Megafu ta Ari Mepangngo nga Inaggallallo Mapalubbangakkamu

1, 2. Ngatta interesadu i Saksi ira ni Jehova ta Roma 5:12?

NONOPAN nga kayàmu ilista ira i teksto ta Biblia nga kabisadu anna kanayun usan na Saksi ira ni Jehova. Tadday kari i Roma 5:12 ta ilistam? Innammu nu namippigam ngana inusa yatun: “Megafu ta tadday nga tolay, egga ta utun na davvun i pattagaruli, ay i katagarulian na i nangirattal ta patay. Ay nawwara i patay ta ngamin nga totolay megafu ta nattagaruli ngamin i totolay.”

² Namippiga neyusa yatun nga teksto ta libru nga Anni Talaga i Ituttuddu na Biblia? Durante nga gigiammuammu yaw nga libru kavulu i ánamu onu i tanakuan, siguradu nga mabibbigmu i Roma 5:12 nu gigiammuan i gakkag na Dios para ta davvun, i tavvu, anna i nesimmu ta natay—ta kapitulo 3, 5, anna 6. Ngem piga besesmu nga manono i Roma 5:12 nu meyannung ta taddagmu ta arubang ni Jehova, i kukukuammu, anna i mappange ira nga iddanamam?

3. Anni i realidad nga arubangattam meyannung ta tagaruli?

³ Siempre, mawag nga arubangattam ngamin i realidad nga minattagaruli ittam. Makaliwa ittam kada aggaw. Ngem, makasiguradu ittam nga daddamman na Dios nga naggafu ittam ta gavu, anna sigga-paran yaya nga magallo. (Sal. 103:13, 14) Nilagum ni Jesus ta modelo nga pakimallo nga mekiddaw: “Pakoman nakami ta katagaruliam-mi.” (Luc. 11:2-4) Yatutta, awan tu rason tapenu agga-nono paga laman i kamali ira nga pinakoma ngana na Dios. Ngem mabenefisiowan ittam nu pannonopattam nu kunnasi anna ngatta pinakoma ittam na Dios.

NAPAKOMA GAFU TA ARI MEPANGNGO NGA PAGALLO NA DIOS

4, 5. (a) Kunnasi tam mas malippawa i kebalinan na Roma 5:12? (b) Anni i “ari kapaga-pagan nga inaggallallo” nga nakagi ta Roma 3:24?

⁴ Importante ira nga informasion i malegattam ta kapitulo ira ta pallevu na kinagi ni apostol Pablo ta Roma 5:12, netallugaring ta kapitulo 6. Makoffun yaw tapenu malippawa tam nu kunnasi ittam pakoman ni Jehova. Mabibbig ta kapitulo 3: “Ngamin i totolay ay nattagaruli . . . Ngem gafu ta ari kapaga-pagan nga inaggallallo na Dios, pinabbalin na ittam ngamin tu matunung gafu kani Cristo Jesus nga namalubbang nittam.” (Roma 3:23, 24) Anni kayà kagian ni Pablo ta pakkagi ta “ari kapaga-pagan nga inaggallallo”? Niyusana i Griego nga termino nga segun ta tadday nga referensia, egga kebalinanna nga “tadday nga fabor nga nakua tu napafutuan, nga awan tu paga onu ekspektan nga katalina.” Ari nga nabbannagan onu mepangngo yatun.

⁵ Kinagi na iskolar nga si John Parkhurst: “Nu Dios onu Cristo i paguruvovugan, yatun nga [Griego nga termino] ay maruddu nga tumukoy ta ari mapagan anna ari mepangngo nga fabor onu kinasippoda megafu ta pamalubbang anna pangipaliagda ta tolay. Yari tu i orihinal nga Griego nga termino ay egga i ideyana tu “ari mepangngo nga kinasippo.” Ngem kunnasi mepasingan na Dios yaw nga ari mepangngo nga pagallo? Anna anni i koneksionna yatun ta iddanamam anna ta relasiommu sa? Innattam.

