“Yaw i Kakastan nga Regalu nga Nalawà Ku”

Yatun i kinagi na 13-anios nga maginganay turi niregaluadda yaya tu kitu. Kagian na tadday nga negosiante nga babay nga i computer nga niyawa sa na yamana turi haiskul yaya i tadday nga regalu nga nanguli ta pattolena. Kinagi gapa na bagu kasal nga lalaki nga i card nga pinadday lapa na atawana ta first anniversary-da i kakastan nga regalu nga nalawàna.

Kada ragun, aru nga totolay i mangufu ta tiempoda ta pappursigi nga magaleg tu “kakastan” nga regalu para ta kofun onu parientesda ta espesial nga okasion. Kakayà na magaru i makaginna tu komento nga gittana nakagi ta gafu. Sikaw? Kayà mu kari gapa mangiyawa onu makalawà tu regalu nga talaga maappresia?

Talaga makapagayaya i kunnatun, ari laman megafu ta efekto na regalu ta nakalawà ngem ta matageno gapa na nangiyawa. Tutal, kagian na Biblia: “Mas dakal i pagayaya ta pangiyawa anne ta pangalawa.” (Kingngua 20:35) Siempre, mas dakal i pagayaya nu kuruga tagibaloran na nakalawà i regalu.

Kunnasim gafu mapabbalin tu kurug nga makapagayaya nikaw anna ta makalawà i parregalum? Anna nu ariammu meyawa i “kakastan” nga regalu, anni i makuam tapenu talaga maappresia i regalum?