Anni i Efekto na Gadyet ta Pagatawam?
Nu mepangngo i pangusa na magatawa ira ta gadyet da, mapaladda naw i relasiodda. Angngarigan na, makumusta da i kataggi-tadday ta interu aggaw.
Ngem megafu ta gadyet, posible nga . . .
mofu i oras da taw nga para nakuan ta kataggi-tadday.
makatraba-trabahu lapa ira maski nakalabbe ngana ira.
makkasuspecha ira anna mabbalin ira tu ari matalo.
I MAWAG NGA MAMMUAMMU
TIEMPO TA KATAGGI-TADDAY
Kagian ni Michael: “Nu mittan, maski makkavulu kami na atawà, gitta na awan yayya. Makases-cellphone yayya tapus kunna, ‘Sangawè lang lagu iningan i cellphone ku.’” Kagian ni Jonathan nga nu kunnatun i situasion, “makkavulu i magatawa ngem gitta na makka-arayyu ira.”
NONOPAMMU: Mamippiga ngana nga naka-istorbo i tawag, text, onu notification ta pagistoria nu na atawam?—EFESO 5:33.
TRABAHU
Egga ira i karuan nga mawag tu kanayun nga available megafu ta klase na trabahu da. Ngem maski ari mabba tu kunnatun i trabahu na karuan, makatraba-trabahu lapa ira maski nakalabbe ngana ira. “Makacheche-check ngà tu tawag onu text maggafu ta trabahù ta oras nga para ngana nakuan ta atawà,” kagian ni Lee. Kagian ni Joy: “Maw-work from home ngà yayya nga ari ku ammu nu kannì iyemmang i trabahù. Maziga i mabbalin tu balanse.”
NONOPAMMU: Maggigginna ka kari tu mapia nu kikkibbidan naka na atawam?—LUCAS 8:18.
KINAMATALO
Aru i nakkagi nga kiniddama da i atawa da megafu ta passuspechadda i kukukuan na ta social media na. Inamin gapa na karuan ta nira nga egga i ni-post da ta online nga ari nga masingan na atawa da.
Aru i mangurug nga kuruga delikadu ta magatawa i social media. Megafu ta social media, mapaleg laman ta magatawa i mamabay onu makilalaki. Ari gafu tu kakkadda-kaddag nga kagian na abugadu ira nga social media i makagafu ta passina na aru nga magatawa.
NONOPAMMU: Itatagum kari ta atawam i pakibbidam ta tanakuan nga babay onu lalaki?—PROVERBIO 4:23.
I MAKUAM
AMMUAMMU I PRAYORIDAD MU
Nu awan tu oras mu nga kuman, makkaproblema ka ta gawa-gawayyammu. Nu awan gapa tu oras mu ta atawam, makkaproblema kamu.—Efeso 5:28, 29.
PRINSIPIO NA BIBLIA: “Pilian i kapianan ta ngamin.”—FILIPOS 1:10.
Pabbidan nu nga magatawa i kayà nu ira nga purueban, onu itura nu i kayà nu ira nga kuan tapenu ari nga madaral na gadyet i pagatawa nu.
Ikagumammi nga kuman tu makkavulu maski mittan ta tangaggaw
Mangiskediul kami tu oras nga ari mi usan i gadyet mi
Ilagum mi ta iskediul mi i pad-date tapenu magenjoy kami
Addappammi i gadyet mi ira nu gabi anna iyarayyu mi ta pakkatrugammi
Ari mi nga usan i gadyet mi ta maski 15 minuto kadaggaw tapenu ari kami nga maistorbo nu makka-istoria kami
Ari kami nga maginternet ta espesipiko nga oras ta kadaggaw