12 Goal

I KEBALINANNA

I goal ay ari laman tu basta ambision​—gannug nga iddanamammu nga mesimmu. Tapenu madde i goal ira, mawag i papplano, pakibagay, anna pallallappo.

Egga ira simple nga goal (metuppal ta piga aggaw, ligguan, onu vulan) anna darakal ira nga goal (metuppal ta tanga-ragun onu mabayag paga). Awayyana madde i darakal ira nga goal nu pegafuanan ta simple ira nga goal.

I IMPORTANSIANA

Nu metuppal mu i goal mu ira, massikan i komfiansam, malladda i pakikkofummu, anna mas magayayya ka.

Komfiansa ta baggi: Nu nadde mu i baraddi nga goal mu, makkomfiansa ka nga ituppal i darakal nga goal. Ariammu gapa maganassing nga arubangan i kapurueba ira ta kadaggaw​—kagitta na pamipilit na kakavvulu.

Pakikkofun: Kakayà na totolay nga kavulu danuri egga goal-da​—danuri ammuda i kayàda anna kukukuadda yatun. Tapenu mapaladda i pakikkofun, makasta nu makipattrabahu ta tadday nga kaparehum tu goal.

Pagayayya: Nu egga ira goal mu anna netuppal mu danatun, magayayya ka.

“Kakayà ku nu egga goal ku. Okupadu ngà kanayun anna egga agga-nono ku nga ituppal. Nu madde mu i goal mu, masaya nga nonopan tapus kagiammu, ‘Wow, nabalikku! Netuppal ku i pinlanò.’”​—Christopher.

PRINSIPIO NA BIBLIA: “Nu innaggammu i paddag anna i tiempo nga makasta, ari ka vuluvuga makapammula anna ari ka vuluvuga maka-apit.”​—Eclesiastes 11:4, Today’s English Version.

I MAKUAM

Kuan danaw nga dakkua tapenu metuppal i goal mu ira.

Ammuan. Ilista i posible ira nga goal anna iprayoridad danatun. Pilian i ikaya mu pagolluan anna i itunug mu ira tatun.

Mapplano. Ta kada goal, kuan i tumunug:

• Mangipay tu realistiko nga deadline.

• Iplano nu kunnasi kuan yatun.

• Nonopan i makefugag ira, anna nu kunnasi arubangan danatun.

Ituppal. Ariammu innaggan i ngamin nga detalye nigem mamegafu. Iyavu ta baggim, ‘Anni i ollu nga makuà tapenu madde ku i goal ku?’ Kuan yatun. Obserban i netuppal mu ta kada dakkua.

PRINSIPIO NA BIBLIA: “I plano ira na matalikarag ay siguradu nga makasta i pattuppalanna.”​—Proverbio 21:5.