Tura na Manangngal nga Baggi

Meddù nga Minangngayâ Kani Jehova:

“Kannammuan nu i kinakurug anna yaw i mamalubbang nikamu,” kinagi ni Jesus. (Juan 8:32) Kurug tu makapagaram yaw! Wan, posible nga mannammuan i kinakurug maski ta “pangurianan ira nga aggaw,” nga napakaru i laddug. (2 Timoteo 3:1) Meraddammammu kari nu kannim nga ollu nga nagigiammu i kinakurug nga nepakanawag ta Biblia? Siguradu nga nagayayà ka turi ta nammuammu yatun!

Kurug tu importante nga mapeggan tu fustu nga pakannammu ta kinakurug anna regular nga ilayyagayya yatun, ngem mawag gapa tu mattoletam nga mekunnay tatun nga kinakurug. Tape makua yatun, mawag tu mattalupaddiattam ta ayâ na Dios. Anni i kasali taw? Masingattam i tabbag ta nekagi ni Jesus ta gabi nige na patena. Kinagina ta matalò nga apostolesna: “Nu parulattan nu i bili-bilik-ku, mannanayuk-kamu ta aya ku ta kunna pamarulo ku ta bili-bilin na Yamà anna pannanayuk-ku ta aya na.”​—Juan 15:10.

Daddammammu nga nattalupaddian si Jesus ta ayâ na Dios gukaban na panuttulna ta bili-bilin na Yamana. Kunnatun gapa nakuan i kuattam. Mawag tu inaggaw nga mattolay ittam mekunnay ta kinakurug tape makapattalupaddiattam ta ayâ na Dios. Tatun gabbalaman nga gabi, kinagi ni Jesus: “Sangoye ta ammu nu ngana ngamin danaw, mapalag kamu nu kuan nu ira.”​—Juan 13:17.

Iddanamammi nga makoffun nikaw yaw nga publikasion tape kanayummu nga meyaplika i kinakurug ta pattolem anna makapattalupaddiakka ta “aya na Dios” nga mangiddanama ta mannanayun nga inangò.​—Judas 21.