Աշխարհի վերջը մո՞տ է։ Ի՞նչ է Ապոկալիպսիսը
Ի՞նչ է միտքդ գալիս, երբ լսում ես «ապոկալիպսիս» բառը։ Գուցե մտածում ես համաշխարհային աղետի մասին, որի ժամանակ կործանվելու է աշխարհը։ Շատերն այն կարծիքին են, որ աշխարհը հաստատուն քայլերով գնում է կործանման, հատկապես երբ կարդում են այսպիսի լուրեր.
«Շատ հնարավոր է, որ միջուկային պատերազմ սկսվի։ Դա կարող է լինել դիտավորյալ, պատահական կամ հասարակ թյուրիմացության պատճառով» (Bulletin of the Atomic Scientists)։
«Անցած տասնամյակում ռեկորդային թվով փոթորիկների, անտառային հրդեհների, երաշտների, կորալների գունազրկման, սաստիկ շոգերի և ջրհեղեղների դեպքեր են գրանցվել» (National Geographic)։
«Աֆրիկայում վերջին տարիներին մորեխների երամների այսքան մեծ հարձակում երբևէ չի եղել» (The Associated Press)։
Երկրագունդը կկործանվի՞ համաշխարհային Ապոկալիպսիսի պատճառով։ Ի՞նչ է ասում Աստվածաշունչը։
Երկիր մոլորակը կկործանվի՞
Ո՛չ։ Աստծու Խոսքը՝ Աստվածաշունչը, հավաստիացնում է, որ Երկիր մոլորակը հավիտյան է մնալու (Ժողովող 1։4)։ Իր ստեղծած երկիրը ոչնչացնելու փոխարեն Աստված կործանելու է «նրանց, ովքեր կործանում են երկիրը» (Հայտնություն 11։18)։
Արդյո՞ք աշխարհի վերջը մոտ է
Ըստ Աստվածաշնչի՝ «աշխարհը», որի վերջը մոտ է, վերաբերում է այն բոլոր մարդկանց, որոնք անարգում են Աստծուն և եսասիրական նպատակներ են հետապնդում։ Ճիշտ ինչպես Նոյի օրերում, այս անգամ էլ Աստված կկործանի «անաստված մարդկանց աշխարհը» (2 Պետրոս 2։5; 3։7)։
1 Հովհաննես 2։17-ում ասվում է. «Աշխարհն անցնում է, և նրա ցանկությունն էլ»։ Այս համարից երևում է, որ Աստված կործանելու է ոչ թե Երկիր մոլորակը, այլ այն մարդկանց, որոնք տրվել են իրենց ցանկություններին և մտադիր չեն փոխվել։
Ե՞րբ է գալու վերջը
Աստվածաշունչը հստակ չի հայտնում, թե երբ է գալու վերջը (Մատթեոս 24։36)։ Սակայն այնտեղ նշվում է, որ վերջը մոտ է։ Աստվածաշնչում կանխագուշակվել է, որ՝
«Տեղ-տեղ» պատերազմներ, սովեր, համաճարակներ և հզոր երկրաշարժեր են լինելու (Մատթեոս 24։3, 7, 14; Ղուկաս 21։10, 11; Հայտնություն 6։1–8)։
Մարդիկ ծայրահեղ եսասիրություն են դրսևորելու։ Օրինակ՝ նրանք լինելու են «փողասեր», «անշնորհակալ» և «ինքնատիրապետում չունեցող» (2 Տիմոթեոս 3։1–5)։
Շատերը համաձայն են, որ աշխարհում 1914 թ.-ից տիրող պայմանները համապատասխանում են Աստվածաշնչում կանխագուշակված նշաններին, և որ վերջը մոտ է։ Ավելի շատ տեղեկություններ իմանալու համար տես «Ի՞նչ է Աստվածաշնչի ժամանակագրությունը ցույց տալիս 1914 թվականի մասին» և «Ո՞րն է «վերջին օրերի», կամ՝ «վերջի ժամանակի» նշանը» հոդվածները։
Ի՞նչ է նշանակում «ապոկալիպսիս» բառը
Հունարեն բառը, որը որոշ Աստվածաշնչերում թարգմանվել է «ապոկալիպսիս», բառացի նշանակում է «բացահայտել» կամ «հայտնաբերել»։ Հաճախ այն օգտագործվում է որևէ գաղտնի տեղեկություն բացահայտելու իմաստով։ Աստվածաշնչում խոսվում է «Տեր Հիսուսի հայտնության [կամ՝ ապոկալիպսիսի]» մասին, ինչը վերաբերում է այն ժամանակներին, երբ Հիսուսը զորությամբ կհայտնվի՝ վերացնելու չարությունը և վարձատրելու աստվածավախ մարդկանց (2 Թեսաղոնիկեցիներ 1։6, 7; 1 Պետրոս 1։7, 13)։
Աստվածաշնչի վերջին գիրքը կոչվում է «Ապոկալիպսիս» կամ «Հայտնություն», քանի որ այն հայտնում է, թե ինչ է լինելու ապագայում (Հայտնություն 1։1)։ Այս գիրքը մեզ բարի լուր է հայտնում և հույսով է լցնում (Հայտնություն 1։3)։ Այնտեղ կարդում ենք, որ Աստված վերացնելու է անարդարությունը և երկիրը վերածելու է դրախտի։ Այդ ժամանակ ո՛չ ցավ, ո՛չ տառապանք, ո՛չ էլ անգամ մահ չեն լինի (Հայտնություն 21։3, 4)։
Կցանկանայի՞ք ավելին իմանալ աստվածաշնչյան այս հրաշալի խոստման մասին։ Եհովայի վկաները Աստվածաշնչի անվճար ուսումնասիրություն են առաջարկում։ Հենց այսօր կարող եք կապ հաստատել նրանց հետ։