Ինչպե՞ս են ոմանք ստացել իրենց հարցերի պատասխանը

ՄԻԼԻՈՆԱՎՈՐ մարդիկ աղոթում են։ Ոմանք համոզված են, որ ստանում են իրենց աղոթքների պատասխանը։ Մյուսները կասկածում են այն հարցում, թե արդյոք իրենց աղոթքները երբևէ լսվում են։ Ուրիշներն էլ, թեև փնտրում են իրենց հարցերի պատասխանը, բայց չեն մտածում դրանք աղոթքի միջոցով ներկայացնել Աստծուն։

Աստվածաշունչը ճշմարիտ Աստծուն նկարագրում է որպես ‘աղոթք լսողի’ (Սաղմոս 65։2, Արևմտ. Աստ.)։ Եթե դուք աղոթում եք, համոզվա՞ծ եք, որ ձեր աղոթքներն ուղղված են ճշմարիտ Աստծուն։ Արդյո՞ք դրանք այնպիսի աղոթքներ են, որոնց նա կպատասխանի։

Աշխարհով մեկ բազմաթիվ մարդիկ պատասխանում են՝ այո՛։ Ինչպե՞ս են նրանք պատասխաններ ստացել։ Ի՞նչ են նրանք սովորել։

Աստված. ո՞վ է նա

Մի ուսուցչուհի, որն ապրում էր Պորտուգալիայում ու կրթություն էր ստացել միանձնուհիների և քահանաների մոտ, անկեղծորեն դավանում էր իր կրոնը։ Սակայն երբ իրեն իբրև կարևոր ներկայացված որոշ սովորույթներ փոփոխության ենթարկվեցին ու մերժվեցին եկեղեցու կողմից, նա ընկավ շփոթության մեջ։ Գնալով մեկ ուրիշ երկիր՝ ուսուցչուհին ծանոթացավ արևելյան կրոնների հետ։ Նրա մեջ հարց առաջացավ, թե արդյոք գոյություն ունի մեկ Աստված։ Ինչպե՞ս պետք է նա երկրպագություն մատուցի։ Երբ ուսուցչուհին Աստվածաշնչից հարցեր տվեց իրենց քահանային, այդ հարցերը մնացին անպատասխան, ու նա հիասթափություն ապրեց։

Այն քաղաքում, որտեղ ապրում էր ուսուցչուհին, կաթոլիկ եկեղեցին մի թերթիկ էր տարածել՝ զգուշացնելով իր այցելուներին չշփվել Եհովայի վկաների հետ։ Բայց նրա հարցերը դեռ մնում էին։ Մի օր, երբ Վկաները եկան թակեցին նրա դուռը, ուսուցչուհին լսեց նրանց։ Այն, ինչ նրանք ասացին, հետաքրքրեց իրեն։ Առաջին անգամ էր, որ այս կինը խոսում էր Վկաների հետ։

Իր բազմաթիվ հարցերի պատասխանը ստանալու համար ուսուցչուհին Վկաների հետ սկսեց Աստվածաշունչ ուսումնասիրել։ Ամեն շաբաթ հարցերի մի երկար շարան էր սպասում նրանց։ Այդ կինը ցանկանում էր իմանալ, թե ինչ է Աստծո անունը, արդյոք գոյություն ունի մեկ ճշմարիտ Աստված, հավանություն տալիս է նա երկրպագության մեջ պատկերների գործածությանը և այլն։ Նա տեսնում էր, որ բոլոր պատասխանները Աստվածաշնչից էին տրվում և ոչ թե անձնական կարծիքներ էին, և զարմանում ու հիանում էր այն ամենով, ինչ սովորում էր։ Աստիճանաբար ուսուցչուհին ստացավ իր բազմաթիվ հարցերի պատասխանները։ Այսօր նա երկրպագում է Եհովային ոգով և ճշմարտությամբ, ինչպես որ, ըստ Հիսուս Քրիստոսի խոսքերի, պետք է անեն «ճշմարիտ երկրպագողները» (Յովհաննէս 4։23)։

Շրի Լանկայում մի ընտանիքի անդամներ միասին կանոնավորաբար կարդում էին Աստվածաշունչը, բայց չէին ստանում իրենց համար կարևոր շատ հարցերի պատասխանները։ Քահանան չկարողացավ օգնել, թեպետ նրանք ունեին դրա կարիքը։ Բայց այս ընտանիքին այցելեցին Եհովայի վկաներ և թողեցին գրականություն, որ օգնում էր հասկանալ Աստվածաշունչը։ Ավելի ուշ, երբ Եհովայի վկաները գոհացուցիչ պատասխաններ տվեցին նրանց աստվածաշնչյան հարցերին, այդ ընտանիքը համաձայնվեց Աստվածաշունչ ուսումնասիրել։ Ուսուցման ընթացքում սովորածը շատ հետաքրքրեց նրանց։

