«Իմ օգնութիւնը Տէրիցն է»

Երբ ալևորությունը դառնում է «փառաց պսակ»

«ԿՅԱՆՔԻ լավագույն ուղի» (Մյուրիել, 101 տարեկան)։ «Յուրահատուկ առանձնաշնորհում» (Թեոդորոս, 70 տարեկան)։ «Ավելի լավ կյանք չեմ պատկերացնում» (Մարիա, 73 տարեկան)։ Այս բոլոր անհատները իրենց կյանքն անցկացրել են՝ ծառայելով Եհովա Աստծուն։

Եհովայի երկրպագուների թվում շատ կան այսպիսի եռանդուն տարեցներ։ Չնայած տարիքին, առողջական խնդիրներին և այլ անբարենպաստ հանգամանքներին՝ նրանք ամբողջ սրտով ծառայում են Աստծուն։ Քրիստոնեական ժողովում այսպիսի հավատարիմ մեծահասակներին հարգում և ընդօրինակում են Աստծո հանդեպ իրենց նվիրվածության համար։ Եհովան բարձր է գնահատում տարեցների ծառայությունը, թեև հանգամանքների բերումով նրանք գուցե շատ բան չեն կարող անելa (Բ Կորնթացիս 8։12)։

«Սաղմոսներ» գրքում ցույց է տրվում, թե ինչպիսին կարող է լինել հավատարիմ տարեցների կյանքը։ Նրանք նման են հինավուրց և հսկա մի ծառի, որը շարունակում է պտուղներ բերել։ Հավատարիմ տարեց անհատների մասին սաղմոսերգուն գրեց. «Ծերութեան մէջ էլ պտուղ կ’բերեն. պարարտ եւ դալար կ’լինին» (Սաղմոս 92։14)։

Ոմանց գուցե վախ ներշնչի այն միտքը, թե լքված և արհամարհված կլինեն, երբ տարիքի պատճառով այլևս չունենան նախկին կայտառությունը։ Դավիթն աղերսեց Աստծուն. «Իմ ծերութեան ժամանակումը դէն մի գցիր ինձ. զօրութիւնս պակասուելիս մի թողիր ինձ» (Սաղմոս 71։9)։ Ի՞նչն է որոշիչ դեր խաղում այն հարցում՝ մարդը տարեց հասակում կթառամի՞, թե՞ կծաղկի։ Աստվածահաճո արդարություն դրսևորելը։ «Արդարը արմաւենիի պէս կ’բուսնի»,— գրեց սաղմոսերգուն (Սաղմոս 92։12)։

Նրանք, ովքեր իրենց կյանքն անցկացրել են՝ հավատարմորեն ծառայելով Եհովային, սովորաբար պտուղներ են բերում նաև տարեց հասակում։ Իրականում, այն բազմաթիվ սերմերը, որ նրանք ցանել են իրենց կամ ուրիշների մեջ, ծիլ են տալիս, աճում են և առատորեն բերում բարի պտուղներ (Գաղատացիս 6։7–10; Կողոսացիս 1։10)։ Իհարկե, այն մարդիկ, ովքեր կյանքում եսասիրական նպատակներ են հետապնդել՝ ցույց տալով, որ արհամարհում են Աստծո ճանապարհները, սովորաբար տարեց հասակում այնքան էլ արժեքավոր պտուղներ չեն բերում։

Այն, որ արդարությունը զարդ է ծերերի համար, փաստում է նաև «Առակաց» գիրքը։ Այնտեղ կարդում ենք. «Փառաց պսակ է ալեւորութիւնը. [«եթէ», ԱԱ] արդարութեան ճանապարհում կ’գտնուի» (Առակաց 16։31)։ Այո՛, արդարությունը ներքին գեղեցկության արտացոլումն է։ Տարիներ շարունակ արդար կյանքով ապրելը մարդուն հարգանքի է արժանացնում (Ղեւտացոց 19։32)։ Շատերը պատվում են սպիտակ մազերի տեր անհատին, եթե նա իմաստուն է և առաքինի (Յոբ 12։12)։

Եհովային շատ հաճելի է ծառայության մեջ անցկացված արդար կյանքը։ Գրություններում ասվում է. «Մինչեւ ձեր ծերութիւնը ես [Եհովան] նոյնն եմ, մինչեւ ձեր ալեւորութիւնը ես ձեզ պիտի կրեմ. ե՛ս ստեղծեցի ու ե՛ս պիտի վերցնեմ, ե՛ս պիտի կրեմ ու պիտի ազատեմ» (Եսայիա 46։4, ԱԱ)։ Որքա՜ն մխիթարական է իմանալ, որ մեր սիրառատ երկնային Հայրը խոստանում է թիկունք կանգնել և աջակցել նվիրված, հավատարիմ անհատներին նրանց տարեց հասակում (Սաղմոս 48։14)։

