդ մոլորեցնողը, երբ դեռ ողջ էր, ասում էր. «Երեք օր հետո հարություն կառնեմ»։ Ուստի հրամա՛ն տուր, որ գերեզմանը հսկեն մինչև երրորդ օրը, որպեսզի նրա աշակերտները հանկարծ չգան ու գողանան նրան և մարդկանց ասեն, թե՝ «նա հարությո՛ւն է առել մահացածների միջից», և այս վերջին մոլորությունը ավելի վատ լինի, քան առաջինը։

— Դուք պահապան զինվորներ ունեք,— պատասխանում է Պիղատոսը,— գնացեք հսկե՛ք, ինչպես որ գիտեք։

Նրանք էլ գնում են ու գերեզմանը հսկում՝ քարի վրա կնիք դնելով և հռոմեացի զինվորներին պահակ կանգնեցնելով։

Կիրակի օրը վաղ առավոտյան Մարիամ Մագդաղենացին, Հակոբոսի մայր Մարիամը, Սաղոմեն, Հովհաննան և ուրիշ կանայք հոտավետ խոտեր են բերում գերեզման, որպեսզի Հիսուսի մարմինը օծեն։ Ճանապարհին նրանք ասում են իրար. «Գերեզմանի մուտքից քարը մեզ համար ո՞վ կգլորի»։ Բայց երբ տեղ են հասնում, տեսնում են, որ երկրաշարժ է եղել և Եհովայի հրեշտակը քարը մի կողմ է գլորել։ Պահապանները չկան, իսկ գերեզմանը դատարկ է։ Մատթեոս 27։57–28։2; Մարկոս 15։42–16։4; Ղուկաս 23։50–24։3, 10; Հովհաննես 19։14, 19։31–20։1; 12։42; Ղեւտացոց 23։5–7; Բ Օրինաց 21։22, 23; Սաղմոս 34։20; Զաքարիա 12։10։

▪ Ինչո՞ւ է ուրբաթ օրը կոչվում պատրաստության օր, և ի՞նչ է «մեծ» շաբաթը։

▪ Հիսուսի մարմնի վերաբերյալ ո՞ր գրություններն են կատարվում։

▪ Ովքե՞ր են Հովսեփն ու Նիկոդեմոսը, և ի՞նչ են նրանք անում Հիսուսին թաղելու համար։

▪ Քահանաները ի՞նչ են խնդրում Պիղատոսին, և ինչպե՞ս է նա պատասխանում։

▪ Ի՞նչ է պատահում կիրակի առավոտյան։