Գործ, որն անելու համար խոնարհություն է անհրաժեշտ

¹ Աստծո Խոսքը մեզ հորդորում է լինել «խոնարհամիտ» (ԱՆԹ), ‘չարի փոխարեն չար չհատուցել, այլ ընդհակառակը, օրհնել’ (Ա Պետ. 3։8, 9)։ Այս խորհուրդն անշուշտ կիրառելի է քարոզչական գործում։ Իսկապես, քրիստոնեական ծառայությունը կարող է մեր խոնարհության համար փորձություն լինել։

² Խոնարհությունը մի հատկություն է, որն օգնում է մեզ համբերատարությամբ տանել տհաճ իրավիճակները։ Քարոզելիս մենք ինքներս ենք մոտենում մարդկանց՝ գիտակցելով, որ ոմանք անբարյացակամ վերաբերմունք ցույց կտան մեր հանդեպ։ Նման դեպքերում խոնարհություն է հարկավոր, որպեսզի կարողանանք շարունակել քարոզչությունը։ Մի տարածքում, որտեղ շատ դժվար էր քարոզել, երկու ռահվիրա քույրեր երկու տարի շարունակ ամեն օր տնետուն ծառայություն էին կատարում, բայց բնակիչներից ոչ մեկի հետ չէր հաջողվում զրուցել, քանի որ ոչ ոք դուռը չէր բացում։ Սակայն քույրերը չնահանջեցին, և այսօր այդ վայրում երկու ժողով կա։

³ Երբ կոպտորեն են վարվում մեզ հետ։ Խոնարհությունը կօգնի մեզ, որ ընդօրինակենք Հիսուսին, երբ մարդիկ անբարյացակամորեն են վերաբերվում մեզ (Ա Պետ. 2։21–23)։ Քարոզչության ժամանակ մեր քրոջը վիրավորական խոսքեր ասելուց հետո տանտերերը՝ մի տղամարդ ու նրա կինը, պահանջեցին, որ նա հեռանա։ Քույրը ժպիտը դեմքին ասաց, որ հույս ունի իրենց հետ զրուցելու մեկ ուրիշ անգամ։ Այս ամուսինները այնքան էին տպավորվել նրա պահվածքից, որ հաջորդ անգամ, հանդիպելով մեկ ուրիշ Եհովայի վկայի, լսեցին նրան և ընդունեցին վերջինիս հրավերը՝ այցելելու Թագավորության սրահում անցկացվող հանդիպմանը։ Այն քույրը, որ սկզբում կտրուկ մերժման էր արժանացել, այնտեղ էր և ողջունեց նրանց ու շարունակեց վկայություն տալ։ Մենք նույնպես կարող ենք «փափկացնել» այդպիսի անձնավորություններին՝ դրսևորելով ‘հեզություն և երկյուղածություն [«խոր հարգանք», ՆԱ]’ (Ա Պետ. 3։15; Առակ. 25։15)։

⁴ Խուսափիր գոռոզամտությունից։ Այն, որ մենք աստվածաշնչային գիտելիքներ ունենք, մեզ իրավունք չի տալիս մարդկանց վերևից նայել, կամ էլ նրանց ասել խոսքեր, որոնք կարող են ցավ պատճառել (Յովհ. 7։49)։ Աստծո Խոսքը խորհուրդ է տալիս ոչ մեկին վիրավորական խոսքեր չասել (Տիտոս 3։2, ՆԱ)։ Եթե սրտով խոնարհ ենք, ապա Հիսուսի նման կկարողանանք մյուսների համար թարմության աղբյուր լինել (Մատթ. 11։28, 29)։ Խոնարհ լինելով է՛լ ավելի գրավիչ ենք դարձնում մեր պատգամը։

⁵ Այո՛, խոնարհությունն օգնում է մեզ շարունակել մեր գործը «դժվար» տարածքում։ Այս հատկությունը դրսևորելով՝ կարող ենք փափկացնել այն մարդկանց սրտերը, ովքեր անբարյացակամորեն են վերաբերվում մեր լուրին, ինչպես նաև կարող ենք մարդկանց մեջ հետաքրքրություն արթնացնել Թագավորության պատգամի հանդեպ։ Իսկ ամենակարևորը՝ խոնարհ լինելով մենք ուրախություն ենք պատճառում Եհովային, որը «խոնարհներին [շնորհ] է տալիս» (Ա Պետ. 5։5)։