MATTOLAY NGA CRISTIANO

Paginnolay—Nabbalin tu Posible Megafu ta Tavvu

Kabalin nga maddaddam i familia anna kokkofun ta biko na tadday nga kabataan nga babay nga aranni ngana matay, nabannayan i wagina ta pannono ta mappange nga paginnolay

Mangiyawa i tiempo na Memorial tu makasta nga oportunidad nittam nga masingan i mappange ira nga bendision nga nabbalin tu posible gukaban na tavvu, gitta na paginnolay. Ari vuluvuga ginakkag ni Jehova nga matay i tolay. Yari tu sobra nga matakitattam nu matay i tadday nga ideddukattam. (1Co 15:26) Natakitan si Jesus ta pakasinganna ta disipulosna nga tumatangi ta patay ni Lazaro. (Jn 11:33-35) Si Jesus i perfekto nga paningannan ta Yamana, yari tu masiguradu tam nga matakitan gapa si Jehova nga makasingan nittam nga marraddam ta patay na tadday nga ideddukattam. (Jn 14:7) Iinnaggan ni Jehova i tiempo sonu paginnolayanna i aripanna ira, anna kunnatun tam nakuan gapa.—Job 14:14, 15.

Megafu ta si Jehova ay Dios na unnug, rasonable laman nga kurugan nga organisado noka nga mesimmu i paginnolay. (1Co 14:33, 40) Imbes nga seremonia para ta natay, puede nga pangalawa ta napaginnolay ira i mesimmu. Nonopammu kari tu mapia i paginnolay, lalu ta tiempo na daddam? (2Co 4:17, 18) Mappabalo ka kari kani Jehova ta pangiyawana ta tavvu anna ta pangipakannammuna ta Katurakan nga mapaginnolay i natay?—Col 3:15.

Sinni ta kokkofun anna ta paparientesmu i kakayamu nga masingan uli?
Sinni ta karakter ira na Biblia i kakayamu nga mammammu anna makibbida onu makiergo?