Մեր վարքով ամեն ինչում սուրբ լինենք

1. Ինչո՞ւ է կարևոր սուրբ լինել ամեն ինչում։

¹ Որպես սուրբ Աստծո՝ Եհովայի ծառաներ, մենք ձգտում ենք մեր վարքով սուրբ լինել ամեն ինչում (Ա Պետ. 1։15, 16)։ Սա նշանակում է, որ ջանում ենք կյանքի բոլոր բնագավառներում պահել Եհովայի չափանիշները։ Այս տարվա մարզային համաժողովը առանձնակի հնարավորություն է ընձեռում մեզ սուրբ վարք դրսևորելու։

2. Ինչպե՞ս կարող ենք լավ վարք դրսևորել հյուրանոցներում։

² Հյուրանոցներում։ Մի տնօրեն, որն անցած տարի իր հյուրանոցում ընդունել էր համաժողովի պատվիրակների, ասաց. «Շատ հաճելի է Եհովայի վկաներին ընդունել այստեղ։ .... Մենք հենց ձեր նման մարդկանց ենք ուզում ընդունել մեր հյուրանոցում»։ Ներքոհիշյալ հիշեցումներին հետևելով՝ մենք կկարողանանք բարձր պահել մեր անունը. 1) պատվիրիր այնքան կացարաններ, որքան քեզ անհրաժեշտ է, և ուշադիր եղիր, որ մեկ կացարանում չգիշերեն թույլ տրվածից ավելի մարդիկ։ 2) Եթե քեզ պետք է կացարանի պատվերը անվավեր դարձնել, անհապաղ տեղեկացրու այդ մասին հյուրանոց։ 3) Կերակուր մի պատրաստիր այն կացարաններում, որոնք նախատեսված չեն նման բաների համար։ 4) Ամեն օր շնորհակալություն հայտնիր ծառայություններ մատուցող անձնակազմին։ 5) Ոգու պտուղը դրսևորիր հյուրանոցի անձնակազմի հետ տարբեր հարցերով առնչվելիս, հատկապես հյուրանոց ժամանելիս և այնտեղից հեռանալիս, որը սովորաբար ծանրաբեռնված ժամանակ է նրանց համար (Գաղ. 5։22, 23)։

3. Պատանի Վկաների վարքն ի՞նչ տպավորություն կարող է թողնել ուրիշների վրա։

³ Մեր լավ վարքը կարող է ազդեցիկ վկայություն լինել։ Անցած տարի մի պատանի Վկա հյուրանոցի ընդունարանի աշխատողից քաղաքավարությամբ ինչ–​որ գրենական պիտույք էր խնդրել, ապա շնորհակալություն հայտնել։ Դա այնպես էր տպավորել այդ աշխատողին, որ նա ասաց. «Այսպիսի քաղաքավարի երիտասարդ երբեք չես տեսնի»։ Այնուամենայնիվ, եղել են դեպքեր, երբ երեխաները, հսկողությունից դուրս մնալով, խաղ են արել վերելակներում, բարձրաձայն խոսել են և վազվզել միջանցքներում։ Ծնողները երեխաներին չպետք է անուշադրության մատնեն, այլ պետք է հսկեն նրանց, որպեսզի նրանց վարքը փառք բերի Եհովային (Առակ. 29։15)։

4. Ինչպե՞ս կարող ենք ուշադիր լինել ուրիշների նկատմամբ, երբ ճաշում ենք տնից դուրս։

⁴ Ռեստորաններում և սրճարաններում։ Մի համաժողովի անցկացման վայրին մոտ ռեստորանի մատուցողներից մեկն ասաց. «Վկաները տարբերվում են մյուսներից։ Նրանք հարգանքով են վերաբերվում ուրիշներին»։ Այսպիսի վայրերում լավ վարք դրսևորել նշանակում է խուսափել բարձրաձայն խոսելուց և ծիծաղելուց, ինչը կարող է խանգարել մյուսներին, որոնք նույնպես ճաշում են։ Նույնիսկ ուտելիս և խմելիս ենք ձգտում ամեն բան Աստծո փառքի համար անել (Ա Կորնթ. 10։31)։

5. Ի՞նչ է մտնում համաժողովի անցկացման վայրում լավ վարք դրսևորելու մեջ։

⁵ Համաժողովի ժամանակ։ Մենք պետք է լավ վարք դրսևորենք հատկապես համաժողովի անցկացման վայրում գտնվելիս։ Խնդրում ենք, համագործակցեք սպասարկուների հետ՝ հետևելով նրանց ցուցումներին՝ լինի դա ավտոկանգառներում թե միջոցառման անցկացման վայրում (Եբր. 13։17)։ Ընտանիքի անդամները պետք է միասին նստեն, և ծնողները չպետք է թույլ տան, որ իրենց երեխաները, այդ թվում նաև պատանիները, նստեն այլ երիտասարդների հետ խմբերով։ Ձայնագրիչները չպետք է միացվեն համաժողովի անցկացման վայրի էլեկտրացանցին կամ ձայնական համակարգին և պետք է գործածվեն միայն այնպես, որ չշեղեն ուրիշների ուշադրությունը։ Եթե ցանկանում ես ծրագրի ժամանակ լուսանկարչական ապարատով նկարել, պետք է դա անես առանց լուսաբռնկիչի գործածության։ Այնպես կարգավորիր փեյջերների և բջջային հեռախոսների աշխատանքը, որ դրանք չշեղեն նստածների ուշադրությունը։ Եթե ինչ–​որ պատահար է տեղի ունենում, խնդրում ենք, տեղեկացրու այդ մասին սպասարկուներից որևէ մեկին կամ Առաջին օգնության բաժնին։ Որակյալ բժշկական օգնություն կարելի է ցույց տալ տեղում։

6. Ինչպե՞ս է մեր վարքը համաժողովների ժամանակ փառք բերում Աստծուն։

⁶ Մեր վարքի շնորհիվ մենք տարբերվում ենք մյուսներից և այդպիսով փառք բերում Աստծուն (Ա Պետ. 2։12)։ Համաժողովի ժամանակ Եհովայի վկաների նիստուկացը բոլորին է տեսանելի։ Ուստի՝ վճռենք մեր վարքով սուրբ լինել ամեն ինչում։

[Շրջանակ 5–րդ էջի վրա]

Սուրբ վարք ունեցիր

◼ Պահիր հյուրանոցի բոլոր կանոնները

◼ Ուշադրությամբ հսկիր երեխաներին

◼ Ուշադիր եղիր ուրիշների նկատմամբ