Maketuddu nga Ilustrasion

Mateo 13:34, 35

SUMARIO: Pakastan i panuddum gukaban na pangusa tu simple ira nga ilustrasion nga makapa-interes ta maggigginna anna mangituddu tu importante ira nga punto.

NU KUNNASI NGA KUAN:

• Mangusa tu simple ira nga ilustrasion. Kagitta ni Jesus, mangusa tu baraddi nga gannug tapenu ipakanawag i darakal nga gannug, anna simple ira nga gannug tapenu ipakanawag i mariga ira nga gannug. Ariammu mangiyammung tu ari kawagan nga detalye nga mamakkomplikadu ta ilustrasion. Siguraduan nga talaga konektadu i ilustrasion ta leksion nga ituddum tapenu ari maguluan i maggigginna ta detalye ira nga awan mabba tu koneksionna.

• Sigga-nono ka nakuan ta maggigginna. Mappili tu ilustrasion nga egga koneksionna ta kukukuan anna paginteresan na maggigginna. Magimmugug tapenu ari nga mamasirang onu makataki nira i ilustrasiommu.

• Ituddu i pinakapunto. Maffokus ta pangiyilustra ta pinakapunto, ari nga ta baraddi nga detalye. Siguraduan nga meraddamman na maggigginna i leksion, ari laman tu i ilustrasion.