6. Kunnasi kadakal i benefisio nga malà na totolay megafu ta ari maguku-gukug nga allo na Dios?

⁶ Si Adan i “tadday nga tolay” nu ngatta egga i tagaruli anna patay “ta utun na davvun.” Kinagi paga ni Pablo nga i “ari nga maguku-gukug nga allo na Dios” ay “gafu kani Jesu-Cristo.” (Roma 5:12, 15, 17) Makasta i resultana yatun nga ari maguku-gukug nga allo ta ngamin nga totolay. “Kunnatun gapa i karu na mapakatunung nga totolay megafu ta pakimoray na tadday gapa nga tolay [si Jesus].” Ta kakuruganna, “mangiyadde nittam ta mannanayun nga attolay gafu kani Jesu-Cristo” i ari maguku-gukug nga allo.—Roma 5:19, 21.

7. Ngatta pagallo anna ari mepangngo i probision na Dios nga tavvu?

⁷ Ari obligadu si Jehova nga pangayan i Anana ta davvun tapenu mabbalin tu tavvu. Ari gapa nga mepangngo i imperfekto, minattagaruli nga totolay ta pangiyawa na Dios anna ni Jesus tu tavvu tapenu posible i pamakoma. Yatutta i kapakoma anna tiansa tam nga mattolay tu mannanayun ay kurug nga pagallo nga ari mepangngo. Tagibalorattam nakuan i regalu na Dios nga ari mepangngo nga allo anna ipamavuluttam nga afektan natun i pattoletam kagaggaw.

PANGAPPRESIA TA ARI MEPANGNGO NGA PAGALLO NA DIOS

8. Anni i ari mepangngo nga rason meyannung ta pagimamma na totolay ta liwi-liwa?

⁸ Bilang imperfekto nga ginaka ni Adan, egga i tendensia tam nga makkamali, magangngua tu marake anna mattagaruli. Ngem, marake nga irason i ari mepangngo nga allo na Dios, gukaban na pakkagi: ‘Maski paga makaliwa ngà—mattagaruli ta pagimamma na Dios—ariakku ikavurung yatun. Pakomannà ni Jehova.’ Egga karuan nga Cristiano nga kunnatun i pagimammada maski turi ta matolay paga i karuan ta apostoles. (Bibbigan i Judas 4.) Awayyana nga ariattam vuluvuga nonopan i kunnatun; ngem awayyana tu nemula nittam i vukal na ari fustu nga pagimamma tapus mamegafu nga mattalovu.

9, 10. Kunnasi napalubbangan da Pablo anna i karuan ta liwa anna patay?

⁹ Kinagi ni Pablo nga lillitattam nakuan i kunnaw nga pagimamma: “Matindiannà mabba na Dios. Pappasanna i tagarulì anna ugal nga kukukuakku.” Ngatta? Megafu ta kagitta na nitura ni Pablo, ‘natay ngana nu meyannung ta pattagaruli’ i Cristiano ira. (Bibbigan i Roma 6:1, 2.) Kunnasi makagi nga ‘natay ngana ira meyannung ta pattagaruli’ ngem sigga-matolay paga ira taw ta davvun?

¹⁰ Niyaplika na Dios i tavvu kani Pablo anna ta tanakuan paga ta kaggawanna. Yatutta pinakoma ngana ira ni Jehova, sinunnona ira tu masanto nga espiritu, anna inagalanna ira tu nespirituan nga ánana. Tapus, napeggan ira tu nelangitan nga iddanama. Nu mapakurugda nga matalo ira, mattolay anna makipammaguray ira kani Cristo ta langi. Ngem, kinagi ni Pablo nga ‘natay ngana ira meyannung ta pattagaruli’ durante nga matolay paga ira anna massesserbi ta Dios ta davvun. Inusana i ehemplo ni Jesus, nga natay bilang tolay tapus napaginnolay bilang imortal nga espiritu ta langi. Ari ngana nga mammaguray i patay kani Jesus. Kunnatun gapa ta nazelugan ira nga Cristiano, nga mekonsiderada i baggida nga ‘natay ngana meyannung ta katagarulian, ngem matolay meyannung ta ketadday ta Dios gafu kani Cristo Jesus.’ (Roma 6:9, 11) Ari ngana nga kagitta na dati i pattoleda. Ariadda ngana tuttuttulan i pangidikta onu i panenta na minattagaruli nga pakkaragada ira. Natay ngana ira ta kunnatun nga dati nga pattoleda.

