TOPIKO NA VUNGUN | I KURUG MEYANNUNG TA ANGHEL IRA

I Kinakurug Meyannung ta Anghel Ira

Kayà mu kari mammuan i kinakurug meyannung ta anghel ira—sinni ira, kunnasi ira naparatu, anna anni kuadda? Awan ngana tu kapianan nga pakalegan tu tabbag, nu ari, ta nainspiran nga Uvovug na Dios, i Biblia. (2 Timoteo 3:16) Anni kagian na Biblia nittam?

Nu kunnasi nga i Dios ay Espiritu, ari gapa nga masingan nga espiritu i anghel ira ta ‘awan tu pattag anna tuladda.’ Maddian ta langa-langi i matalo ira nga anghel anna direkta ira nga makaranni ta nelangitan nga presensia na Dios.—Lucas 24:39, NW; Mateo 18:10; Juan 4:24.
Egga ira tiempo nga nabbaggi tu tolay i anghel ira tapenu ituppal i niyawa na Dios nga annungadda ta davvun tapus pinanawadda i baggida bilang tolay kabalidda netuppal yatun.—Ukum Ira 6:11-23; 13:15-20.
Maski nu nepresenta ta Biblia bilang lalaki i anghel ira anna kanayun nga mabbaggi ira tu lalaki, awan tu babay onu lalaki nga panakkilalan nira. Ari ira mangatawa onu makitawa anna ari ira maggaka. Ari gapa ira nattolay labbi ta davvun bilang baby, abbing, onu adulto. Pinaratu ni Jehova i anghel ira; yatutta nagalan ira ta Biblia nga “ána na kurug nga Dios.”—Job 1:6; Salmo 148:2, 5.
Egga nakagi ta Biblia nga “uvovug na anghel ira,” ipasingan naw nga egga i lengguahe anna paguvovug na espiritu ira nga persona. Maski nu inusa na Dios i anghel ira nga makikomunika ta totolay, igammana nittam i paddayaw onu paddasal nira.—1 Corinto 13:1; Nepakannammu 22:8, 9.
Egga rinivu-rivu nga anghel, posible nga binillion i biladda.a—Daniel 7:10; Nepakannammu 5:11.
“Makapangngua” i anghel ira—kuruga mas makapangngua ta totolay—anna kuruga mas ma-uto. Kitappaspas ira ta pagguyu-guyu, mas paga alistu anne ta puede manono na tolay.—Salmo 103:20; Daniel 9:20-23.
Maski nu mas ma-uto anna mas makapangngua ira, egga limitasion na anghel ira, anna egga ira i gannug nga ariadda ammu.—Mateo 24:36; 1 Pedro 1:12.
Naparatu i anghel ira nga egga personalidad, makadios nga kualidad, anna lallagureda. Gitta na totolay, mawayyada pilian nga kuan i mapia onu i marake. Kaddaraddam, pinili na karuan nga anghel nga marrebelde ta Dios.—Judas 6.

a I orihinal nga Griego nga termino ta Nepakannammu 5:11 ay tumukoy ta “mafulu rivu nga aggi-mafulu rivu,” yari tu posible nga minillion, onu binillion paga, i bilang na espiritu ira nga pinaratu!

Kunnasi Na-organisa i Anghel ira na Dios?

I arkanghel, si Miguel, i panakallan nga anghel nu meyannung ta pakapangngua anna autoridad. Manawag nga kagian na Biblia nga Miguel i tanakuan paga nga ngagan ni Jesu-Cristo.—1 Tesalonica 4:16; Judas 9.

I serafin ira ay atatannang i ranggoda ta anghel ira nu meyannung ta pribilehio anna dayaw, anna egga ira ta pallevu na trono na Dios.—Isaias 6:1-3.

I kerubin ira ay atannang gapa i ranggoda anna egga espesial nga responsibilidadda megafu ta direkta ira nga massesserbi ta Makapangngua-sa-ngamin. Kanayun nga mepasingan nga egga ira ta bikona.—Genesis 3:24; Ezekiel 9:3; 11:22.

I rinivu-rivu nga mensahero nga anghel ay massesserbi bilang ahente anna pannakabaggi na Katannangan ta pangituppal ta urena.b—Hebreo 1:7, 14.

b Para ta mas aru nga informasion meyannung ta anghel ira, innan i kapitulo 10 na libru nga Anni Talaga i Ituttuddu na Biblia? anna i artikulo ta apendise nga “Sinni si Miguel nga Arkanghel?” nga nipublisa na Saksi ira ni Jehova. Available gapa ta www.pr418.com/ibg.