Hari Empat, 17 Julai
Pangan endang seruran ngayanka pengerindu sida. Nama guna bisi kaban belayan enti sida enda enggau natka penusah?—J-lam. 17:17.
Maria, indai Jesus begunaka pengering ngambika ulih ngereja peneka Petara. Gambarka pengirau Maria lebuh Melikat Gabriel madahka iya deka betubuh-bisi, taja pan iya bedau kawin. Iya nadai kala bisi anak. Tang diatu, iya patut nyaga anak mit ke deka nyadi Messiah. Iya mega agi dara. Tang iya patut madah ngagai tunang iya Josep, iya betubuh-bisi. Tu tentu enda senang ke Maria. (Luk. 1:26-33) Pengawa ke diterima Maria nya tusah sereta luar biasa. Iya minta tulung ari orang bukai. Ambika chunto, iya nanya Melikat Gabriel mayuh agi penerang pasal pengawa nya. (Luk. 1:34) Enda lama pengudah nya, iya bejalai ngagai “nengeri ti bebukit” ba menua Judah, lalu ngabas kaban belayan iya Elisabet. Elisabet muji Maria, lalu nengah kuasa kudus Jehovah, Elisabet bekunsika jaku ti benabi ke meransang pasal anak Maria ke bedau ada. (Luk. 1:39-45) Maria madahka, Jehovah “udah ngereja utai ti besai ngena lengan Iya.” (Luk. 1:46-51) Jehovah ngeringka Maria nengah Gabriel enggau Elisabet. w23.10 14-15 ¶10-12
Hari Lima, 18 Julai
Iya ngaga kitai nyadi raja sereta imam ke Petara enggau Apai iya.—Pem. 1:6.
Sekeda ari bala murid Jesus udah dipilih ngena kuasa kudus. Penyampau sida nya 144,000 iku, lalu sida deka nyadi imam enggau Jesus ba serega. (Pem. 14:1) Endur ti Kudus ngambarka sida udah diambu Petara nyadi anak Iya lebuh sida agi ba dunya. (Rom. 8:15-17) Endur ti Pemadu Kudus ngambarka serega, endur alai Jehovah diau. “Kain tirai” ke nyerara Endur ti Kudus enggau Endur ti Pemadu Kudus ngambarka tubuh mensia Jesus. Seagi-agi iya bisi tubuh mensia, iya enda tau tama ngagai serega, lalu nyadi Imam Besai ba rumah sembiang rohani. Lebuh Jesus nyerahka tubuh mensia iya nyadika genselan tebus ke semua mensia, iya muka jalai ngambika 144,000 iku nya ulih ngagai serega. Kena ngulihka upah sida ba serega, sida mega patut ngelengkaka tubuh mensia sida.—Heb. 10:19, 20; 1 Kor. 15:50. w23.10 28 ¶13
Hari Enam, 19 Julai
Aku nadai chukup awak enti aku becherita pasal Gideon.—Heb. 11:32.
Gideon mengkang tenang lebuh orang Epraim ngutuk iya. (P-ulu. 8:1-3) Gideon enda nyaut sida enggau ati ti ringat. Gideon ngayanka diri baruh ati lebuh iya ningaka kompelin sida, lalu udah nya iya nelap lebuh bejaku enggau sida. Tu ngasuh situasi nya tenang. Bala tuai gempuru ti bepenemu-dalam neladan Gideon lebuh sida ninga enggau manah sereta nyaut enggau nelap enti dikutuk. (Jas. 3:13) Enggau nya bala tuai gempuru ulih nentuka penyerakup ba raban gempuru ulih mengkang dijaga. Lebuh orang bukai muji Gideon ketegal pemenang iya atas orang Midian, Gideon meri puji nya ngagai Jehovah. (P-ulu. 8:22, 23) Baka ni bala tuai gempuru ulih neladan Gideon? Sida patut meri puji ngagai Jehovah ketegal semua utai ke udah dijapai sida. (1 Kor. 4:6, 7) Ambika chunto, enti siku tuai gempuru dipuji ketegal pengelandik iya ngajar, iya ulih madahka pesan nya datai ari Jaku Petara, lalu semua kitai belajar ari gerempung Jehovah. Bala tuai gempuru ulih berunding sekalika chara sida ngajar mai mulia ngagai Jehovah tauka mai mulia ngagai diri empu. w23.06 4 ¶7-8