Ընտանեկան երկրպագությունը կարևոր է փրկության համար
ՊԱՏԿԵՐԱՑՆՈ՞ՒՄ ես, թե ինչ սարսափազդու է լինելու «Ամենակարող Աստծու մեծ օրվա պատերազմը» (Հայտն. 16։14)։ Միքիա մարգարեն պատկերավոր լեզվով նկարագրում է այն՝ ասելով. «Սարերը պիտի հալվեն.... և հովիտները պիտի ճեղքվեն ինչպես մոմ կրակի առաջին, ինչպես ջուր որ իջնում է զառիվայրից» (Միք. 1։4)։ Աստծու Խոսքը տեղեկացնում է, թե ինչ վախճան է սպասում նրանց, ովքեր չեն ծառայում Եհովային. «Տիրոջ սպանվածներն այն օրը երկրի մեկ ծայրից մինչև երկրի մյուս ծայրը կլինեն» (Երեմ. 25։33)։
Այս նախազգուշացումները նկատի ունենալով՝ ընտանիքի գլուխները, այդ թվում միայնակ ծնողները, պետք է խորհեն իրենց երեխաների մասին, ովքեր բավականաչափ մեծ են, որպեսզի անձնական որոշումներ կայացնեն. «Կվերապրե՞ն արդյոք երեխաներս Արմագեդոնը»։ Աստվածաշունչը հստակորեն ցույց է տալիս, որ նրանք կարող են վերապրել, եթե հոգևորապես առողջ և ուժեղ լինեն (Մատթ. 24։21)։
Ընտանեկան երկրպագություն ունենալու կարևորությունը
Ջանք մի խնայեք երեխաներին դաստիարակելու «Եհովայի խրատով և նրա մտածելակերպը նրանց մեջ սերմանելով» (Եփես. 6։4)։ Երեխաների հետ Աստվածաշունչ ուսումնասիրելն անչափ կարևոր է։ Մենք ուզում ենք, որ մեր երեխաները նմանվեն Փիլիպպեի քրիստոնյաներին, որոնց Պողոսը գովեց Եհովայի հանդեպ իրենց հնազանդության համար։ Նա գրեց. «Սիրելինե՛րս, ինչպես որ միշտ հնազանդվել եք ոչ միայն իմ ներկայության ժամանակ, այլև ավելի մեծ պատրաստակամությամբ հիմա՝ իմ բացակայության ժամանակ, շարունակեք ձգտել վախով ու դողով հասնելու ձեր սեփական փրկությանը» (Փիլիպ. 2։12)։
Ձեր երեխաները պահո՞ւմ են Եհովայի օրենքները, երբ նրանց կողքին չեք։ Ինչպե՞ս են նրանք իրենց դրսևորում, օրինակ, դպրոցում։ Ինչպե՞ս կարող եք օգնել նրանց վստահելու Եհովայի իմաստուն օրենքներին, որպեսզի նրանք առաջնորդվեն դրանցով նույնիսկ ձեր բացակայության ժամանակ։
Այս հարցում անփոխարինելի դեր է խաղում ընտանեկան երկրպագությունը, որի շնորհիվ կարող եք կերտել երեխայի հավատը։ Ուստի եկեք քննենք երեք կարևոր միջոցներ, որոնք կօգնեն ձեզ հաջողությամբ անցկացնելու ընտանեկան ուսումնասիրությունը։
Հետևողական եղեք
Աստվածաշնչից երևում է, որ Աստծու երկնային որդիները ներկայանում էին Եհովայի առաջ նշանակված օրերին (Յոբ 1։6)։ Նույնն արեք և դուք։ Օր և ժամ նշանակեք և հետևեք այդ գրաֆիկին։ Որոշեք ևս մեկ՝ հավելյալ օր, եթե չնախատեսված դեպքեր լինեն և նշանակված օրը հնարավոր չլինի անցկացնել ընտանեկան երկրպագությունը։
