Ինչ է նշանակում լինել քրիստոնյա։ Ի՞նչ է ասում Աստվածաշունչը

Այսօր աշխարհում շատերը հպարտությամբ իրենց քրիստոնյա են կոչում, բայց այնպիսի արարքներ են անում, որ վնասում են ուրիշներին։ Ոմանք եսասիրաբար են վարվում, անազնիվ են ու չեն ուզում բարի լինել մարդկանց հանդեպ։ Ոմանք էլ դավաճանում են իրենց կողակիցներին։ Նման վարվելակերպը շատերի մեջ հարց է առաջացնում. «Մի՞թե այսպիսին պետք է լինի իսկական քրիստոնյան»։

Ինչ է նշանակում լինել իսկական քրիստոնյա

Հեշտ է ասել. «Ես քրիստոնյա եմ»։ Բայց միայն ասելը բավական չէ։ Աստվածաշնչում քրիստոնյա է կոչվում նա, ով Հիսուս Քրիստոսի աշակերտն է (Գործեր 11։26)։ Իսկ Հիսուսը դրա հետ կապված այսպիսի խոսքեր է ասել. «Եթե միշտ հնազանդվեք իմ խոսքին, ուրեմն իսկապես իմ աշակերտներն եք» (Հովհաննես 8։31)։ Իհարկե ոչ ոք չի կարող կատարելապես հնազանդվել Հիսուսի խոսքերին։ Բայց իսկական քրիստոնյաները ձգտում են վարվել Հիսուսի սովորեցրածի համաձայն և իրենց ամենօրյա կյանքով ցույց են տալիս, որ ունեն նույն արժեքները, ինչ նա։ Դիտարկենք մի քանի այդպիսի արժեքներ։

Քրիստոնյաները անշահախնդիր սեր են դրսևորում

Ինչ ասաց Հիսուսը։ «Նոր պատվիրան եմ տալիս ձեզ. սիրե՛ք իրար՝ սիրեք այնպես, ինչպես ես ձեզ սիրեցի: Եթե սիրեք իրար, բոլորը կիմանան, որ դուք իմ աշակերտներն եք» (Հովհաննես 13։34, 35)։

Ինչ արեց Հիսուսը։ Հիսուսը անշահախնդիր սեր ցուցաբերեց բոլորի հանդեպ՝ անկախ նրանց սոցիալական կարգավիճակից կամ ծագումից։ Նա բուժեց հիվանդներին, կերակրեց քաղցածներին և անգամ իր կյանքը տվեց մարդկանց համար (Մատթեոս 14։14-21; 20։28)։

Ինչպես են վարվում քրիստոնյաները։ Քրիստոնյաները անկեղծորեն սիրում են ուրիշներին և դա ցույց են տալիս՝ լինելով առատաձեռն, անկողմնակալ և ներողամիտ։ Նրանք ձեռք են մեկնում օգնության կարիք ունեցողներին և պատրաստ են զոհողությունների գնալ հանուն ուրիշների (1 Հովհաննես 3։16)։

Քրիստոնյաները ազնիվ են

Ինչ ասաց Հիսուսը։ «Ես եմ.... ճշմարտությունը» (Հովհաննես 14։6)։

Ինչ արեց Հիսուսը։ Նա միշտ ճիշտն էր ասում ու ազնիվ էր իր բոլոր գործերում։ Նա երբեք խորամանկորեն ազդեցություն չէր բանեցնում մարդկանց վրա, որ իր ուզածն անեն, և երբեք իր խոսքերով մոլորության մեջ չէր գցում նրանց։ Նա հայտնի էր որպես ճշմարտախոս ու ազնիվ մարդ և միշտ այդպես էր վարվում, անգամ եթե դրա պատճառով գուցե խնդիրներ ունենար (Մատթեոս 22։16; 26։63-67)։

Ինչպես են վարվում քրիստոնյաները։ Քրիստոնյաները չեն ստում։ Նրանք վճարում են հարկերը, չեն գողանում և լիարժեք են օգտագործում իրենց աշխատաժամերը՝ բարեխղճորեն կատարելով իրենց գործը (Հռոմեացիներ 13։5-7; Եփեսացիներ 4։28)։ Նրանք չեն խաբում, չեն խարդախում քննությունների ժամանակ և կեղծ տեղեկություններ չեն տրամադրում իրենց ռեզյումեներում կամ նմանատիպ այլ փաստաթղթերում (Եբրայեցիներ 13։18)։

Քրիստոնյաները բարությամբ են վարվում

Ինչ ասաց Հիսուսը։ «Ինձ մոտ եկեք բոլորդ, որ հոգնած ու բեռնավորված եք, և ես կթարմացնեմ ձեզ: Մտեք իմ լծի տակ և սովորեք ինձնից, որ հեզ եմ ու սրտով խոնարհ, և դուք կթարմանաք. իմ լուծը հարմար է, և իմ բեռը՝ թեթև» (Մատթեոս 11։28-30)։

Ինչ արեց Հիսուսը։ Հիսուսը մատչելի էր, բարի ու մեղմ։ Նա սիրով ժամանակ էր տրամադրում երեխաներին, մխիթարում էր վհատվածներին և հարգում էր ուրիշների արժանապատվությունը (Մարկոս 10։13-15; Ղուկաս 9։11)։

Ինչպես են վարվում քրիստոնյաները։ Քրիստոնյաները բարությամբ են խոսում մարդկանց հետ, չեն կոպտում ու չեն նվաստացնում ոչ ոքի (Եփեսացիներ 4։29, 31, 32)։ Նրանք հետաքրքրվում են ուրիշների բարօրությամբ և օգնության ձեռք մեկնելու առիթ են փնտրում (Գաղատացիներ 6։10)։

Քրիստոնյաները հավատարիմ են իրենց կողակցին

Ինչ ասաց Հիսուսը։ «Ինչ որ Աստված միավորեց, թող մարդը չբաժանի» (Մարկոս 10։9)։

Ինչ արեց Հիսուսը։ Թեև Հիսուսը երբեք ամուսնացած չի եղել, բայց ամուսնացածներին հորդորեց հավատարիմ լինել իրենց կողակցին (Մատթեոս 19։9)։ Նա նախազգուշացրեց, թե ինչը կարող է սխալ քայլի տանել ու քայքայել ամուսնությունը (Մատթեոս 5։28)։

Ինչպես են վարվում քրիստոնյաները։ Քրիստոնյաները զգուշանում են այնպիսի բաներից, որոնք գուցե վնասեն իրենց կողակցի հետ հարաբերությունները, ու պատվական են համարում իրենց ամուսնությունը (Եբրայեցիներ 13։4)։ Քրիստոնյա կողակիցները սիրով ու հարգանքով են վերաբերվում միմյանց (Եփեսացիներ 5։28, 33)։