Inagalan Yaya ni Jehova tu “Kofukku”

1, 2. (a) Ngatta makagi tam nga awayya na totolay nga makikofun ta Dios? (b) Anni i gigiammuattam taw nga artikulo?

“MAMEGAFU ta kabbing tam adde ta patay tam, kuruga kawagattam i aya.” Kawagan na totolay i aya na kofun, ari laman tu romantiko nga aya. Kayà tam nga egga kofun anna kakavvulu tam. Ngem egga tadday nga klase na aya nga mas kawagattam​—i aya ni Jehova. Aru i ari mangurug nga awayya makikofun na totolay ta minangngaya nga Katannangan nga Dios megafu ta Espiritu yaya nga ari masingan anna egga yaya ta langi. Ngem ariattam kurugan yatun!

² Ta Biblia, aru nga imperfekto nga totolay i nabbalin tu kofun na Dios. Makasta nga pannonopan i ehemploda megafu ta i pakikofun ta Dios i pinakamabalor nga awayya tam addetan ta pattolay. Si Abraham i tadday ta kapianan nga ehemplo. (Bibbigan i Santiago 2:23.) Kunnasi nga nabbalin si Abraham tu kofun ni Jehova? Pangurug i primero nga rason. Kakuruganna, si Abraham “i yama na ngamin nga mangurug ta Dios,” segun ta Biblia. (Roma 4:11) Innattam nu kunnasi nga nakoffun i pangurug ni Abraham ta pakikofunna ta Dios. Makasta nu iyavu tam, ‘Kunnasì nga maparigan i pangurug ni Abraham tapenu mapaladdà i pakikofukku kani Jehova?’

KUNNASI NGA NABBALIN SI ABRAHAM NGA KOFUN NI JEHOVA?

3, 4. (a) Anni i pinakamariga nga kapurueba ta pangurug ni Abraham? (b) Ngatta sigga-paran si Abraham nga itavvung si Isaac?

³ Nonopammu i tadday nga lakay nga munu-mune ta bakulug. Siguradu nga yaw i pinakamariga nga kuanna ta interu nga pattolena. Ngem ari nga megafu ta edadna. Masikan paga si Abraham maski nu ma-125 anios ngana yaya.^[1] Dumaddaddang sa i mabbing nga anana nga si Isaac, nga awayyana tu 25 anios ngana. Agga-kattu yaya tu kayu nga padduppang. Nangivulu si Abraham tu kutsilyu anna pappakaddul tu afi. Kiniddaw sa ni Jehova nga itavvunna i mismu nga anana!—Gen. 22:1-8.

⁴ Awayyana tu yatun i pinakamariga nga kapurueba ta pangurug ni Abraham. Egga ira makkagi nga marake i Dios megafu ta kiniddona yatun kani Abraham. Aru gapa i makkagi nga nattuppal si Abraham megafu ta arianna ammu i kukukuanna anna arianna pinannonopan. Kunnatun i kagiadda megafu ta awan tu pangurugda anna ariadda ammu i importansia na pangurug. (1 Cor. 2:14-16) Ari tu basta ngana laman nattuppal si Abraham, nu ari, megafu ta egga pakalippawana. Megafu ta napafutuan i pangurugna, nalippawana nga ari pulus nga kiddawan ni Jehova ta aripanna i maski anni nga gannug nga permanente nga makadaral nira. Ammu ni Abraham nga nu mattuppal yaya kani Jehova, bala-balakkanna yaya tuange ta ideddukanna nga ana. Anni i nakebaseyanna yatun nga pangurug? Ta pakannammu anna ekspiriensa.

