Mawawan Kari Noka i Ziga-riga?

I KAGIAN NA BIBLIA

“Funatan na Dios i ngamin nga lulua ta matada, anna awan ngana noka i patay, ziga-riga, tangi-tangi, onu magattam tu taki.”​—Nepakannammu 21:3, 4, Contemporary English Version.

ANNI MEUFFUNNA NU KURUGAMMU

Makasiguraduka nga ari tu i Dios i makagafu ta problemam ira.​—Santiago 1:13.

Mabannabannayangka nga mammuan tu matakitan i Dios nu mazziga-rigaka.​—Zacarias 2:8.

Mepeggangka tu iddanama nga mawawan ngamin ziga-riga.​—Salmo 37:9-11.

KURUGATTAM KARI I KAGIAN NA BIBLIA?

Wan, gafu ta dua nga rason:

• Kalussaw na Dios i ziga-riga anna kawan na hustisia. Nonoppammu i natageno ni Jehova nga Dios turi ta firmi nga naparigatan danuri nasserbi nisa tagga ta tiempu na Biblia. Kinagi na Biblia nga kuruga natakitan yayya gafu ta “ngamin nga nanattazzi nira.”​—Salmo 106:45, 46, I Bagu nga Pakkasinabban anna Salmo Ira.

  Kalussaw na Dios danuri i mamarpariga ta kasittolayda. Angngariganna, kagian na Biblia tu kalussaw na Dios “danuri . . . minammapatay.”​—Nepakannammu 21:8.

• Ikavurungan na Dios i kataggi-tadday nittam. Ari lamang tu sikaw i makannammu ta ‘ngamin nga kavurungammu’ ammu gapa yatun ni Jehova!​—1 Pedro 5:7.

  Aranni ngana nga wawanan ni Jehova i ziga-riga na kataggi-tadday gukaban na Pappatulanna. (Mateo 6:9, 10) Ngem ta maddaggun, bannabannayanna mabbi danuri i magala-aleg nisa.​—Kingngua 17: 27; 2 Corinto 1:3, 4.