Մոտեցեք Աստծուն
Կարո՞ղ է որևէ բան «բաժանել մեզ Աստծու սիրուց»
ՄԵԶՆԻՑ ո՞վ չի ցանկանում սիրված լինել։ Ինչ խոսք, անչափ լավ ենք զգում մեզ, երբ մեր ընտանիքի անդամներն ու ընկերները սեր են դրսևորում մեր հանդեպ։ Ցավալի է, բայց մարդկային փոխհարաբերությունները կարող են հեշտությամբ խզվել և թուլանալ ժամանակի ընթացքում։ Սիրելի մարդիկ կարող են ցավ պատճառել մեզ, լքել կամ նույնիսկ հրաժարվել մեզնից։ Մինչդեռ կա մեկը, ում սերը մնայուն է։ Սերը, որը Եհովան ունի իր ծառաների հանդեպ, անչափ գեղեցիկ կերպով նկարագրվում է Հռոմեացիներ 8։38, 39 համարներում։
Պողոս առաքյալն ասում է. «Ես համոզված եմ»։ Ինչո՞ւմ է համոզված։ Որ ոչինչ չի կարող «բաժանել մեզ Աստծու սիրուց»։ Պողոսը միայն իր մասին չէր խոսում։ Նա ասաց՝ «մեզ»՝ նկատի ունենալով բոլոր նրանց, ովքեր հավատարմորեն ծառայում են Աստծուն։ Այս միտքն ընդգծելու նպատակով՝ նա թվարկում է մի շարք բաներ, որոնք չեն կարող խանգարել Եհովային սիրել իր անձնվեր ծառաներին։
«Ո՛չ մահը, ո՛չ կյանքը»։ Եհովան չի դադարում իր ծառաներին սիրելուց, երբ նրանք մահանում են։ Որպես իր սիրո ապացույց՝ նա այդ անհատներին պահում է իր հիշողության մեջ։ Աստված հարություն կտա նրանց գալիք արդար նոր աշխարհում (Հովհաննես 5։28, 29; Հայտնություն 21։3, 4)։ Այս համակարգում նրա սերը դարձյալ անփոփոխ է մնում՝ անկախ այն բանից, թե ինչ կպատահի իր հավատարիմ երկրպագուների հետ։
«Ո՛չ հրեշտակները, ո՛չ կառավարությունները»։ Մարդիկ հեշտությամբ ընկնում են հզոր անհատների և իշխանավորների ազդեցության տակ, սակայն դա այդպես չէ Եհովայի պարագայում։ Հզոր ոգեղեն արարածները, ինչպիսին Սատանա դարձած հրեշտակն է, չեն կարող ազդեցություն բանեցնել Աստծու վրա, որպեսզի նա դադարի իր երկրպագուներին սիրելուց (Հայտնություն 12։10)։ Նույնիսկ կառավարությունները, որոնք գուցե հակառակվում են ճշմարիտ քրիստոնյաներին, չեն կարող փոխել Աստծու տեսակետը իր ծառաների հանդեպ (1 Կորնթացիներ 4։13)։
«Ո՛չ ներկայիս բաները, ո՛չ գալիք բաները»։ Աստծու սերը չի թուլանում ժամանակի ընթացքում։ Ո՛չ հիմա, ո՛չ էլ ապագայում չի կարող այնպիսի բան պատահել իր ծառաների հետ, ինչի պատճառով Աստված այլևս չի սիրի նրանց։
«Ո՛չ զորությունները»։ Պողոսը մինչ այս հիշատակեց երկնային և երկրային ուժերի մասին՝ «հրեշտակների» և «կառավարությունների», իսկ հետո նշեց «զորությունների» մասին։ Այստեղ օգտագործված հունարեն բառը լայն իմաստ ունի։ Թեև մեզ հայտնի չէ այդ բառի ճշգրիտ իմաստը, մի բան հստակ է. ոչ մի զորություն՝ երկնքում թե երկրի վրա, հետ չի պահի Եհովային իր ծառաներին սիրելուց։
«Ո՛չ բարձրությունը, ո՛չ խորությունը»։ Եհովան սիրում է իր ժողովրդին՝ անկախ այն բանից, թե իր ծառաները ինչ հանգամանքներում կամ վիճակում են գտնվում՝ լավ թե վատ, այսպես ասած՝ «բարձր» թե «ցածր»։
«Ո՛չ էլ որևէ այլ ստեղծագործություն»։ Այս խոսքերը վերաբերում են բոլոր ստեղծագործություններին, և Պողոսն ուզում էր ասել, որ բացարձակապես ոչինչ չի կարող խանգարել Եհովային սիրել իր նվիրված ծառաներին։
Ի տարբերություն մարդկանց սիրո, որը կարող է փոխվել կամ թուլանալ՝ Աստծու սերը հավերժ է. այն անփոփոխ է նրանց հանդեպ, ովքեր հավատ են դրսևորում իր նկատմամբ։ Այս ամենի գիտակցումը մղում է մեզ մոտենալու Եհովային և մեր լավագույնն անելու, որպեսզի ապացուցենք, որ սիրում ենք նրան։