11. Kunnasi makagi nga ‘natay nu meyannung ta pattagaruli’ sittam nga magiddanama nga mattolay tu mannanayun ta Paraiso?

¹¹ Kunnasi gapa nittam? Nige tam nabbalin tu Cristiano, maruddu nga mattagaruli ittam, awayyana nga ariattam ammu nu kunnasi anna nu ngatta tagaruli ta Dios i kukukuattam. Kagitta tam i “aripan na ganna-gannug nga maritta anna ngamin nga marakay.” Makagi nga ‘nammagurayan ittam na katagarulian.’ (Roma 6:19, 20) Tapus, nammuattam i kinakurug ta Biblia, inuli i pattoletam, naddedika ta Dios, anna nabawtisowan. Namegafu tatun, nakkaraga ittam ngana nga ‘mamarulo tu napafutu’ ta tuttuddu anna estandarte ira na Dios. Yatutta ‘napalubbangan ittam ta pakawayya na katagarulian’ anna ‘nabbalin ittam ngana sangoye tu aripan na Dios tapenu kuan i matunung.’ (Roma 6:17, 18) Yari tu makagi gapa nga “natay ittam ngana nu meyannung ta pattagaruli.”

12. Anni i awayya na kuan na kataggi-tadday nittam?

¹² Nonopammu i baggim meyannung ta kinagi ni Pablo: “Arian nu nga itulu tu mammaguray i katagarulian ta baggi nu nga matay, tapenu arian nu ngana tuttulan i negagangay ira nga karagatan na baggi nu.” (Roma 6:12) Awayya tam nga “itulu tu mammaguray i katagarulian” gukaban na pagangngua ta pakkaraga na imperfekto nga baggi. Megafu ta awayya tam “itulu” onu ibita nga mammaguray i katagarulian, nonopattam, Anni i egga ta futù? Iyavu ta baggim: ‘Egga kari i tiempo nga ipamavulukku i imperfekto nga baggì onu nono nga igiyana ta marake nga direksion tapus kuakku yatun? Natay ngà ngana kari nu meyannung ta pattagaruli? Mattolay ngà kari para ta Dios gukaban ni Jesu-Cristo?’ Makua tam ngamin yatun depende ta pangappresia tam ta ari mepangngo nga pagallo na Dios gukaban na pamakomana nittam.

AWAYYAM MANGAFFU TA PAKILLABAN

13. Ngatta makapakkomfiansa ittam nga posible nga malillitan i tagaruli?

¹³ Nilillitan ngana na totolay ni Jehova i ‘ganna-gannug nga kikkingnguada gari’ nigeda nammuan, iniddu, anna nasserbi ta Dios. Nelagum ta pattoleda gari i ‘ganna-gannug nga kikkingnguada nga ipasiradda ngana sangoye’ nga mepangngo laman ta patay. (Roma 6:21) Ngem, nanguli ngana ira. Kurug yatun ta aru nga taga-Corinto nga sinurakkan ni Pablo. Egga i karuan nga minaddayarayaw ta sinan-dios ira, minannallaw, minakkidallaw, manadday ta kagitta da nga babbay onu lallaki, minakkoko, minaggillellaw anna karuan paga. Ngem, “nabaggawan” anna “napakatunung” ngana ira. (1 Cor. 6:9-11) Kunnatun gapa i karuan ta kongregasion ta Roma. Nainspiran si Pablo nga turakkan ira: “Arian nu nga itulu tu mattagaruli i maski anni laman nga parte na baggi nu megafu laman ta marakay ira nga gakkag. Makimoray kamu lallagu ta Dios, ta napaginnolay kamu ngana. Iyalawa nu sa i interu nga baggi nu nga meyusa ta matunung ira nga gakkag.” (Roma 6:13) Siguradu si Pablo nga mattalupaddian ira nga marenu ta espiritual anna tulu-tuloy nga mabenefisiowan ta ari mepangngo nga allo na Dios.

