Յովսիան բարի ընկերներ զատեց

Ի՞նչ կ’ըսես. շիտակ բաներ ընելը դժուա՞ր է։— Գրեթէ ամէն մարդ կ’ըսէ որ դժուար է։ Սուրբ Գիրքին մէջ կայ Յովսիա անունով տղայ մը, որուն համար դժուար էր շիտակ բաներ ընելը։ Բայց ան բարի ընկերներ ունէր, որոնք իրեն օգնեցին։ Եկուր աւելի սորվինք Յովսիային եւ իր ընկերներուն մասին։

Յովսիային պապան՝ Ամոնը, Յուդայի թագաւորն էր։ Ամոնը շատ չար էր եւ արձաններ կը պաշտէր։ Երբ Ամոնը մեռաւ, իր տղան՝ Յովսիան թագաւոր եղաւ։ Բայց ան միայն ո՛ւթ տարեկան էր։ Ի՞նչ կ’ըսես. ան իր պապային պէս չա՞ր էր։— Ո՛չ, ան չար չէր։

Նոյնիսկ երբ դեռ շատ պզտիկ էր, Յովսիան կ’ուզէր Եհովային խօսքը մտիկ ընել։ Անոր համար ան զատեց ընկերներ, որոնք Եհովան կը սիրէին։ Եւ այս ընկերները Յովսիային օգնեցին որ շիտակ բաներ ընէ։ Յովսիային ընկերները որո՞նք էին։

Իր ընկերներէն մէկը Սոփոնիա մարգարէն էր։ Սոփոնիան Յուդայի մէջ ապրող մարդոց կ’ըսէր. «Եթէ արձաններ պաշտէք, ձեզի գէշ բաներ պիտի ըլլան»։ Յովսիան Սոփոնիային մտիկ ըրաւ եւ Եհովա՛ն պաշտեց, ոչ թէ արձանները։

Երեմիան ալ Յովսիային ընկերներէն մէկն էր։ Ան գրեթէ Յովսիային չափ էր։ Երեմիան եւ Յովսիան պզտիկ ատենէն իրարու քով կ’ապրէին։ Անոնք այնքան լաւ ընկերներ էին, որ երբ Յովսիան մեռաւ՝ Երեմիան իրեն համար երգ մը գրեց։ Երգին մէջ Երեմիան կ’ըսէր թէ որչա՜փ կը կարօտնար Յովսիային։ Երեմիան եւ Յովսիան իրարու օգնեցին որ շիտակ բաներ ընեն եւ Եհովային մտիկ ընեն։

Յովսիայէն ի՞նչ կը սորվիս։— Նոյնիսկ երբ դեռ պզտիկ էր, Յովսիան ուզեց շիտակ բաներ ընել։ Ան գիտէր, որ պէտք էր զատէր ընկերներ, որոնք Եհովա՛ն կը սիրէին։ Դուն ալ միշտ զատէ ընկերներ, որոնք Եհովան կը սիրեն եւ որոնք կրնան քեզի օգնել որ շիտա՛կ բաներ ընես։