Ուշադրություն ընծայենք Աստծո հրաշալի գործերին
1 Երեք հիասքանչ օրեր մենք ներկա գտնվեցինք «Աստծո խոսքը կատարողները» նահանգային համաժողովին։ Մի կողմ դնելով ամենօրյա հոգսերը՝ մենք մեր ուշադրությունը կենտրոնացրեցինք Եհովայի հրաշալի գործերի վրա։ Ծրագիրը նպատակաուղղված էր Եհովայի և իր Խոսքի հանդեպ մեր հավատը աճեցնելուն, Եհովայի հետ մեր փոխհարաբերությունն ամրացնելուն ու ծառայության մեջ ավելի եռանդուն լինելուն։ Ինչպիսի՞ օգուտներ ենք քաղում այդ հարցերի վերաբերյալ ստացած ուսուցումներից (Յովհ. 13։17)։
2 Ընտանիքները հնազանդվում են Աստծո Խոսքին։ «Հնազա՛նդ եղեք Աստծո Խոսքին» ելույթների շարքը օգնեց մեզ վերլուծության ենթարկել մեր ընտանիքների հոգևոր վիճակը։ Հաշվի առնելով այն հանգամանքը, որ սովորաբար երեխաները հարցասեր են լինում՝ աստվածավախ ծնողներին խորհուրդ տրվեց Աստվածաշնչի ընտանեկան ուսումնասիրությունը դարձնել հոգևորապես ամուր ընտանիք «կառուցելու» հիմքը։ Շատ հայրեր իրենց մանկահասակ երեխաների հետ ուսումնասիրում են «Դու կարող ես դառնալ Աստծո բարեկամը» նոր գրքույկը։ Դա օգնում է երեխաներին ջերմ ու վստահելի փոխհարաբերություններ զարգացնել Եհովայի հետ։ Ծնողնե՛ր, սովորեցրե՛ք ձեր երեխաներին որևէ վճիռ կայացնելիս հաշվի առնել այն, թե ինչ կզգա Եհովան։ Արտահայտեք ձեր սերը նրա հանդեպ ու նրա գործերի (Սաղ. 103։2)։ Երեխաների հետ միասին հոգևոր նպատակներ դրեք ձեր առաջ և ձգտեք հասնել դրանց՝ լիարժեք մասնակցություն ունենալով Եհովայի ծառայության մեջ։
3 Աստծո Խոսքը լուսավորում է մեր ուղին։ Մենք մեծ ցնծություն ապրեցինք՝ ստանալով «Եսայիայի մարգարեությունը. լույս ողջ մարդկության համար» (հատոր 1–ին, ռուս.) նոր գիրքը։ Այս առաջին հատորից որքա՞ն ես կարդացել։ Գիրքը նախագուշակում է ինչպես անաստված ազգերին սպասող խիստ դատաստանի, այնպես էլ Աստծո ժողովրդի համար Թագավորության հիանալի օրհնությունների մասին (Ես. 34։2; 35։10)։ Այն ամրացնում է Եհովայի ու նրա գործելակերպի հանդեպ հավատն ու վստահությունը (Ես. 12։2–5)։
4 Կարդալով «Եսայիայի մարգարեությունը» գրքի առաջին հատորը՝ սկզբից ևեթ կտեսնես, թե ինչպես է Եսայիան Եհովայի առաջ անարատություն պահել՝ չնայած շրջապատի չարությանը։ Երբ հնչեց Աստծո պատգամաբերը լինելու հրավերը, Եսայիան պատասխանեց. «Ահա ես, ինձ ուղարկիր» (Ես. 6։8)։ Նա պատրաստակամության ոգի դրսևորեց, որի շուրջ խորհելը կմղի մեզ շարունակ քարոզել բարի լուրը՝ լիարժեք մասնակցելով «բոլոր ժողովուրդներուն» վկայելու գործին (Մատթ. 24։14, ՆԿ–ի ՆԱԹ)։
5 Եհովայի գործերին ուշադրություն ընծայելով՝ մենք մեծարում ենք նրան։ Ուստի, եկեք գնահատենք Աստծո խոսքը կատարողները լինելու մեր առանձնաշնորհումը։