Եթե Աստծուն հաճելի է ծառայության մեջ հավատարմորեն անցկացված կյանքը, արդյոք այն արժանի չէ՞ նաև մեր հարգանքին։ Բարձր գնահատելով մեր տարեց հավատակիցներին՝ մենք արտացոլում ենք Աստծո տեսակետը (Ա Տիմոթէոս 5։1, 2)։ Ուրեմն եկեք մեծահասակների հանդեպ գործնականում քրիստոնեական սեր ցուցաբերելու առիթներ փնտրենք։

Երբ արդարության ճանապարհին կանգնում են տարեց հասակում

«Արդարութեան ճանապարհումը կեանք կայ»,— վստահեցնում է Սողոմոնը (Առակաց 12։28)։ Տարիքը խոչընդոտ չէ այս ճանապարհի վրա կյանքի ուշ տարիներին կանգնելու։ Օրինակ՝ Մոլդովայում 99–ամյա մի մարդ իր երիտասարդությունը նվիրել էր կոմունիստական գաղափարներն առաջ տանելու գործին։ Նա հպարտ էր, որ մի քանի անգամ անձամբ զրուցել էր կոմունիզմի հայտնի առաջնորդների հետ, ինչպիսին էր, օրինակ, Վ. Ի.Լենինը։ Սակայն կոմունիզմի անկումից հետո այս մարդը կորցրել էր իր կյանքի իմաստը։ Բայց երբ Եհովայի վկաները նրան ցույց տվեցին, որ մարդկության խնդիրների միակ իրական լուծումը Աստծո Թագավորությունն է, նա ընդունեց աստվածաշնչյան ճշմարտությունը և սկսեց ջանասիրաբար ուսումնասիրել Գրությունները։ Միայն մահը նրան խանգարեց դառնալ Եհովայի մկրտված ծառաներից մեկը։

Սովորելով Աստծո սահմանած բարոյական չափանիշների մասին՝ Հունգարիայում ապրող 81–ամյա մի կին հասկացավ, որ պետք է օրինականացնի իր ամուսնությունը։ Արդեն մի քանի տարի նա ապրում էր մեկի հետ, որն իր ամուսինը չէր։ Կինը հավաքեց իր ողջ քաջությունը և այդ տղամարդուն բացատրեց Աստվածաշնչի վրա հիմնված իր տեսակետը։ Ի ուրախություն նրա՝ այդ մարդը համաձայնվեց ամուսնանալ։ Երբ նրանց միությունը օրինականացվեց, կինը արագորեն հոգևոր քայլեր կատարեց։ Աստվածաշնչի ուսումնասիրությունը սկսելուց ընդամենը ութ ամիս անց նա դարձավ չմկրտված քարոզիչ և շուտով մկրտվեց։ Որքա՜ն ճշմարիտ է, որ արդարությունը կարող է զարդարել ծերերին իսկական գեղեցկությամբ։

Հավատարիմ տարեց քրիստոնյաները կարող են վստահ լինել, որ Աստված հետաքրքրվում է նրանցով։ Եհովան երբեք չի լքի այն մարդկանց, ովքեր նվիրվածություն են դրսևորում իր հանդեպ։ Ընդհակառակը՝ նա խոստանում է առաջնորդել, աջակցել և թիկունք կանգնել նրանց նաև տարեց հասակում։ Ուստի մեծահասակները կարող են հաստատել սաղմոսերգուի խոսքերի ճշմարտացիությանը. «Իմ օգնութիւնը Տէրիցն է» (Սաղմոս 121։2)։

[ծանոթագրություն]

[նկար 9–րդ էջի վրա]

«Փառաց պսակ է ալեւորութիւնը. [«եթէ», ԱԱ] արդարութեան ճանապարհում կ’գտնուի» (Առակաց 16։31)

[շրջանակ 8–րդ էջի վրա]

Եհովան հոգ է տանում իր տարեց ծառաներին

«Մազը սպիտակածի առաջին վեր կաց, եւ ծերին պատուիր» (Ղեւտացոց 19։32)։

«Մինչև ձեր ծերութիւնը ես նոյնն եմ, մինչեւ ձեր ալեւորութիւնը ես ձեզ պիտի կրեմ» (Եսայիա 46։4, ԱԱ)։