Սակայն մանկության տարիներին եկեղեցում ստացած կրթության պատճառով կինը դժվարանում էր տեսնել, որ «ճշմարիտ Աստուած[ը]» Հիսուս Քրիստոսի Հայրն է, ինչպես որ Հիսուսն ինքն էր ասել (Յովհաննէս 17։1, 3)։ Նրան սովորեցրել էին, որ Հիսուսը հավասար է Հորը, և որ այդ «խորհուրդը» հարցականի տակ չի կարող դրվել։ Հուսահատ վիճակում կինը անկեղծորեն աղոթեց Եհովային՝ տալով նրա անունը, և խնդրեց, որ ցույց տա իրեն, թե ով է Հիսուսը։ Հետո նա նորից մանրամասն քննեց այդ հարցին վերաբերող աստվածաշնչյան համարները (Յովհաննէս 14։28; 17։21; Ա Կորնթացիս 8։5, 6)։ Ասես նրա աչքերը բացվեցին. նա պարզ հասկացավ, որ Եհովան՝ երկնքի ու երկրի Արարիչը և Հիսուսի Հայրը, ճշմարիտ Աստվածն է (Եսայիա 42։8; Երեմիա 10։10–12)։

Տառապանք. ինչո՞ւ

Հոբ անունով մի մարդ չափազանց ծանր տառապանքներ կրեց։ Փոթորիկի հետևանքով մահացան նրա բոլոր երեխաները։ Նա աղքատության հասավ։ Հոբը նաև տառապեց ծանր հիվանդությամբ և հանդուրժեց կեղծ ընկերների կողմից եկող ճնշումը։ Այդ ընթացքում նա որոշ անխոհեմ մտքեր արտահայտեց (Յոբ 6։3)։ Բայց Աստված հաշվի առավ Հոբի հանգամանքները (Յոբ 35։15, Արևմտ. Աստ.)։ Եհովան գիտեր նրա սրտում եղածը և հոգ տարավ, որ նա ստանար պետք եղած խորհուրդը։ Այսօր Եհովան նույն կերպ է վարվում մարդկանց հետ։

Կաստրուն, որ ապրում է Մոզամբիկում, ընդամենը տասը տարեկան հասակում կորցրեց իր մորը, և դա մեծ ցավ պատճառեց նրան։ «Ինչո՞ւ նա պետք է մահանար և հեռանար մեզանից»,— հարցնում էր նա։ Թեպետ Կաստրուն դաստիարակվել էր աստվածավախ ծնողների կողմից, նա տարակուսանքի մեջ էր։ Ի՞նչը կարող էր մխիթարել նրա սիրտն ու խաղաղեցնել նրա միտքը։ Կաստրուն մխիթարություն գտավ՝ կարդալով չիչևա լեզվով մի փոքրիկ Աստվածաշունչ և քննարկելով այն իր մեծ եղբայրների հետ։

Աստիճանաբար նա հասկացավ, որ իր մայրը մահացել է ոչ թե Աստծո անարդարության պատճառով, այլ ժառանգած անկատարության (Հռովմայեցիս 5։12; 6։23)։ Ամենաշատը նրան մխիթարեց հարության մասին Աստվածաշնչի խոստումը. նա համոզված է, որ կրկին կտեսնի իր մորը (Յովհաննէս 5։28, 29; Գործք 24։15)։ Ցավոք, ընդամենը չորս տարի անց մահացավ նրա հայրը։ Բայց այս անգամ Կաստրուն կարողացավ ավելի հեշտությամբ տանել կորուստը։ Այսօր նա, Եհովայի հանդեպ սիրով լցված, հավատարմորեն նվիրել է իր կյանքը Աստծուն ծառայելուն։ Բոլոր նրանք, ովքեր գիտեն Կաստրուին, պարզ տեսնում են այն ուրախությունը, որ նա գտել է։

Շատ մարդիկ, որ կորցրել են իրենց սիրելիներին, մխիթարվում են այն նույն աստվածաշնչյան ճշմարտություններով, որոնք որ սփոփել են Կաստրուին։ Ոմանք, ովքեր մեծ զրկանքներ են կրել չարագործների պատճառով, Հոբի նման հարց են տալիս. «Ի՞նչու են ապրում ամբարիշտները» (Յոբ 21։7)։ Երբ մարդիկ իսկապես լսում են՝ ինչ է Աստված ասում իր Խոսքի միջոցով, նրանք տեսնում են, որ այն, թե ինչպես է Աստված առաջարկում լուծել խնդիրները, իրականում իրենց օգտի համար է (Բ Պետրոս 3։9)։

