Մաս 4—Աստվածաշնչի արդյունավետ ուսումնասիրություններ անցկացնենք
Սովորեցնենք ուսումնասիրողին նախապատրաստվել
1 Այն ուսումնասիրողը, որ նախապես կարդում է դասը, ընդգծում պատասխանները և մտածում է, թե ինչպես կարող է սեփական բառերով պատասխանել հարցերին, սովորաբար ավելի արագ է առաջադիմում։ Հետևաբար, երբ Աստվածաշնչի տնային ուսումնասիրությունը կանոնավոր ընթացք է ստանում, ուսումնասիրողի հետ միասին պատրաստիր մի դաս, որպեսզի նա տեսնի, թե ինչպես նախապատրաստվել։ Ուսումնասիրողների մեծամասնության հետ օգտակար կլինի նախապատրաստել մի ամբողջ գլուխ կամ դաս։
2 Ընդգծումներ և նշումներ։ Բացատրիր ուսումնասիրողին, թե ինչպես պարբերության մեջ գտնել տպագրված հարցերի անմիջական պատասխանները։ Ցույց տուր ուսումնասիրության քո ձեռնարկը, որում ընդգծել ես միայն հիմնական բառերն ու արտահայտությունները։ Այն ժամանակ, երբ քննես նյութը, նա գուցե ցանկանա ընդօրինակել քեզ՝ իր ձեռնարկում ընդգծելով միայն այն, ինչ անհրաժեշտ է իրեն՝ պատասխանը վերհիշելու համար (Ղուկ. 6։40)։ Ապա խնդրիր նրան պատասխանել հարցին սեփական բառերով։ Դա հնարավորություն կտա քեզ տեսնելու, թե որքանով է նա հասկանում քննարկվող նյութը։
3 Նշված սուրբգրային համարները ուշադրությամբ քննելը ուսումնասիրությանը նախապատրաստվելու կարևոր քայլերից է (Գործք 17։11)։ Օգնիր ուսումնասիրողին տեսնել, որ այդ համարներից յուրաքանչյուրը կապվում է պարբերության որևէ մտքի հետ։ Ցույց տուր նրան, թե ինչպես կարող է կարճ նշումներ անել իր ձեռնարկի լուսանցքներում։ Հստակ ցույց տուր, որ այն ամենը, ինչ որ նա սովորում է, հիմնված է Աստվածաշնչի վրա։ Հորդորիր նրան ուսումնասիրության ժամանակ մեկնաբանություններ տալիս հաճախակի ընդգրկել նշված սուրբգրային համարները։
4 Նյութն աչքի անցկացնելն ու կրկնելը։ Ուսումնասիրողը օգուտներ կքաղի, եթե նախքան նյութի մանրակրկիտ ուսումնասիրությանն անցնելը այն աչքի անցկացնի։ Նշիր, որ նա կարող է դա անել՝ քննելով գլխի վերնագիրը, ենթավերնագրերը և նկարները։ Բացատրիր, որ նախապատրաստվելուց հետո լավ կլինի հակիրճ կրկնել դասի հիմնական մտքերը, թերևս կրկնության հարցերի օգնությամբ, եթե դրանք կան։ Կրկնությունը կօգնի նրան չմոռանալ իր ուսումնասիրած նյութը։
5 Սովորելով լավ նախապատրաստվել ուսումնասիրությանը՝ անհատը կկարողանա իմաստալից մեկնաբանություններ տալ ժողովի հանդիպումներին։ Նա իր մեջ կմշակի ուսումնասիրության լավ սովորություններ, որոնք օգտավետ կլինեն նաև հետագայում, երբ նա ավարտի քարոզչի հետ իր ուսումնասիրությունը։