ԴԻՏՈՒՄ ԵՆՔ ԱՇԽԱՐՀԸ
Անդրսահարյան աֆրիկա
Անդրսահարյան Աֆրիկայի մասին ՅՈՒՆԻՍԵՖ-ի մի տեղեկատվության համաձայն՝ «մինչև 5 տարեկան երեխաների միայն 38 տոկոսն ունի ծննդյան վկայական»։ Սակայն ինչպես նշում է Էլկե Վիշը՝ Արևելյան և Հարավային Աֆրիկայի՝ ՅՈՒՆԻՍԵՖ-ի տարածաշրջանային ղեկավարի տեղակալը, այդ շրջանի այլ մասերում «ծննդյան գրանցումը կարևոր է, որպեսզի երեխաները հնարավորություն ունենան ստանալու բուժօգնություն և կրթություն, իսկ որբ երեխաները՝ իրենց ծնողների թողած ժառանգությունը»։
Իտալիա
Մի հարցման արդյունքում պարզ դարձավ, որ իտալացի պատանիները ամենից շատ վախենում են առցանց ծաղրուծանակից և ճնշումներից (կիբերբուլիինգ)։ 12–17 տարեկան պատանիների 72 տոկոսն ասում է, որ սարսափում է դրանից։ Նրանք ավելի մեծ թիվ են կազմում, քան այն պատանիները, որոնք վախենում են թմրամոլության ծուղակն ընկնելուց (55 տոկոս), չափահասների կողմից սեռական բռնության ենթարկվելուց (44 տոկոս) և սեռական ճանապարհով փոխանցվող հիվանդություն ձեռք բերելուց (24 տոկոս)։
Ճապոնիա
Ինչպես նշվում է «Ջափան թայմս» թերթում, գնալով ավելի շատ երիտասարդ ճապոնացիներ են մերժում պաշտոնի բարձրացման առաջարկները։ Նրանց քառասուն տոկոսի համար տհաճ է, որ աշխատավայրում չի պահպանվում էթիկան և տարածված է անազնվությունը։ Շատ աշխատողներ չեն կարողանում ազատորեն խոսել իրենց վերադասի հետ։ Ավելի հին սերունդները հավատարիմ էին իրենց աշխատանքին, մինչդեռ այսօր երիտասարդների 60 տոկոսը պարզապես մնում է իր աշխատատեղում մինչև ավելի լավ գործ գտնելը։
Բրազիլիա
1980–2010թթ.-ին Բրազիլիայում մոտ 800 000 մարդ է սպանվել հրազենով։ Զոհերի ավելի քան 450000-ը 15–29 տարեկան են եղել։ Հանցագործությունների վերաբերյալ վերջերս արված մի ուսումնասիրություն ցույց է տվել, որ սպանությունների պատճառը հաճախ ընտանեկան վեճերն են, հարևանների միջև ընդհարումները, խանդը կամ վարորդների միջև վիճաբանությունները։