Բարբարան, որ մեծացել է Միացյալ Նահանգներում, անձամբ չի զգացել պատերազմի սարսափները։ Բայց դա այն ժամանակաշրջանն էր, երբ աշխարհը պատերազմի մեջ էր։ Թերթերում ամեն օր տեղեկություններ էին տպագրվում պատերազմի ժամանակ տեղի ունեցող դաժանությունների մասին։ Դպրոցում սովորելու տարիներին նրան տարակուսանքի մեջ էր գցում պատմական դեպքերին ծանոթանալը. դրանք, կարծես, տեղի էին ունենում անկանխատեսելի ձևով։ Ի՞նչն էր դրա պատճառը։ Արդյո՞ք Աստված հետաքրքրվում էր տեղի ունեցածով։ Բարբարան հավատում էր, որ Աստված գոյություն ունի, բայց նրա հետ կապված հակասական զգացումներ ուներ։

Կյանքի հանդեպ Բարբարայի տեսակետը աստիճանաբար փոխվեց Եհովայի վկաների հետ ընկերակցելու շնորհիվ։ Նա լսեց Վկաներին և սկսեց Աստվածաշունչ ուսումնասիրել։ Բարբարան այցելեց Թագավորության սրահում տեղի ունեցող հանդիպումները, նույնիսկ ներկա եղավ Վկաների մեծ համաժողովներից մեկին։ Բացի այդ, երբ նա հարցեր էր տալիս, նկատում էր, որ Վկաները չէին արտահայտում տարբեր կարծիքներ։ Ընդհակառակը՝ նրանց խոսքերը ներդաշնակ էին, քանի որ Վկաների տեսակետը հիմնված էր Աստվածաշնչի վրա։

Վկաները ուշադրություն հրավիրեցին աստվածաշնչյան այն փաստի վրա, որ աշխարհը Բանսարկու Սատանայի՝ աշխարհի իշխանի ազդեցության տակ է և արտացոլում է նրա ոգին (Յովհաննէս 14։30; Բ Կորնթացիս 4։4; Եփեսացիս 2։1–3; Ա Յովհաննէս 5։19)։ Նրանք բացատրեցին, որ Բարբարային տարակուսանքի մեջ գցող իրադարձությունները նախագուշակված են եղել Աստվածաշնչում (Դանիէլ, գլուխ 2, 7 և 8)։ Աստված նախապես ասել էր դրանց մասին, քանի որ նա կարողանում է տեսնել ապագան, երբ որ ցանկանում է։ Այդ իրադարձություններից մի քանիսը տեղի էին ունեցել Աստծո նախաձեռնությամբ։ Մյուսները նա պարզապես թույլատրել էր։ Վկաները ցույց տվեցին, որ Աստվածաշունչը նախագուշակել է մեր օրերի թե՛ լավ, թե՛ վատ իրադարձությունները, նաև բացատրել է դրանց նշանակությունը (Մատթէոս 24։3–14)։ Նրանք ցույց տվեցին, թե ինչ է խոստանում Աստվածաշունչը նոր աշխարհի մասին, որտեղ արդարություն պիտի տիրի, իսկ տառապանքը պիտի անցնի անցյալի գիրկը (Բ Պետրոս 3։13; Յայտնութիւն 21։3, 4)։

Աստիճանաբար Բարբարան սկսեց հասկանալ, որ Եհովան պատասխանատու չէ մարդկանց տառապանքի համար, բայց նա չի կանխում դա՝ ստիպելով մարդկանց ենթարկվել իր պատվիրաններին, երբ վերջիններս որոշում են այլ կերպ վարվել (Բ Օրինաց 30։19, 20)։ Աստված միջոցներ է ձեռնարկել, որոնց շնորհիվ մենք կարող ենք հավիտյան երջանիկ ապրել։ Այժմ նա մեզ հնարավորություն է տալիս ցույց տալու, թե արդյոք կապրենք իր արդար ճանապարհների համաձայն (Յայտնութիւն 14։6, 7)։ Բարբարան վճռեց սովորել Աստծո պահանջները և ապրել դրանց համապատասխան։ Նաև Եհովայի վկաների մեջ նա գտավ այն սերը, որ Հիսուսի խոսքերի համաձայն, պիտի բնորոշեր իր ճշմարիտ հետևորդներին (Յովհաննէս 13։34, 35)։

