7 Prinsipio

I KEBALINANNA

I prinsipio ay personal ira nga estandarte nga pinilim nga tuttulan. Angngariganna, ikagumammu kari nga mabbalin tu mapattalakkan kanayun? Siguradu nga ikaya mu gapa nga ituddu yatun ta ána mu.

Nelagum gapa ta prinsipio i makasta ira nga estandarte. Angngariganna, i tolay nga makasta i ugalina ay malappo, ari mangireruma, anna makonsiderasion​—ugali ira nga makasta nga magigiammu ta kabbing paga laman.

PRINSIPIO NA BIBLIA: “Sanayammu i abbing ta dalan nga mawag tu angngayanna; maski nu mallakay yayya ay arianna yatun panawan.”​—Proverbio 22:6.

I IMPORTANSIANA

Ta papprogreso na teknolohia, nabalor i moral ira nga prinsipio. “Makasimmu tu marake ira nga influwensia ta gadget maski anni nga oras,” kagian na yena nga si Karyn. “Awayyana nga agga-biko tam laman i ána tam ngem maggigiraw ira tu ari mepappangngo!”

PRINSIPIO NA BIBLIA: “Napenam ngana [i manakam ira] nga maningan ta nadduman na mapia anna marakay.”​—Hebreo 5:14.

Nabalor gapa i makasta ira nga ugali. Kasali tatun i kinasippo (kagitta na simple nga pakkagi tu “fabor bi” anna “mabbalo”) anna pangikavurung ta tanakuan—ugali nga ari ngana popular megafu ta mas interesadu ngana i totolay ta gadget ira anne ta kasittoleda.

PRINSIPIO NA BIBLIA: “Kuan nu ta ikattolay nu i ikaya nu nga kuad-da nikamu.”​—Lucas 6:31.

I MAKUAM

Ikagim i moral ira nga prinsipiom. Angngariganna, ipasingan na research nga mas lillitan na tinedyer ira i paki-sex nige na kasal nu manawag nga netuddu nira nga marake yatun.

SUHESTION: Mangusa tu bagu nga balita tapenu makegafu tu paggiristoria meyannung ta prinsipio. Angngariganna, nu egga nesimmu nga krimen, awayyam kagian: “Kananassing i makua na tolay megafu ta porayda. Ngatta tamma kunnatun i nabbalinadda?”

“Mariga para ta ána ira nga mappili ta mapia anna marake nu kadda ammu i mapia ta marake.”​—Brandon.

Ituddu i makasta ira nga ugali. Awayya magigiammu maski na abbarabbing i makkagi tu “fabor bi” anna “mabbalo” anna i pangirespeto ta tanakuan. “Nu masingi-singan na ána nga parte ira na familia, eskuela, anna na komunidad, mas massissippo ira ta ngamin, ari laman tu ta baggida,” kagian na libru nga Parenting Without Borders.

SUHESTION: Iddan i ána mu tu trabahu ta balay tapenu magigiammuda i masserbi ta tanakuan.

“Nu nasanay i ánami nga mattrabahu ta balay, kadda ngana makaddag sonu mesina ira. Mabbalin tu normal ngana laman nira i pangattu tu responsibilidad.”​—Tara.