Pakastan i Abilidad Tam ta Ministerio​—Efektibo nga Pangusa tu Pakkiavu Ira

NU NGATTA IMPORTANTE: Nu “i ginnonopan na futu na tolay ay kagitta na aralam nga dana-danum,” negitta gapa i pakkiavu ira ta pattagag tatun. (Pr 20:5) Makoffun i pakkiavu ira tapenu makipartisipa i kiyuvovug tam. Maruddu nga makeyawa tu mabalor nga informasion i tabbag ta napannonopan ira nga pakkiavu. Efektibo nga nangusa si Jesus tu pakkiavu ira. Kunnasi tam yaya maparigan?

NU KUNNASI NGA KUAN:

• Mangusa tu pakkiavu ira nga mamalattuag ta pagimamma. Nangusa si Jesus tu pakkiavu ira tapenu mammuan i pagimamma na disipulosna. (Mt 16:13-16; be-TG 238 ¶3-5) Anni ira nga pakkiavu i usammu?

• Mangusa tu pakkiavu ira nga mangidirekta ta tabbag. Tapenu itunung i appana-panono ni Pedro, nakkiavu si Jesus anna nangiyawa tu posible ira nga tabbag nga nangidirekta kani Pedro ta fustu nga konklusion. (Mt 17:24-26) Anni ira nga pakkiavu i usammu nga makoffun ta tadday nga makadde ta fustu nga konklusion?

• Komendan i kiyuvovug mu. Kinomendan ni Jesus i tadday nga eskriba turi ta “mapia i nitabbag na” sa. (Mr 12:34) Kunnasim komendan i tadday nga simibbag ta pakkiavu mu?

GIRAWAN I OLLU NGA PARTE NA VIDEO NGA KUAN I KINGNGUA NI JESUS—MATTUDDU, KABALINNA, TABBAGAN I TUMUNUG IRA NGA PAKKIAVU:

• Ngatta ari yaw makasta nga ehemplo ta pattuddu, maski nu fustu gapa i ituttudduna?

• Ngatta ari laman tu basta mangiyesplika tu informasion i kuattam?

GIRAWAN I MEKADUA NGA PARTE NA VIDEO, KABALINNA, TABBAGAN I TUMUNUG IRA NGA PAKKIAVU:

• Kunnasi nga efektibo nga nangusa i wagi tu pakkiavu ira?

• Anni paga ira nga aspeto na pattudduna i maparigattam?