14, 15. Anni nakuan i iyavu tam ta baggi tam nu meyannung ta ‘mamarulo tu napafutu’?

¹⁴ Kunnatun gapa ta maddaggun. Egga i wawwaragi nga nattolay tu kagitta na taga-Corinto gari. Ngem nanguli ngana gapa ira. Pinanawadda ngana i minattagaruli nga pattoleda anna “nabaggawan” ira. Nu kunnatun gapa i kingnguam, anni ngana i taddagmu ta aruban na Dios ta maddaggun? Megafu ta egga ngana i ari mepangngo nga allo nga marresulta ta pamakoma, determinadu ka kari nga ari ‘itulu tu mattagaruli i maski anni laman nga parte na baggim’? Megafu ta “napaginnolay kamu ngana,” ‘iyalawa nu kari [ta Dios] i interu nga baggi nu’?

¹⁵ Tapenu makua tam yatun, ibita tam nakuan i sinadya nga madammo ira nga nakaliwatan na karuan ta Corinto. Importante yatun nu kagiattam nga inaksepta tam ngana i ari mepangngo nga pagallo na Dios anna ari ngana ‘mammaguray nittam i katagarulian.’ Ngem, determinadu kari ittam nga ‘mamarulo tu napafutu’ gukaban na pangngua ta adde na mawayya tam nga ibita ta liwi-liwa nga ari serioso para ta tanakuan?—Roma 6:14, 17.

16. Kunnasi tam nammuan nga i pabbalin tu Cristiano ay ari laman basta pallilli ta pangngua tu madammo nga liwi-liwa?

¹⁶ Nonopan si apostol Pablo. Siguradu ittam nga ari yaya nakangngua tu madammo ira nga liwa nga nakagi ta 1 Corinto 6:9-11. Ngem, inaminna nga minattagaruli yaya. Niturana: “Malaray ngà laman nga tolay nga nabbalin tu aripan na katagarulian. Ariak-ku nga malippawa i baggì, ta ariak-ku nga kuan i ikaya ku nga kuan, ngem kuak-ku lallagu i ikalussò.” (Roma 7:14, 15) Ipasinganna yaw nga egga ira i tanakuan paga nga liwa nga laba-labanan ni Pablo. (Bibbigan i Roma 7:21-23.) Kurug nakuan yatun nittam durante nga mappursigi ittam nga ‘mamarulo tu napafutu.’

17. Ngatta kayàmu makkagi tu kurug?

¹⁷ Ikonsidera i meyannung ta pakkagi tu kurug. Importante ta Cristiano ira yatun. (Bibbigan i Proverbio 14:5; Efeso 4:25.) Si Satanas i “yama ngamin na siri.” Natay si Ananias anna i atawana megafu ta pappateteko onu palladda-laddug. Siempre ariattam kayà parigan danatun—ibita tam i palladda-laddug. (Juan 8:44; King. 5:1-11) Kunnatun ittam kari nu meyannung ta pakkagi tu kurug? Ta kakuruganna, masingan nakuan tatun i monag nga pangappresia tam ta ari kapaga-pagan nga inaggallallo na Dios.

18, 19. Ngatta makagi nga ari laman basta direkta nga palladdug i ari pakkagi tu kurug?

