Մոտեցեք Աստծուն

Եհովան մեզ ընտրելու հնարավորություն է տալիս

Բ Օրինաց 30։11–20

«ՀԱՃԱԽ, չգիտես, թե ինչու, սկսում էի վախենալ ու մտածել, որ չեմ կարող հավատարիմ մնալ Եհովային»։ Այսպես արտահայտվեց մի կին, որը վատ մանկություն էր ունեցել։ Ճի՞շտ էր արդյոք նա մտածում։ Մի՞թե մենք ճակատագրի գերին ենք։ Ո՛չ։ Եհովա Աստված մեզ պարգևել է ազատ կամք, ուստի մենք ունենք ընտրության հնարավորություն։ Սակայն Եհովան ցանկանում է, որ ճիշտ որոշումներ կայացնենք, և Աստվածաշնչի միջոցով առաջնորդություն է տալիս։ Քննենք Մովսեսի խոսքերը, որոնք արձանագրված են Բ Օրինաց 30–րդ գլխում։

Արդյոք դժվա՞ր է իմանալ, թե որոնք են Աստծու պահանջները, և դրանց համաձայն ապրելa։ Մովսեսն ասաց. «Այս պատուիրանքը, որ ես այսօր քեզ պատուիրում եմ, քեզ համար անիմանալի չէ, եւ հեռու չէ» (համար 11)։ Եհովան անհնար բան չի պահանջում մեզնից։ Նա նաև այնքան շատ բան չի պահանջում, որ մենք չկարողանանք կատարել։ Բացի այդ, հարկավոր չէ բարձրանալ «երկինք» կամ «ծովի այն կողմը» անցնել, որպեսզի իմանանք, թե որոնք են Աստծու պահանջները (համարներ 12, 13)։ Աստվածաշունչը պարզ հայտնում է մեզ, թե ինչպես պետք է ապրենք (Միքիա 6։8)։

Եհովան, սակայն, մեզ չի ստիպում հնազանդվել իրեն։ Մովսեսն ասաց. «Ես այսօր քո առաջն եմ դնում կեանքը եւ բարին, մահը եւ չարը» (համար 15)։ Մենք կարող ենք ընտրել կա՛մ կյանքը, կա՛մ մահը, կա՛մ բարին, կա՛մ չարը։ Եթե որոշենք երկրպագել Աստծուն և հնազանդվել նրան, ապա օրհնություններ կստանանք։ Իսկ եթե չհնազանդվենք նրան, կկրենք մեր կատարած ընտրության հետևանքները։ Ամեն դեպքում, որոշումը մերն է (համարներ 16–18; Գաղատացիներ 6։7, 8)։

Իսկ Եհովայի համար նշանակություն ունի՞, թե ինչ ընտրություն ենք կատարում մենք։ Այո՛։ Աստված Մովսեսի միջոցով ասել է. «Կեանքը ընտրիր» (համար 19)։ Ինչպե՞ս կարող ես ընտրել կյանքը։ Մարգարեն բացատրում է. «Քո Եհովայ Աստուծուն սիրես՝ նորա ձայնին լսես, եւ նորան յարես» (համար 20)։ Երբ սկսում ենք սիրել Եհովային, հոժարակամորեն հնազանդվում ենք նրան և, անկախ ամեն ինչից, նվիրված ենք մնում։ Այդպես մենք ընտրում ենք կյանքը՝ լավագույն ուղին, ինչպես նաև Աստծու խոստացված նոր աշխարհում հավիտյան ապրելու հույս ենք ունենում (2 Պետրոս 3։11–13; 1 Հովհաննես 5։3)։

Մովսեսի խոսքերը վստահություն են ներշնչում մեզ։ Անկախ այն բանից, թե ինչերի միջով ես անցել այս չար աշխարհում, դու ճակատագրի գերին չես և դատապարտված չես անհաջողության։ Եհովան քեզ տվել է ազատ կամքի պարգևը։ Դու կարող ես ընտրել՝ սիրել Եհովային, հնազանդվել ու հավատարիմ մնալ նրան։ Եթե այդպես վարվես, համոզված եղիր, որ Նա կօրհնի քեզ։

Երբ այդ կինը, որի մասին նշվեց հոդվածի սկզբում, իմացավ, որ ընտրության հնարավորություն ունի՝ սիրել ու ծառայել Եհովային, անչափ մխիթարվեց։ Նա ասում է. «Ես իսկապես սիրում եմ Եհովային։ Երբեմն մոռանում եմ, որ հենց դա է ամենակարևորը։ Ուրեմն, ես կարող եմ հավատարիմ մնալ Աստծուն»։ Եհովայի օգնությամբ դու էլ կարող ես։

[ծանոթագրություն]