Զգուշացեք, որ ժամանակի ընթացքում ընտանեկան ուսումնասիրությունը չթողնեք ինքնահոսի՝ սկսելով անկանոն անցկացնել այն։ Հիշե՛ք՝ ամենակարևոր Աստվածաշունչ ուսումնասիրողները ձեր երեխաներն են։ Երբեք մի՛ մոռացեք նաև, որ Սատանան փափագում է նրանց իր զոհը դարձնել (1 Պետ. 5։8)։ Եթե ընտանեկան ուսումնասիրության համար նախատեսված երեկոն օգտագործեք հեռուստացույց դիտելու կամ մեկ այլ պակաս կարևոր գործով զբաղվելու համար, ուրեմն իմացեք՝ Սատանան հաղթանակ է տարել (Եփես. 5։15, 16; 6։12; Փիլիպ. 1։10)։
Գործնական դարձրեք այն
Ընտանեկան երկրպագության ժամանակ երեխան չպետք է լոկ գիտելիքներ ստանա։ Նա պետք է սովորի, թե ինչպես կիրառել դրանք։ Ուստի ժամանակ առ ժամանակ ընտրեք թեմաներ այն իրավիճակների վերաբերյալ, որոնց երեխան կբախվի օրեր կամ շաբաթներ անց։ Օրինակ՝ կարող եք նախապատրաստվել քարոզչական ծառայությանը։ Երեխաները հաճույքով են անում այն, ինչ կարողանում են լավ անել։ Մատուցումները կրկնելով և քննարկելով, թե ինչպես հաղթահարել տարբեր առարկություններ՝ երեխաները կկարողանան ավելի համարձակորեն մասնակցել ծառայության տարբեր ձևերին (2 Տիմոթ. 2։15)։
Կարելի է նաև ընդգրկել ցուցադրումներ, որոնց ժամանակ երեխաները կսովորեն՝ ինչպես դիմակայել հասակակիցների ճնշմանը։ Սովորեցրեք նրանց սեփական բառերով պատասխաններ տալ։ Դա կարելի է անել, օրինակ, այսպիսի հարցեր տալով. «Ի՞նչ դժվարությունների ես բախվում, որտե՞ղ է դա պատահում, ի՞նչ կլինի, եթե հանձնվես, ի՞նչ կլինի, եթե դիմակայես»։ Ժամանակ առ ժամանակ կրկնեք պատասխանները։
Ընտանեկան երկրպագությունը լավ առիթ է երեխաների հետ հոգևոր նպատակների մասին խոսելու համար։ Այս առումով հիանալի մտքեր կարելի է գտնել «Երիտասարդնե՛ր, ինչպե՞ս եք օգտագործելու ձեր կյանքի տարիները» թերթիկում։ Այն քննարկելիս օգնեք ձեր երեխային հասկանալու, որ Եհովային ծառայելը կյանքի լավագույն ուղին է։
Սակայն հարկավոր է զգույշ լինել. որոշ ծնողներ այնքան են կենտրոնանում այն բանի վրա, թե ինչպիսին են ուզում, որ իրենց երեխաները լինեն ապագայում, որ մոռանում են գովել նրանց այսօր։ Անկասկած, լավ է քաջալերել երեխաներին նպատակ դնել ծառայելու Բեթելում կամ դառնալու միսիոներ։ Սակայն զգույշ եղեք, որ «չբարկացնեք» նրանց ձեր սպասելիքներով և «չվհատեցնեք» նրանց (Կող. 3։21)։ Միշտ հիշե՛ք՝ ձեր որդին կամ դուստրը պետք է սիրի Եհովային ի՛ր ամբողջ սրտով և ոչ թե ձեր (Մատթ. 22։37)։ Ուստի գովեք երեխային այն լավ բաների համար, որ նա անում է, և մի՛ կենտրոնացեք այն բաների վրա, որոնք նա չի անում։ Գովելու առիթներ փնտրեք և մի բարկացեք, երբ նկատում եք, որ նա ինչ–որ բան դեռ չի անում։ Օգնեք երեխային երախտագիտություն զարգացնելու Եհովայի գործերի հանդեպ և թույլ տվեք, որ նրա սիրտն արձագանքի։
Հաճելի դարձրեք այն
Երրորդ միջոցը. ընտանեկան երկրպագությունը հաճելի դարձրեք։ Ինչպե՞ս կարող եք դա անել։ Երբեմն գուցե լսեք Եհովայի վկաների կողմից թողարկված որևէ դրամայի ձայնագրություն կամ դիտեք ու քննարկեք որևէ տեսաերիզ։ Գուցե դերերով կարդաք որևէ հատված Աստվածաշնչից։