Դուք նույնպես կարող եք օգուտներ քաղել այն ամենից, ինչը օգնեց Բարբարային։

Կյանք, որ իմաստ ունի

Նույնիսկ այնպիսի մարդիկ, ում կյանքը թվում է, թե հաջողվել է, փորձում են գտնել իրենց մտահոգող հարցերի պատասխանները։ Օրինակ՝ բրիտանացի մի երիտասարդ, որի անունը Մեթյու է, միշտ փափագել էր գտնել ճշմարիտ Աստծուն և հասկանալ կյանքի իմաստը։ Երբ Մեթյուն 17 տարեկան էր, նրա հայրը մահացավ։ Դրանից հետո նա երաժշտության գծով համալսարանական կրթություն ստացավ։ Ժամանակի ընթացքում նա ավելի ու ավելի զգաց իր վարած նյութապաշտական կյանքի դատարկությունը։ Մեթյուն տեղափոխվեց Լոնդոն։ Այնտեղ նա սկսեց թմրադեղեր ընդունել, գիշերային ակումբներ այցելել, աստղագուշակությամբ և ոգեհարցությամբ զբաղվել։ Նաև տարվեց ձեն–​բուդդայականությամբ և այլ փիլիսոփայություններով։ Այս ամենը նա անում էր կյանքում բավարարվածություն գտնելու համար։ Հուսահատվելով՝ նա աղաչեց Աստծուն օգնել իրեն գտնելու ճշմարտությունը։

Երկու օր անց Մեթյուն հանդիպեց իր հին ընկերներից մեկին ու պատմեց նրան իր դժվար վիճակի մասին։ Այս մարդը Աստվածաշունչ էր ուսումնասիրել Եհովայի վկաների հետ։ Երբ նա Մեթյուին ցույց տվեց Բ Տիմոթեոս 3։1–5 խոսքերը, վերջինս ապշեց, թե որքան ճիշտ է Աստվածաշունչը նկարագրում մեզ շրջապատող աշխարհը։ Երբ Մեթյուն կարդաց Լեռան քարոզը, այդ խոսքերը հասան նրա սրտին (Մատթէոս 5–7 գլուխները)։ Սկզբում նա տատանվում էր, որովհետև Եհովայի վկաներին քննադատող որոշ նյութեր էր կարդացել, բայց վերջիվերջո որոշեց հաճախել մոտակա Թագավորության սրահում անցկացվող հանդիպումներին։

Մեթյուին դուր եկավ այն, ինչ լսեց, ու նա սկսեց Աստվածաշունչ ուսումնասիրել ժողովի երեցներից մեկի հետ։ Կարճ ժամանակ անց Մեթյուն հասկացավ, որ սովորում է այն, ինչ փնտրել էր. դա իր աղոթքի պատասխանն էր։ Եհովային տհաճություն պատճառող սովորություններին վերջ տալով՝ Մեթյուն օգուտներ քաղեց։ Եհովայի հանդեպ առողջ վախ զարգացնելը մղեց նրան համապատասխանեցնելու իր կյանքը Աստծո պատվիրաններին։ Մեթյուն հասկացավ, որ այսպիսի կյանքը ունի իրական իմաստ (Ժողովող 12։13)։

Այն, որ Մեթյուն և այս հոդվածում հիշատակված մյուս մարդիկ գտան բավարարվածություն պատճառող կյանքի ուղին, նախասահմանված չէր։ Պարզապես նրանք սովորեցին, որ Եհովա Աստված սիրուց թելադրված նպատակ ունի, որ վերաբերում է բոլոր նրանց, ովքեր ուրախությամբ ընտրում են իր պատվիրաններին հնազանդվելը (Գործք 10։34, 35)։ Այդ նպատակը իր մեջ ներառում է հավիտենական կյանք՝ պատերազմից, հիվանդությունից, սովից, նույնիսկ մահից զերծ աշխարհում (Եսայիա 2։4; 25։6–8; 33։24; Յովհաննէս 3։16)։ Դուք հենց դա՞ եք ուզում։ Եթե այո, ապա կարող եք ավելի շատ բան սովորել գոհունակություն պատճառող կյանքի բանալին գտնելու մասին։ Դա կարող եք անել՝ հաճախելով Եհովայի վկաների Թագավորության սրահում տեղի ունեցող հանդիպումներին, որոնց ժամանակ Աստվածաշնչի վրա հիմնված ծրագիր է անցկացվում։ Դուք սրտանց հրավիրվում եք այդպես անելու։

[նկար 7–րդ էջի վրա]

Ջերմեռանդորեն աղոթեք Աստծուն՝ օգտագործելով նրա անունը

[նկար 7–րդ էջի վրա]

Աստվածաշունչ ուսումնասիրեք նրանց հետ, ովքեր իսկապես սովորեցնում են նրանում գրվածը

[նկարներ 7–րդ էջի վրա]

Հաճախեք Թագավորության սրահում անցկացվող հանդիպումներին

[նկար 4–րդ էջի վրա. թույլտվությամբ]

Hiker: Chad Ehlers/Index Stock Photography