Anni i Makua ta Panga nga Ofisina?

Mattrabahu ta nadduruma nga departamento i miembro ira na familia na Bethel nga mangasikasu tu pallayyagayya nga trabahu ta tadday onu aru paga nga nasion. Tagabalittag i karuan nira. Egga gapa mattrabahu ta pagimprentan, bodega na literatura, magangngua tu audio anna video, onu tanakuan paga nga gannug para ta rehion.

Iyorolluan na Komite na Panga i aktibidad ira. Netiwala na Manangngal nga Baggi i pagandar na kada panga nga ofisina ta Komite na Panga (Branch Committee). Tallu onu aru paga nga kualipikadu nga mannakam i miembro natun. Ireport na komite ta Manangngal nga Baggi i napprogresowan na aktibidad kunne na gapa ta posible nga problema ta kada lugar nga sakupna. Yatun ira nga report i manguffun ta Manangngal nga Baggi nga maddesision nu anni ira nga topiko i mepay ta publikasion, ta study anna ta asembli ira. Egga gapa Representante na Manangngal nga Baggi nga regular nga mabbisita ta panga nga ofisina ira. Mangiyawa ira tu giya ta Komite na Panga nu kunnasida metuppal i responsabilidadda ira. (Proverbio 11:14) Egga espesial nga programa kunne na gapa i palappa na representante na hedkuarter nga mappagaram ta egga ira ta sakup na panga nga ofisina.

Masuportan i lokal nga kongregasion. Apruban na responsable nga wawwagi ta panga nga ofisina i pabbuu tu bagu ira nga kongregasion. Asikasuadda paga i aktibidad ira na payunir, misionero anna manangngal ta sirkito nga masserbi ta lugar ira nga sakup na panga nga ofisina. Ira i mangorganisa ta asembli anna kombension. Ira i mangasikasu ta kepataddag na bagu ira nga Kingdom Hall. Siguraduadda paga nga nepatulug ta ngaming nga kongregasion i kawagadda nga literatura. Makoffun ngaming nga trabahu ta panga nga ofisina tapenu monnug nga metuppal i trabahu nga pallayyagayya.​—1 Corinto 14:33, 40.

• Kunnasi nga uffunan na Komite na Panga i Manangngal nga Baggi?

• Anni ira i maasikasu ta panga nga ofisina?