«Դիտարան» և «Արթնացե՛ք» պարբերագրերում նույնպես կան հետաքրքիր հոդվածներ, որոնք կարելի է ուսումնասիրել ընտանեկան երկրպագության ժամանակ։ Օրինակ՝ կարող եք օգտվել «Արթնացե՛ք»–ի 31–րդ էջի «Ինչպե՞ս կպատասխանեք» խորագրի նյութերից։ Կամ՝ «Դիտարանի» ընդհանուր թողարկումից, որում հաջորդաբար տպագրվում են «Մեր պատանի ընթերցողների համար» և «Սովորեցրեք ձեր երեխաներին» խորագրերով հետաքրքիր հոդվածներ։
«Արթնացե՛ք» պարբերագրի՝ «Երիտասարդները հարցնում են» խորագրի տակ տեղ գտած հոդվածները կհետաքրքրեն այն ծնողներին, ովքեր ունեն պատանի երեխաներ։ Օգտակար կլինի նաև քննարկել «Մտածիր» շրջանակը։
Զգույշ եղեք, որ ընտանեկան երկրպագությունը չվերածեք հարցաքննության։ Օրինակ՝ կարող եք հորդորել երեխաներին օրագիր ունենալու, որպեսզի գրեն իրենց անձնական մտքերը։ Նրանք թերևս գրեն, թե ինչպես են պատրաստվում կիրառել ընտանեկան երկրպագության ժամանակ քննարկված նյութը։ Սակայն մի ստիպեք երեխաներին բարձրաձայն կարդալու իրենց գրածը։ Այլապես նրանք կարող են վհատվել և չգրել անկեղծորեն։ Հնարավորություն տվեք նրանց ունենալու իրենց փոքրիկ գաղտնիքները։
Եթե անցկացնեք ընտանեկան երկրպագությունը հետևողականորեն, դարձնեք այն գործնական ու հաճելի, Եհովան առատապես կօրհնի ձեր ջանքերը։ Դրա շնորհիվ ձեր ընտանիքի անդամները կլինեն հոգևորապես արթուն և ուժեղ։
[շրջանակ 31–րդ էջի վրա]
Ստեղծագործական մոտեցում
«Մեր երկու փոքրիկ աղջիկների հետ ուսումնասիրելիս ես ու ամուսինս քննարկում էինք առաջիկա ժողովի հանդիպման նյութը, իսկ աղջիկները պետք է մի նկար նկարեին, որը կամփոփեր սովորածը։ Ժամանակ առ ժամանակ աստվածաշնչյան դրվագներ էինք բեմականացնում կամ էլ մատուցումներ էինք պատրաստում։ Մենք ձգտում էինք նյութը հարմարեցնել երեխաների տարիքին, և դարձնել այն հետաքրքիր ու զվարճալի» (Ջ. Մ., ԱՄՆ)։
«Ես Աստվածաշունչ եմ ուսումնասիրում մի կնոջ հետ։ Մի անգամ ուզում էինք օգնել նրա որդուն հասկանալու, թե ինչքան դժվար էր աստվածաշնչյան ժամանակներում օգտվել մագաղաթներից։ Մենք առանձին տպեցինք «Եսայիա» գիրքը, ջնջեցինք գլուխները և համարները, ապա իրար միացրինք էջերը, իսկ ծայրերը ամրացրինք երկու խողովակների։ Հետո երեխան փորձեց անել այն, ինչ Հիսուսն արեց Նազարեթի ժողովարանում։ Ղուկաս 4։16–21 համարներում կարդում ենք, որ նա «բացեց [Եսայիայի] գիրքը ու գտավ» այն տեղը, որը փնտրում էր (Ես. 61։1, 2)։ Երեխան փորձեց նույնն անել, սակայն այդ «մագաղաթում» Եսայիա 61–րդ գլուխը գտնելը շատ դժվար էր։ Հիսուսի՝ մագաղաթից օգտվելու ունակությունից տպավորված՝ երեխան բացականչեց. «Ա՛յ քեզ հրաշք» (Յ. Տ., Ճապոնիա)։
[նկար 30–րդ էջի վրա]
Ցուցադրումները կօգնեն հաղթահարելու հասակակիցների ճնշումը
[նկար 31–րդ էջի վրա]
Ընտանեկան երկրպագությունը հաճելի դարձրեք