Մի՞թե այդ մասին նախկինում չենք լսել
1 Անշուշտ, լսե՛լ ենք։ Իր Խոսքում Եհովան շատ բաներ կրկնում է ի օգուտ իր ժողովրդին։ Իր հերթին Հիսուսն էլ էր հաճախ կրկնում Թագավորության տարբեր երեսակների մասին ուսուցումները։ Նրա առաքյալները շարունակ հոգևոր թեմաներով հիշեցումներ էին անում այն անհատներին, ովքեր արդեն հաստատված էին ճշմարտության մեջ (Հռովմ. 15։15; Բ Պետ. 1։12, 13; 3։1, 2)։
2 Մեր օրերում Եհովայի կազմակերպությունը որոշ միջոցառումներ է նախատեսել՝ կարևոր նյութերը ժողովի հանդիպումներին կրկին անգամ ուսումնասիրելու նպատակով։ Որոշ հրատարակություններ ուսումնասիրվում են կրկնողաբար։ Այո՛, կարևոր է նախկինում սովորածները նորից կրկնելը։
3 Կրկնողությունն անհրաժեշտ է։ Եհովայի կողմից պարբերաբար եկող հիշեցումները խորացնում են մեր հասկացողությունը, ընդարձակում մեր աշխարհայացքը և զորացնում հոգեվորապես ամուր մնալու մեր վճռականությունը (Սաղ. 119։129, ՆԱ)։ Աստվածային չափանիշներն ու սկզբունքները քննելը նման է ինքներս մեզ հայելու մեջ նայելուն։ Այն օգնում է անձնաքննություն կատարել և հակառակվել այդ հիշեցումները ‘լսելու և մոռանալու’ հակմանը (Յակ. 1։22—25)։
4 Եթե մենք ինքներս մեզ չհիշեցնենք ճշմարտության մասին, մեր սրտերում աստիճանաբար տեղ կգրավեն երկրորդական բաները։ Աստծո հիշեցումները շարունակ զորացնում են մեզ, որպեսզի հակառակվենք Սատանայի աշխարհի քայքայիչ ազդեցությանը (Սաղ. 119։2, 3, 99, 133; Փիլիպ. 3։1)։ Աստծո նպատակների իրականացման հետ կապված կանոնավոր հիշեցումները մղում են մեզ միշտ ‘արթուն լինել’ (Մարկ. 13։32—37)։ Աստծո ճշմարտությունները կրկնելն օգնում է մեզ հաստատուն մնալ հավիտենական կյանքի առաջնորդող ճանապարհին (Սաղ. 119։144, ՆԱ)։
5 Ինչպես անհատապես օգուտ քաղել։ Մենք պետք է ‘խոնարհեցնենք մեր սրտերը դեպի Աստծո վկայությունները’ [«հիշեցումները», ՆԱ] (Սաղ. 119։36)։ Չնայած ժողովի հանդիպման ժամանակ կարող է մեզ ծանոթ թեմա քննարկվել, ամեն դեպքում, պետք է նախօրոք պատրաստենք այն, փնտրենք սուրբգրային համարները և խորհենք, թե ինչպես կարելի է կիրառել ստացված տեղեկությունը։ Եկեք չանտեսենք Աստվածապետական ծառայության դպրոցի գրավոր կրկնությանը պատրաստվելը՝ մտածելով, թե դրա անհրաժեշտությունը չկա (Ղուկ. 8։18)։ Եկեք երբեք անտարբերություն չդրսևորենք, երբ Աստվածաշնչի հիմնական ուսուցումները հաճախակի կրկնվում են հանդիպումների ժամանակ (Եբր. 5։11)։
6 Սաղմոսերգուի նման մենք էլ կարող ենք ասել. «Քո վկայութիւնների [«հիշեցումների», ՆԱ] ճանապարհովը ուրախանում եմ, ինչպէս ամեն կերպ հարստութիւնով» (Սաղ. 119։14)։ Այո՛, մենք այս անգնահատելի ճշմարտության մասին լսել ենք և, անշուշտ, դեռ էլի կլսենք։ Իսկ ինչո՞ւ. քանի որ Եհովան գիտի, որ մեզ համար անհրաժեշտ է դրանք կրկնողաբար լսելը։