5. Kunnasi nga posible nga nammammu ni Abraham si Jehova? Anni i efektona sa yatun nga pakannammu?

⁵ Pakannammu. Maski nu ziminakal si Abraham ta Ur, nga napappannu tu idolatria, anna maski nu maddayarayaw gapa ta idolo si Tera nga yamana, nammammuna lagapa si Jehova. Kunnasi? (Jos. 24:2) Ari nga kinagi na Biblia, ngem ipasinganna nga si Abraham i meka-siam ta henerasion nga naggafu kani Sem, lalaki nga maladda i pangurugna, nga tadday ta ána ni Noe. Natay si Sem turi ta 150 anios ngana si Abraham. Ariattam siguradu nu kani Sem nga nakannammuan ni Abraham si Jehova. Ngem siguradu nga neyistoria ni Sem ta familiana i meyannung kani Jehova. Posible nga nammuan yatun ni Abraham anna nadde i futuna. Inidduna i Dios nga nammammuna. Yatun nga pakannammu i nakoffun sa nga mapeggan tu pangurug.

6, 7. Anni ira nga ekspiriensa i namaladda ta pangurug ni Abraham kani Jehova?

⁶ Ekspiriensa. Anni nga ekspiriensa i namaladda ta pangurug ni Abraham kani Jehova? Egga ira makkagi nga afektan na nono i panageno, tapus kuattam gapa nu anni i matageno tam. Napaguyu i futu ni Abraham megafu ta nagigiammuna meyannung ta Dios. Yatun i rason nu ngatta monag nga nirespetona “si Jehova, i Katannangan nga Dios, nga Namaratu ta langi anna davvun.” (Gen. 14:22) ‘Pakimoray’ [“paganassing ta Dios,” NW] yatun segun ta Biblia. Importante i paganassing ta Dios tapenu mabbalittam tu kofunna. (Heb. 5:7; Sal. 25:14) Yatun i namaguyu kani Abraham nga mattuppal ta Dios.

⁷ Kinagi na Dios kani Abraham anni Sara nga panawadda i Ur anna magali ta tanakuan nga lugar. Maddiadda ngana laman ta tolda. Megafu ta pattuppal ni Abraham, vinukatanna i dalan tapenu bendisionan anna protektan yaya ni Jehova. Angngariganna, naganassing si Abraham nga baka apadda sa i guapa nga atawana nga si Sara, tapus patayadda yaya. Kananassing gapa talaga yatun ngem ari tu yatun i rason tapenu ari yaya mattuppal ta Dios. Ari laman tu mittan nga nagguyu si Jehova anna milagro nga pinrotektanna da Abraham anni Sara. (Gen. 20:2-7, 10-12, 17, 18) Yatun ira nga ekspiriensa i namaladda ta pangurug ni Abraham.

8. Kunnasi tam nga mapeggan tu pakannammu anna ekspiriensa nga mamaladda ta pakikofuttam kani Jehova?

⁸ Awayya tam kari makikofun kani Jehova? Wan! Abundansia i pakannammu anna ekspiriensa nga kawagattam. Ta kaggawattam, mas aru i mala tam nga pakannammu ta Biblia anne ta ammu ni Abraham. (Dan. 12:4; Roma 11:33) Napappannu i Biblia tu pakannammu meyannung ta “Namaratu ta langi anna ta davvun.” I magigiammu tam i mamaguyu nittam nga irespeto anna ayatan si Jehova nga yatun gapa i mamaguyu nittam nga mattuppal sa. Mapeggan ittam tu ekspiriensa megafu ta masingattam nu kunnasina ittam protektan, bendisionan, anna pagaramman. Nu masserbi tam tu mapia kani Jehova, mabbalittam tu kontento, memammo, anna magayaya. (Sal. 34:8; Prov. 10:22) Mas nga malladda i pangurug anna pakikofuttam kani Jehova durante nga umaru i ekspiriensa tam anna i pakannammu tam sa.

NU KUNNASI NGA NAPATTALUPADDIAN NI ABRAHAM I PAKIKOFUNNA TA DIOS

9, 10. (a) Anni i kawagan tapenu mapaladda i pakkofun? (b) Anni i mamakurug nga tinagibalor anna pinaladda ni Abraham i pakikofunna kani Jehova?

