Պատմում են թագավորության քարոզիչները

Համբերատարության ու հաստատակամության ուրախալի արդյունքները

ՀԻՍՈՒՍ ՔՐԻՍՏՈՍԸ կանխագուշակեց, որ վերջին օրերում «շատերի սէրը կ’սառչի»։ Ի կատարումն այս խոսքերի՝ այսօր աշխարհի շատ ծայրերում սովորաբար մարդիկ անտարբեր են Թագավորության բարի լուրի հանդեպ։ Շատերը նույնիսկ արհամարհանքով են վերաբերվում կրոնին (Մատթէոս 24։12, 14)։

Այնուհանդերձ, Թագավորության քարոզիչները, հավատ և համբերություն դրսևորելով, հաջողությամբ դիմագրավում են դժվարությունները, ինչպես որ ցույց է տալիս Չեխիայի Հանրապետությունում տեղի ունեցած հետևյալ դեպքը։

Երկու Վկաներ փակ դռան ետևից զրուցեցին մի կնոջ հետ։ Քիչ անց կինը զգուշությամբ բացեց դուռը, մեկնեց ձեռքը և արագորեն վերցրեց «Դիտարան» ու «Արթնացեք» պարբերագրերը, որ առաջարկում էին Վկաները։ Նա շնորհակալություն հայտնեց և դուռը փակեց։ Վկաները տարակուսանքի մեջ էին. «Արժե՞ նորից գալ»։ Նրանցից մեկը, որ ռահվիրա էր՝ լիաժամ ծառայող, որոշեց այնուամենայնիվ վերայցելել, բայց նույն պատմությունը կրկնվեց. և այսպես՝ մի տարի շարունակ։

Վճռելով փոխել իր մոտեցումը՝ ռահվիրան Եհովայից աղոթքով օգնություն խնդրեց։ Հաջորդ անգամ պարբերագրեր առաջարկելիս նա կնոջը մտերմորեն հարցրեց. «Ինչպե՞ս եք։ Պարբերագրերը ձեզ դուր եկա՞ն»։ Ոչ մի արձագանք չեղավ, բայց մի քանի այցելություններից հետո կինը բարյացակամ դարձավ։ Մի անգամ նա դուռը լայն բացեց, թեև խոսակցությունը կարճ տևեց։

Տեսնելով, որ կինը տրամադրված չէ դռան մոտ զրուցելու՝ ռահվիրան որոշեց նրան մի նամակ գրել՝ բացատրելով իր այցելությունների նպատակը և առաջարկելով Աստվածաշնչի ուսումնասիրություն։ Տարի ու կես տևած համբերատար ջանքերի շնորհիվ ի վերջո ռահվիրային հաջողվեց Աստվածաշնչի ուսումնասիրություն սկսել տանտիրուհու հետ։ Ռահվիրան զարմացավ, բայց նաև քաջալերվեց, երբ կինը հետագայում ասաց. «Ես սկսել եմ հավատալ Աստծուն այն օրվանից, երբ դուք ինձ սկսեցիք պարբերագրեր բերել»։

Իրոք որ, համբերատարությունն ու հաստատակամությունը կարող են ուրախալի արդյունքներ բերել Թագավորությունը քարոզելու և աշակերտներ պատրաստելու գործում (Մատթէոս 28։19, 20)։