Parigan i Pangurugda
1. Anni i iyusa tam ta Paggigiammu na Kongregasion tu Biblia mamegafu ta ligguan na Oktubre 19?
1 Mamegafu ta ligguan na Oktubre 19, 2015, iyusa tam i libru nga Tularan ang Kanilang Pananampalataya (Parigan i Pangurugda) ta Paggigiammu na Kongregasion tu Biblia. Magigiammu taw nga publikasion i rekord na Biblia meyannung ta ehemplo na pangurug na 14 lallaki anna babbay. Nadisenio yaw nga gittana sigga-matolay ta nonò tam i matalò ira anna moffunattam nga masingan ira turi ta inarubadda i ziga-riga durante ta passerbida kani Jehova. Matudduattam gapa taw nga libru meyannung ta nerekord nga leksion ira nga meyapplika ta baggi tam ta maddaggun.—Heb. 6:12.
2. Iyesplika i karuan nga naddian ira na libru nga Parigan i Pangurugda.
2 Naddianna Ira: Egga i time line anna mapa ira taw nga libru nga makoffun nittam nga mammuan nu kanni anna nu sitaw nga nattolay i kada karakter. Fuera paga tatun, egga i ne-feature ta kada kapitulo nga “Pannonopan . . . ,” nga makoffun nittam nga nonopan tu mapia i leksion ira anna meyapplika i praktikal ira nga tuddu nga nagigiammutam. Aru gapa i nakoloran, detalyadu anna nausito tu mapia nga letratuna nga makoffun tapenu mabbalin tu matotolay i rekordna ira.
3. Anni i mawag nga kuattam tapenu mabenefisiowattam ta paggigiammu taw nga publikasion?
3 Nu Kunnasi Ka Mabenefisiowan: Kunnaw i ipagaram nittam na tura na Manangngal nga Baggi: “Usan i imahinasion anna panagenònu. Paray nakuan tu matagenònu i natagenò na karakter ira anna masingannu i nasingadda. Ikumpara nu kunnasida inarubang i tadday nga situasion ta posible nga kuammu nu sikaw i egga ta situasiodda.” Siempre, arianna gapa kayà kagian na pangiyusa tu imahinasion nga sossobrattam i kebalinanna, nu ari, tapenu masingan laman i kagian na Biblia anna maki-empatia ta karakter ira. Kawagan i tiempo anna pannonò tu mapia tapenu makua yaw. (Ne. 8:8) Nu mamegafu i leksion ta tangnga na kapitulo, repasuan labbì na mangiyorollu i nappasa nga leksion tu 30 addè ta 60 segundo. Awayyana nga mangiyusa tu tadday onu dua nga pakkiavu bilang repaso nu awan i feature nga “Pannonopan . . . ” ta nagigiammu.
4. Ngatta mawag tu gigiammuattam i libru nga Parigan i Pangurugda?
4 Inaggaw nga mattoletam ta mundo nga kayàna nga daralan onu pakafian i pangurug tam. Regalu ni Jehova yaw nga libru—kunne na gapa ta serye na Ang Bantayan nga nakebaseyanna—nga makoffun nittam nga mapasikan i pangurug tam. (San. 1:17) Approbetsattam yaw tu mapia gukaban na regular nga paki-study ta Paggigiammu na Kongregasion tu Biblia anna ta pakkomento durante nga gigiammuattam yaw nga publikasion!