⁹ I pakkofun ay nabala-balor nga minas. (Bibbigan i Proverbio 17:17.) Ngem i pakikofun kani Jehova ay ari tu kagitta na displey nga nepaggig laman. Nu ari, kagittana yatun i makasta nga maseta nga kawaganna i danum anna panangngal tapenu mallappaw. Tinagibalor anna pinattalupaddian ni Abraham i pakikofunna kani Jehova. Kunnasi?

¹⁰ Ari nga nagimmang si Abraham nga naganassing anna nattuppal ta Dios. Durante nga mappange yaya anna i familiana ta Canaan, nappegiya yaya kani Jehova ta baraddi onu darakal nga desisionna. Tangaragun nige nga neyana si Isaac, turi ta 99 anios si Abraham, kinagi sa ni Jehova nga makugi i ngamin nga lallaki ta familiana. Kinuestion kari yatun ni Abraham onu narrason tapenu arianna tuppalan yatun? Ari, nammakatalo anna nattuppal yaya ta Dios “tatun mismu nga aggaw.”​—Gen. 17:10-14, 23.

11. Ngatta mavurung si Abraham ta Sodoma anna Gomora? Kunnasi nga inuffunan yaya ni Jehova?

¹¹ Megafu ta kanayun nga nattuppal si Abraham kani Jehova maski ta baraddi nga gannug, napattalupaddianna nga maladda i pakikofunna ta Dios. Nakagina kani Jehova i maski anni nga egga ta futuna anna nappoffun paga ta mariga ira nga pakkiavu. Angngariganna, turi ta nammuanna nga daralan na Dios i siudad na Sodoma anna Gomora, mavuru-vurung si Abraham nga baka mesipo nga madaral i matunung nga totolay. Awayyana tu mavurung yaya ta kanakanna nga si Lot nga maddian ta Sodoma. Mattalo si Abraham ta Dios, “i Ukum na interu davvun,” yari tu sipapakalinno nga nakkiavu. Mapasensia si Jehova nga nangituddu kani Abraham nga minaggallallo Yaya, nga mabibbigna i giffutuan anna ipaliagna ira.​—Gen. 18:22-33.

12, 13. (a) Kunnasi nga nakoffun kani Abraham i pakannammu anna ekspiriensana? (b) Anni i mangipasingan nga egga pattalo ni Abraham kani Jehova?

¹² Siguradu nga nakoffun kani Abraham i ngamin nga pakannammu anna ekspiriensana tapenu mapattalupaddianna i pakikofun kani Jehova. Yari tu, turi ta kiniddaw ni Jehova nga itavvunna i anana, nanonona i kualidad ira na Kofunna. Nonopattam uli yatun nga matalo nga lalaki durante nga mune ta Bakulug Moria. Ninonòna kari nga gavva mabbalin si Jehova nga marake anna awan tu allona? Imposible yatun para kani Abraham! Ngatta?

¹³ Turi ta manaw ngana si Abraham, kinagina ta aripanna ira nga nevulu sa: “Maddiak-kamu taw kavulu na asno, ngem sakan anna i abbing ay umay kami tari anna maddayarayaw tapus manoli kami nikamu.” (Gen. 22:5) Anni i kaya kagian ni Abraham? Nalladdug kari yaya ta aripanna ira ta pakkagina nga mattoli ira nga dua ni Isaac maski nu ammuna nga metavvung si Isaac? Ari. Kagian na Biblia nu anni i nononopan ni Abraham. (Bibbigan i Hebreo 11:19.) “Nangurug yaya tu awayya na Dios nga paginnolayan [si Isaac].” Ammuna nga maski nu manakam ngana ira dua ni Sara, metoli ni Jehova i pakawayyada nga mapeggan tu ana. (Heb. 11:11, 12, 18) Ammuna nga awan tu imposible kani Jehova. Siguradu yaya nga maski nu anni i mesimmu tatun nga aggaw, itoli lagapa ni Jehova i ideddukanna nga ana tapenu matuppal i ngamin nga promesana. Yatutta nagalan si Abraham tu “i yama na ngamin nga mangurug ta Dios”!

14. Anni ira i mariga nga situasion nga mepa-arubang nikaw megafu ta passerbim kani Jehova, anna kunnasi nga makoffun nikaw i ehemplo ni Abraham?

