ԴԱՍ 102
Հովհաննեսին տրված հայտնությունը
Մինչ Հովհաննես առաքյալը աքսորված էր Պատմոս կղզում, Հիսուսը ապագայի վերաբերյալ 16 տեսիլք ցույց տվեց նրան։ Այդ տեսիլքներում Հովհաննեսը տեսավ, թե ինչպես էր սրբացվելու Եհովայի անունը, ինչպես էր գալու նրա թագավորությունը, և թե ինչպես էր նրա կամքը կատարվելու երկնքում և երկրի վրա։
Տեսիլքներից մեկում Հովհաննեսը տեսավ, որ Եհովան երկնքում նստած էր իր փառավոր գահին։ Այդ գահի շուրջբոլորը 24 երեցներ կային, որոնք սպիտակ հագուստներ էին հագել, և նրանց գլուխներին ոսկե պսակներ կային։ Գահից կայծակներ էին դուրս գալիս, ու որոտի ձայն էր լսվում։ 24 երեցները խոնարհվեցին Եհովայի առաջ ու երկրպագեցին նրան։ Մեկ ուրիշ տեսիլքում Հովհաննեսը տեսավ շատ մարդկանց։ Նրանք բոլոր ազգերից, ժողովուրդներից և լեզուներից էին ու երկրպագում էին Եհովային։ Գառը, այսինքն՝ Հիսուսը, հովվում էր նրանց ու առաջնորդում դեպի կյանքի ջրերը։ Ավելի ուշ մեկ այլ տեսիլքում Հիսուսը 24 երեցների հետ սկսեց թագավորել երկնքում։ Դրան հաջորդող տեսիլքում Հովհաննեսը տեսավ, որ Հիսուսը պատերազմում էր վիշապի, այսինքն՝ Սատանայի, ինչպես նաև նրա դևերի դեմ։ Հիսուսը նրանց երկնքից ցած գցեց երկրի վրա։
Հետո Հովհաննեսը տեսավ մի գեղեցիկ տեսարան. Գառը և նրա 144 000 իշխանակիցները կանգնած էին Սիոն լեռան վրա։ Նա նաև տեսավ մի հրեշտակի, որը թռչում էր երկրի շուրջ և մարդկանց ասում, որ վախենան Աստծուց ու փառք տան նրան։
Հաջորդ տեսիլքը Արմագեդոն պատերազմի մասին էր։ Այդ պատերազմում Հիսուսը և նրա զորքը կործանեցին Սատանայի չար համակարգը։ Իսկ վերջին տեսիլքում Հովհաննեսը տեսավ, որ երկնքում և երկրի վրա կատարյալ համերաշխություն էր տիրում։ Սատանան ու նրա սերունդը կործանվել էին։ Երկնքում և երկրի վրա բոլորը սուրբ էին համարում Եհովայի անունը և միայն նրան էին երկրպագում։
«Ես թշնամություն կդնեմ քո և կնոջ միջև, քո սերնդի և նրա սերնդի միջև։ Կնոջ սերունդը քո գլուխը կջախջախի, և դու նրա կրունկը կխայթես» (Ծննդոց 3։15)։