MATTOLAY NGA CRISTIANO
Mepasingattam i Aya Tam ta Zinagun ira nga Kombension
Ngatta fermi nga magayayya ittam ta kada kombensiottam kada ragun? Kagitta na Israel gari, makavulu tam nga maddayaw kani Jehova i ginatu onu rinivu paga lagu nga kapangngurug tam ta kombensiottam ira ta kaggawattam. Kakayà tam i napakaru nga nespirituan nga makan. Tagibalorattam gapa i tiempo nga makavulu tam i kokkofuttam anna familia tam. Gafu taw, kakayà tam nga magatende ta tallu-aggaw nga kombensiottam.
Kada maggarammammung ittam, nonopattam ari laman i pammakapianattam, nu ari, nu kunnasi tam nga mepasingan i aya tam ta tanakuan. (Gal 6:10; Heb 10:24, 25) Nu ipavvuka tam tu puerta i wawwaragi tam onu mangireserba ittam laman tu pagitubangngan nga kawagattam, nononopattam i pammakapianan na tanakuan. (Fil 2:3, 4) Makasimmu ittam tu bagu ira nga kokkofun ta kombensiottam ira. Nige anna kabalin na programa anna ta oras na pakkakan, awayya tam makiyammammu ta tanakuan. (2Co 6:13) Awayyana nga mabbalin tu kofuttam ta mannanayun i mammammu tam ira! Importante ta ngamin, nu masingan na totolay nga ipasa-pasingattam i kurug nga aya, awayyana nga mapaguyu gapa ira nga masserbi kani Jehova.—Jn 13:35.
GIRAWAN I VIDEO NGA MANNANAYUN I AYA! NGA INTERNASIONAL IRA NGA KOMBENSION, KABALINNA, TABBAGAN I TUMUNUG IRA NGA PAKKIAVU:
Kunnasi nga nepasingan i aya ta delegadu ira ta 2019 internasional ira nga kombension?
Ngatta kappabbaw i pattaradday anna pakka-aya-aya na totolay ni Jehova?
Anni ira nga aspeto na nacristianuan nga aya i nipasigo na miembro ira na Manangngal nga Baggi?
Kunnasim gapa mepasingan i aya mu nu kombension?
Kunnasi nga navviktoria i nacristianuan nga aya ta Germany anna South Korea?
Anni nakuan i determinasiottam?