¹⁴ Kunnasi gapa nittam? Kurug tu ari nga kiddawan nittam na Dios i kunnatun. Ngem ikikkiddona nga mattuppal tam sa maski nu gittana mariga i bilinna onu ariattam mantindian nu ngatta. Egga kari manonomu nga bilin na Dios nga mariga nga tuppalan? Para ta karuan, mariga i mallayyagayya. Awayyana tu minappasiran i karuan yatutta marigatan ira nga mangilayyagayya ta mapia nga dumug. Marigatan gapa i karuan nga mabbalin tu neruma, ta eskuela onu ta pattrabahuan. (Ex. 23:2; 1 Tes. 2:2) Manonomu kari nga kagittam si Abraham nga munu-mune ta Bakulug Moria nga neyarubang ta mariga nga situasion? Nu wan, parigammu i sikan na nono anna pangurug ni Abraham! Nu nonopattam i ehemplo ira na matalo nga lallaki anna babbay, mapaguyu tam nga parigan ira anna maddukko kani Jehova bilang Kofuttam.—Heb. 12:1, 2.

PAKIKOFUN NGA MATTUPPAL TA ARU NGA BENDISION

15. Ngatta siguradu tam nga ari nga nabbabawi si Abraham ta pattuppalna kani Jehova?

¹⁵ Nabbabawi kari si Abraham megafu ta pattuppalna kani Jehova? Kinagi na Biblia nga “natay [yaya] ta kapa-kapianan nga dagun, lakay anna kontento.” (Gen. 25:8) Turi ta 175 anios ngana si Abraham, makafi ngana yaya, ngem magayaya yaya ta kikkingnguana. Ngatta? Megafu ta nakasentro i pattolena ta pakikofunna kani Jehova nga Dios. Ngem nu mabibbig tam nga si Abraham ay “lakay anna kontento,” ariattam nonopan nga arianna ngana karagatan nga mattolay ta mappange.

16. Anni ira nga gannug i mamagayaya kani Abraham ta Paraiso?

¹⁶ Kagian na Biblia nga “iniddanaman gari ni Abraham i siudad nga pinanono anna pinataddag na Dios—siudad nga maladda i nikepataddag na.” (Heb. 11:10) Nangurug yaya nga masinganna noka yatun nga siudad, i Pappatulan na Dios nga mammaguray ta interu davvun. Siguradu nga masinganna yatun! Mapanonomu kari i ayaya ni Abraham nga mattolay ta Paraiso anna paladdanna paga i pakikofunna kani Jehova? Siguradu nga magayaya yaya nga makannammu nga nakoffun i ehemplona ta aripan ira ni Jehova, rinivu nga dagun kabalin na patena! Ta Paraiso, mammuanna gapa nga i pinangitavvunna kani Isaac ay egga isimbolona nga mas makapabbaw nga gannug. (Heb. 11:19) Mammuanna paga nga i taki nga natagenona durante nga pappangetanna nga itavvung si Isaac ay nakoffun ta minillion nga matalo nga mantindian i daddam ni Jehova turi ta niyawana i Anana, si Jesu-Cristo, bilang tavvu. (Juan 3:16) Nakoffun nittam i ehemplo ni Abraham tapenu mas appresiattam i tavvu, i kadakallan nga kepasingan tu aya ta interu nga historia!

17. Anni i determinasiommu? Anni i magigiammu ta tumunug nga artikulo?

¹⁷ Determinado tam nakuan ngamin nga parigan i pangurug ni Abraham. Durante nga mas mammammu tam si Jehova, makakua tam tu rekord na kinamatalo sa anna mas aru i maekspiriensa tam nga pamendision anna papprotektana. (Bibbigan i Hebreo 6:10-12.) Mabbalin nakuan tu mannanayun nga Kofuttam si Jehova! Ta tumunug nga artikulo, gigiammuattam i tallu paga nga ehemplo na matalo ira nga nabbalin tu madukko nga kofun na Dios.