¹⁸ I palladdug ay ari pakkagi tu kurug. Ngem, kayà ni Jehova nga ari laman tu basta pakkagi tu ari kurug i ibita tam. Pinagaramna i Israelita ira gari: “Mappakasanto kamu, megafu ta sakan, si Jehova nga Diosnu, ay masanto.” Tapus nangiyawa yaya tu pamarigan na pabbalin tu masanto. Nikagi na Dios: “Ariannu makkoko, ariannu mangilogo, anna ariannu nakuan magillakayu ta kataggi-tadday.” (Lev. 19:2, 11) Awayyana nga ari direkta nga malladdug i tadday ngem ilogona lagapa i tanakuan ta pakilallanna.

¹⁹ Angngariganna, kagian na tadday ta amo onu ta katrabahuna ira nga arianna makapattrabahu ta tumunug nga aggaw onu maggammia lubbe megafu ta ‘umay yaya ta doktor.’ Ngem ta kakuruganna, maddaga laman yaya ta farmasia onu umay laman yaya ta ofisina na doktor tapenu mappaga. I fustu nga rason nu ngatta ari yaya makapattrabahu ay tapenu makaprepara para ta biahe onu tapenu mepasiar i familiana. Fustu gapa i pakkagina nga ‘umay yaya ta doktor,’ ngem makagim kari nga arianna nalladdug? Onu mangilologo yaya? Baka egga ammum nga parehu nga situasion tu sadya nga pangilogo ta tanakuan. Awayyana nga tapenu melisi ta pamanunnu onu makapagganansia ta tanakuan. Maski awan tu direkta nga palladdug, kunnasi i direksion na Dios: “Ariannu mangilogo”? Nonopan gapa i kagian na Roma 6:19: “Mawag tu kuan nu i baggi nu nga mabbalin tu aripan na katunung tapenu mapakasanto kamu ta arubang na Dios.”

20, 21. Mapagaram ittam nakuan na ari mepangngo nga pagallo na Dios nga kuan i anni?

²⁰ Siempre, ari laman tu pangibita ta pakidallaw onu minakkidallaw, pagillellaw, onu tanakuan paga ira nga tagaruli nga kikkingngua na taga-Corinto. Kebalinan na pangaksepta ta ari mepangngo nga pagallo na Dios ay ari laman tu pallilli ta seksual nga imoralidad, nu ari, pallaban ta tendensia nga magustuan i imoral ira nga dibersion. Ari laman nga mebita tam i pagillellaw megafu ta pangipresenta nga aripan ittam na kinatunung, nu ari, ibita tam i minum adde ta maggi ngana mellaw. Baka kawagan nga pappursigiattam i pakillaban tatun nga marake nga annangngua; ngem awayyam mangaffu.

²¹ Gakkag tam nga lillitan i serioso ira nga liwa kunne na gapa i gittana alappaw nga liwi-liwa. Ariattam perfekto nga makua yatun. Ngem kuattam i adde na mawayya tam kagitta na kingngua ni Pablo. Pinagaramna i wawwaragi: “Arian nu nga itulu tu mammaguray i katagarulian ta baggi nu nga matay, tapenu arian nu ngana tuttulan i negagangay ira nga karagatan na baggi nu.” (Roma 6:12; 7:18-20) Durante nga laba-labanattam ngamin i klase na liwa, mepasingattam i fustu nga appresasion ta ari mepangngo nga pagallo na Dios gukaban ni Cristo.

22. Anni i innaggan danuri napakurugda i appresasiodda ta ari mepangngo nga pagallo na Dios?

²² Megafu ta ari mepangngo nga pagallo na Dios, napakoma ngana i liwi-liwa tam anna awayyana nga tulu-tuloy nga mapakoma. Apurattam nga alsan i maski anni nga tendensia nga kuan danuri gittana alappaw nga liwa ta tanakuan. Nitura ni Pablo i bendision nga maginnennag nittam: “Sangoye, pinalubbangan nakamu ngana na Dios ta katagarulian anna pinabbalin nakamu tu masserbi sa. I vunga natun sangoye ay i masanto nga attolay nga mattuppal ta inango nga adde ta ngangangay.”—Roma 6:22.