Kunnasim Makannammuan i Fustu nga Relihion?

1. Tattadday kari i fustu nga relihion?

Tadday lamang i relihion tu nituddu ni Jesus ta taga-tuttul na ira​—i fustu nga relihion. Kagitta yaw na dalan nga mappange ta inango nga mannanayun. Kinagi ni Jesus: “Baddi i makaleg” tatun nga dalan. (Mateo 7:14) Alawatan na laman na Dios i paddaya-rayaw nga nebase ta kinakurug nga ituddu na Biblia. Pattaraddayan na tadday nga angngurug i ngamin nga fustu nga Cristiano.​—Bibbigammu i Juan 4:23, 24; 14:6; Efeso 4:4, 5.

Girawan i video nga Akseptan Kari na Dios i Ngamin nga Klase na Paddayaw?

2. Anni i kinagi ni Jesus meyannung ta falsu nga Cristiano?

Kinagi ni Jesus tu magimugug ittam ta mangitallung i laddug ira nga profeta tu falsu nga tuddu ta Cristianismo. Ta ollu nga paningan, gitta da i fustu nga Cristiano. Kagiadda paga tu Cristiano i relihiodda. Ngem awayyam nga kannammuan nu talaga fustu ira. Kunnasi? I fustu nga paddaya-rayaw lamang i paggafuanan na fustu ira nga Kristiano. Makannammuammu ira ta ugu-ugali anna klase na pattolayda.​—Bibbigammu i Mateo 7:13-23.

3. Kunnasim makannammuan i fustu ira nga Cristiano?

Didiamummu i lima nga seniales:

• Irespetu na fustu nga Cristiano i Biblia tu Uvovug na Dios. Mattolay ira gukaban na prinsipio na Biblia. Yari gavu tu neruma i fustu nga relihion ta relihion nga nebase laman ta doctrina na totolay. (Mateo 15:7-9) Nu anni i ilayya-gayya ira na fustu nga Cristiano, yatun lagapa i kukukuadda.​—Bibbigammu i Juan 17:17; 2 Timoteo 3:16, 17.

• 

  I fustu nga Cristiano dayawadda i ngagan na Dios—Jehova. Dinayaw ni Jesus i ngagan na Dios gukaban na pangi-pakannammuna ta ngagan ni Jehova. Dinuffunanna i totolay nga makannammuadda i Dios anna tinudduanna ira tu ipakimalloda nu kunna si nga medayaw i ngagan na Dios. (Mateo 6:9) Ta lugar nu, anni nga relihion i mangi-yammammu ta ngagan na Dios?​—Bibbigammu i Juan 17:26; Roma 10:13, 14.

• Ilayya-gayya na fustu nga Cristiano i Pappatulan na Dios. Zinog na Dios si Jesus tapenu ilayya-gayyana i mapia nga balita na Pappatulan. I Pappatulan na Dios i tattadday laman tu iddanama na totolay. Nilayya-gayya ni Jesus yaw adde ta aggaw na patayna. (Lucas 4:43; 8:1; 23:42, 43) Kinagina nga ilayya-gayya yaw na disipulo na. Nu egga i makibbida onu maki-ergo niko meyannung ta Pappatulan na Dios, anni tamma i ammum tu relihionna?​—Bibbigammu i Mateo 24:14.

• Ari tu parte na marakay nga mundo i Cristiano ira. Ari ira makipartisipa ta pulitika, ta protesta anna gulu-gulu na mundo. (Juan 17:16; 18:36) Ariadda gapa paparigan i marakay nga anangngua anna ugu-ugali na totolay ta mundo.​—Bibbigammu i Santiago 4:4.

• I fustu nga Cristiano egga i neruma-ruma nga ayâda ta kataggi-tadday. Nadidiamuda ta Uvovug na Dios nu kunnasi nga irespetu i totolay maski paga anni rasa na. Kanayun nga sumuporta i falsu nga relihion ta gegerra. Ngem ari vuluvuga massuporta tatung i fustu nga Cristiano. (Mikas 4:1-3) Usadda lallagu i tiempu anna kuartuda nga manuffun ta tanakuan tapenu mapasikang i angngurugda.​—Bibbigammu i Juan 13:34, 35; 1 Juan 4:20.

4. Makannammuammu kari nu anni i fustu nga relihion?

Anni nga relihion i nebase ta Uvovug na Dios i tudduda, mangidadayaw ta ngagan na Dios anna mangilayya-gayya tu i Pappatulan na Dios i tattadday laman nga iddanama na totolay? Anni nga relihion i mangipaspasingan tu neruma-ruma nga ayâ anna ari tu sumuporta ta gegerra? Anni makagim?​—Bibbigammu i 1 Juan 3:10-12.