LEKSION 08
Awayyam i Mabbalin tu Kofun ni Jehova
Kayà ni Jehova nga mas makilalam yayya. Ngatta? Ekspektan ni Jehova nga nu gigiammuammu i kualidadna ira, i pattratuna ta totolay, anna i gakkagna, mas kayà mu nga mabbalin tu kofun yayya. Posible kari nga mabbalin tu kofummu i Dios? (Bibbigan i Salmo 25:14.) Anni i awayyam kuan tapenu mabbalin tu kofunna? Tabbagan na Biblia yatun ira nga pakkiavu anna magigiammum tatun nu ngatta si Jehova i kapianan nga kofun.
1. Anni i kayà ni Jehova nga kuammu?
“Umaranni kamu ta Dios, ay umaranni yaya nikamu.” (Santiago 4:8) Anni i kayà kagian natun? Kayà ni Jehova nga mabbalikka tu kofunna. Marigatan i karuan nga makikkofun ta Dios megafu ta ariadda yayya nga masingan. Ngem mabibbig tam ta Biblia i ngamin nga kualidad ni Jehova nga mamaddukko nittam ta nisa. Nu bibbigattam ta Biblia i mensahe na Dios, mas maddukko ittam kani Jehova maski nu ariattam yayya masingan.
2. Ngatta si Jehova i kapianan nga Kofun?
Awan tu kagitta na pangiddu ni Jehova nikaw. Kayàna nga magayayya ka anna mappoffukka nisa maski anni nga oras. “Ipammakatalo nu sa ngamin i kavurungan nu ta yaya i manangngal nikamu.” (1 Pedro 5:7) Kanayun nga suportan, banna-bannayan, anna ginnan ni Jehova i kokkofunna.—Bibbigan i Salmo 94:18, 19.
3. Anni i kayà ni Jehova nga kuan na kokkofunna?
Iddukan ni Jehova i ngamin nga totolay, “ngem madukko nga kofunna i matunung ira.” (Proverbio 3:32) Ekspektan ni Jehova nga kuan na kokkofunna i mapia ta pagimammana anna lillitadda nga kuan i marake. Nonopan na karuan nga ariadda matuttul i estandarte ira ni Jehova ta mapia anna marake. Ngem minangngikallo si Jehova, yatutta alawatanna i ngamin nga kurug nga mangiddu nisa anna mangikaguman nga pagayayyatan yayya.—Salmo 147:11; Kingngua 10:34, 35.
GIGIAMMUAN I ARU PAGA
Gigiammuan nu anni paga i makuam tapenu mabbalin tu kofummu si Jehova, anna nu ngatta ta yayya i kapianan nga Kofun.
4. Kofun ni Jehova si Abraham
Makoffun i mabibbig tam ta Biblia meyannung kani Abraham (magalan gapa tu Abram) nu kunnasi ittam mabbalin tu kofun na Dios. Bibbigan i meyannung kani Abraham ta Genesis 12:1-4. Kabalinna, paguvovugan yaw ira nga pakkiavu:
Anni i nipakua ni Jehova kani Abraham?
Anni i nipromesa ni Jehova nisa?
Anni i kingngua ni Abraham ta nikiddaw ira ni Jehova nga kuanna?
5. Nu anni i kayà ni Jehova nga kuan na kokkofunna
Egga ira i ekspektattam nga kuan na kokkofuttam para nittam.
Anni yatun nga ekspektattam ira ta kokkofuttam?
Bibbigan i 1 Juan 5:3, anna paguvovugan yaw nga pakkiavu:
Anni i ekspektan ni Jehova nga kuan na kokkofunna?
Tapenu matuttul tam si Jehova, kawagan nga uliattam i kondukta onu i ugali tam. Bibbigan i Isaias 48:17, 18, anna paguvovugan yaw nga pakkiavu:
Ngatta ikiddaw ni Jehova ta kokkofunna nga magangngua ira tu panguli?
Ipanono na mapia nga kofun i gannug ira nga mapprotekta anna makoffun nittam. Kunnatun i kukukuan ni Jehova ta kokkofunna
6. Nu kunnasi nga uffunan ni Jehova i kokkofunna
Uffunan ni Jehova i kokkofunna nga maarubang i problemada ira. Girawan i VIDEO, anna paguvovugan i tumunug nga pakkiavu.
Kunnasi nga inuffunan ni Jehova i babay ta video nga kontrolan i negatibo nga appana-panono anna panagenona?
Bibbigan i Isaias 41:10, 13, anna paguvovugan yaw ira nga pakkiavu:
Anni i nipromesa ni Jehova nga kuanna para ta kokkofunna?
Para nikaw mapia kari nga Kofun si Jehova? Ngatta?
Uffunan naka na madukko ira nga kofummu. Uffunan naka gapa ni Jehova
7. Tapenu mabbalin tu kofuttam si Jehova, mawag nga makiyuvovug anna magginna ittam nisa
Mas maddukko i makkofun nu kanayun ira mabbida. Bibbigan i Salmo 86:6, 11, anna paguvovugan yaw ira nga pakkiavu:
Kunnasi ittam makiyuvovug kani Jehova?
Kunnasi makiyuvovug si Jehova nittam?
Makiyuvovug ittam kani Jehova gukaban na pakimallo; anna makiyuvovug gapa nittam si Jehova gukaban na Biblia
I KAGIAN NA KARUAN: “Imposible nga mabbalin tu kofuttam i Dios.”
Anni nga teksto i mamakurug nga awayya tam mabbalin tu kofun ni Jehova?
ANNI I NAGIGIAMMUM?
Kayà ni Jehova nga mabbalikka tu Kofunna, anna uffunan naka nga mabbalin tu madukko nisa.
Review
Kunnasi nga uffunan ni Jehova i kokkofunna?
Ngatta ekspektan ni Jehova nga magangngua tu panguli i kokkofunna?
Sobra kari i ekspektan ni Jehova ta kokkofunna? Ngatta?
I AWAYYAM PAGA KUAN
Kunnasi afektan na pakikkofun ta Dios i pattolem?
“Si Jehova—I Dios nga Mepangngo nga Ammuattam” (Passifusifutan, Pebrero 15, 2003)
Gigiammuan nu kunnasim mabbalin tu kofun i Dios.
Innan nu kunnasi nakkasta i pattolay na tadday nga babay megafu ta pakikkofunna kani Jehova.
Girawan nu anni i matageno na kabataan ira kani Jehova.